52 SI MARKUS
“Boi do Ibana Mangurupi Au”
ADONG ma sisean ni Jesus na margoar si Markus, na tong digoari si Johannes. Nang pe poso dope si Markus, halak na barani do ibana. Di sada tikki ditakkup ma Jesus, diikkat tanganna, dung i diboan akka tentara na marsenjata ma ibana. Nungnga melarikan diri be sude apostelna. Alai didok di Bibel, “adong do sahalak doli-doli” na barani mangihutton Jesus sian na jonok. Tikki diida akka halak doli-doli i, naeng ditakkup nasida do ibana. Alai holan kain linen na dipakkena i do na dapot ni nasida. Pittor “lari ma ibana holan mamakke pakkean dalam”. Ala holan di Injil Markus do kisah on dipaboa, godang do halak na mandok si Markus do doli-doli i.
Tinggal di Jerusalem do si Markus. Ra, rap dohot omakna do ibana tinggal, jala na mora do ra omakna i. Dung mate Jesus, di jabu ni omak ni si Markus do dibahen parpunguan. I do alana tikki dibebasson suru-suruan si Petrus sian penjara, tusi do ibana lao. Ala di jabuna do dibahen parpunguan, gabe godang ma akka sisean ni Jesus dohot apostel na ditanda si Markus. Jala sian nasida ma si Markus marsiajar taringot habaranion.
Hira-hira taon 46 M, ro ma si Barnabas sepupu ni si Markus tu Jerusalem dohot Apostel Paulus. Lomo do roha ni nasida mangalatik si Markus asa boi mangurupi akka dongan di inganan na asing. Jadi, diboan nasida ma si Markus tikki mulak nasida tu Antiokia. Hira-hira sataon dukkon i, ditogihon si Paulus dohot si Barnabas do si Markus asa mandongani nasida saleleng marbarita di akka inganan na massai dao. Olo do si Markus dohot, jala diurupi ibana do akka misionaris na bersemangat i.
Porlu do habaranion di si Markus tikki rap marbarita dohot nasida. Alana maol do pardalanan ni nasida jala berbahaya. Di pudian ni ari didok si Paulus do di suratna, jotjot do ibana menghadapi bahaya di pardalanan. Adong do ‘alani sunge, alani pangarampok, bahaya di kota, di padang gurun, dohot di laut’. (2 Kor. 11:26) Asing ni i, ikkon diparade si Markus do sude na dihaporluhon si Paulus dohot si Barnabas. Jala marhasil do ibana mangulahon i saleleng piga-piga tikki. Alai tikki sahat nasida di Pampilia, ditinggalhon si Markus do si Paulus dohot si Barnabas jala mulak tu Jerusalem. Na paborattu do dihilala si Markus tugasna i? Dang adong dipaboa di Bibel. Alai tikki na lao i si Markus, kecewa do si Paulus dohot si Barnabas. Alai si Paulus ma na paling kecewa.
Dung mulak si Paulus dohot si Barnabas sian pardalanan ni nasida na parjolo gabe misionaris, naeng lao do muse nasida marbarita tu inganan na asing. Naeng diboan si Barnabas do si Markus asa dohot muse mandongani nasida. Alai dang setuju si Paulus. Ra didok rohana dang boi diandalhon si Markus. “Gabe tubu ma parbadaan” di nasida na dua. Ujungna, gabe marsiboan dalanna be ma nasida. Diboan si Barnabas ma si Markus tu Siprus jala marbarita ma nasida disi. Molo si Paulus, dilului ibana do donganna jala marbarita tu inganan na asing.
Pasti gabe lungun do roha ni si Markus, alana nungnga dibahen ibana kecewa si Paulus, dongan na massai dihaholongi ibana. Jala alani ibana gabe marbadai ma si Paulus dohot sahabatna si Barnabas, jala dang rappak be marbarita. Boi do gabe kecewa si Markus tu dirina sandiri alani i. Manang, boi do gabe muruk si Markus tu si Paulus. Alana didok roha ni si Markus dang adil pambahenan ni si Paulus tu ibana. Alai nang pe songon i dihilala si Markus, toktong do ibana melayani Jahowa.
Nang pe dang dapot ni si Markus tugas na diharappon ibana, alai toktong do setia ibana melayani Jahowa
Torus do dibahen si Markus sian nasa tolapna lao mangurupi akka dongan di huria. Hira-hira taon 60-61 M, gabe tahanan rumah do si Paulus di Rom. Disi, dibahen ibana ma sada surat. Di suratna i, dipaboa ibana do taringot si Markus na mandongani ibana. Didok si Paulus do molo si Markus i halak ‘na patoguhon rohana’. Hira-hira taon 62-64 M, dipaboa do muse taringot si Markus di surat na dibahen Apostel Petrus. Didok si Petrus do si Markus i “anakku”. Ra lao do si Markus tu Babel naeng mangurupi jala patoguhon si Petrus naung matua di tikki i. Sebenarna dao hian do pardalanan tu Babel, alai olo do si Markus lao tusi. Pasti gabe dipatogu do roha ni si Petrus! Dipaboa si Petrus do akka pengalamanna saleleng rap dohot Jesus Kristus. Ra tikki di Rom do dibahen si Markus bukku Injil na mamakke goarna. Jala di bukku i, disurat do akka perincian na didapot ibana sian si Petrus.
Parpudi sahali tajaha hatorangan taringot si Markus, i ma di surat ni si Paulus tu si Timoteus. Tikki i, dipenjarahon do muse si Paulus. Jala dipangido ibana ma asa ro si Timoteus manjuppangi ibana jala mamboan si Markus. Boasa? Didok si Paulus, “Boi do [si Markus] mangurupi au di ulaonku marhobas tu Debata.” Pasti massai las do roha ni si Timoteus dohot si Markus manjuppangi si Paulus! Jala dipatogu nasida do si Paulus sebelum mate ibana. Nang pe godang tantangan na dihadapi si Markus saleleng melayani Jahowa, alai barani do ibana. Jala toktong do diurupi ibana akka dongan sahaporseaonna. Pasti massai holong do roha ni Jahowa tu si Markus.
Jaha ma ceritana di:
Na lao dibahas:
Boha do cara ni si Markus patuduhon habaranion?
Bagas ma Parsiajari
1. Boasa boi tadok na mora do keluarga ni si Markus? (w10 15/3 6 ¶6–7 ¶1-wcgr)
2. Aha do hira-hira na diulahon si Markus lao “mangurupi” si Barnabas dohot si Paulus? (Ul. 13:5; w10 15/3 7 ¶5-wcgr)
3. Akka luat na dia do na didalani si Markus? (w10 15/3 8 ¶5-7-wcgr) A
Gambar A: Piga-piga inganan na mungkin hea dikunjungi si Markus
4. Paboa ma contoh ni hatorangan na dibahen si Markus di suratna, na bisa jadi dibege ibana sian si Petrus. (w08 1/2 26 ¶1-wcgr)
Pikkirhon ma Aha Parsiajaranna
Dang hea si Markus didok sahalak apostel manang panurirang. Alai serep do rohana mangurupi akka dongan. Songon dia do hita boi maniru ibana saonari?
Nang pe dang dapot ni si Markus tugas na istimewa lao mangurupi si Paulus, alai toktong do setia ibana tu Jahowa. Aha do na boi tatiru sian ibana? B
Gambar B
Songon dia do caramuna maniru habaranion ni si Markus?
Rimangi ma
Sian kisah on, aha do na boi huparsiajari taringot Jahowa?
Aha do hubungan ni kisah on tu janji ni Jahowa taringot Paradeiso?
Dipillit do si Markus lao mamaretta rap dohot Kristus di surgo. Boasa las rohamuna mamboto on?
Ida ma Muse on
Aha do na menarik sian Injil Markus?
Pakke ma contoh ni si Markus lao mangurupi gellengmuna asa toktong melayani Jahowa dang soal aha pe na masa.
“Toktong do Setia si Markus Manomba Jahowa” (w08 1/2 24-26-wcgr)