51 SI BARNABAS
“Anak ni Pangapulion”
HIRA-HIRA tolu taon dung gabe halak Kristen si Paulus, lao ma ibana tu Jerusalem naeng manjuppangi akka dongan sahaporseaonna. (Gal. 1:15-19) Alai mabiar do nasida tu si Paulus, ala diingot nasida do na hea dianiaya si Paulus halak Kristen. Ra, godang dope sian nasida na so porsea naung muba si Paulus. Alai adong do sahalak bawa na barani, jala burju tu si Paulus. Dijou do ibana si Barnabas.
Mabiar do halak Kristen na di Jerusalem mangurupi si Paulus dung gabe halak Kristen ibana. Alai barani do si Barnabas mangurupi ibana
Didok di Bibel goar asli ni si Barnabas, i ma si Josep. Alai didok akka dongan do ibana si Barnabas na lapatanna, “Anak ni Pangapulion”. Alana burju do ibana, dipatogu do na asing jala diurupi. Misalna, dang leleng dung Pentakosta 33 M, dijual si Barnabas do ladangna jala dilehon ma tuhorna i lao mangurupi akka dongan na pogos. Tikki sahat si Paulus di Jerusalem taon 36 M, dijuppangi si Barnabas do si Paulus, jala burju do ibana tu si Paulus. Bibel mandok, “Ro ma si Barnabas mangurupi si Paulus, jala diboan ma ibana tu akka apostel.”
Gabe bersahabat ma si Paulus dohot si Barnabas. Tikki di Jerusalem si Paulus, barani do ibana marbarita taringot Jesus. Gabe naeng dipamate piga-piga halak Jahudi ma ibana. Alani i, disuru akka dongan na di Jerusalem ma ibana lao tu Tarsus, huta hatubuanna. Sia taon dukkon i, pajuppang ma muse si Barnabas dohot si Paulus. Di tikki i, disuru akka dongan do si Barnabas lao mangurupi huria di Antiokia Siria. Alana godang do halak disi naung gabe Kristen. Dipillit do si Barnabas mangulahon tugas on, ala “halak na burju do ibana, togu haporseaonna, jala digohi tondi parbadia”. Ala godang do halak di Antiokia Siria na naeng mamboto barita na uli, ikkon adong do na mangurupi si Barnabas. Jadi, lao ma si Barnabas tu Tarsus manjuppangi si Paulus. Dung i rap marbarita ma nasida di Antiokia. Lao ma muse nasida tu Judea. Diboan nasida do sumbangan naung dipapungu huria Antiokia, jala dilehon ma i tu akka dongan na pogos disi.
Tikki mulak muse nasida tu Antiokia, ditugasson ma nasida gabe misionaris. Porlu do habaranion di nasida lao mangulahon i, alana godang do tantangan na lao dihadapi. Misalna tikki sahat di Ikonium, adong ma piga-piga halak Jahudi na naeng mambunu nasida. Jadi, ikkon ditinggalhon nasida do Ikonium jala lao tu Listra. Mulana, naeng disomba akka halak na di Listra i do si Barnabas dohot si Paulus, alana dianggap do nasida songon debata. Alai ro ma halak Jahudi sian Antiokia dohot sian Ikonium menghasut akka halak na di Listra. Gabe didangguri ma si Paulus, disarat tu luar ni kota, jala ditinggalhon disi ala dirippu naung mate. Dung ro akka dongan na di Listra mandapotton si Paulus, diida ma mangolu dope si Paulus! Dung i jongjong ma si Paulus, jala masuk muse tu kota i. Pasti las do roha ni si Barnabas ala mangolu dope si Paulus. Marsogotna i, lao ma nasida sian Listra. Dang leleng dukkon i, barani do nasida ro muse tu kota i, nang pe hea naeng dipamate disi.
Rap saulaon do si Barnabas dohot si Paulus di ulaon marbarita. Memang, godang do situasi na berbahaya na dihadapi nasida. Alai godang do tong pengalaman na luar biasa na dihilala nasida. Di sada tikki masa ma situasi na mambahen nasida gabe marbada. Tikki naeng marbarita muse nasida tu inganan na asing, naeng diajak si Barnabas do sepupuna si Markus asa dohot mandongani nasida. Alai dang setuju si Paulus, alana nungnga hea ditinggalhon si Markus nasida. Dang adong sian nasida na dua na olo mengalah. Akibatna, “gabe tubu ma parbadaan di nasida”, jala marsiboan dalanna be.
Toktong do muruk si Barnabas tu si Paulus, manang dimaappon do si Paulus? Porlu do habaranion di si Barnabas lao mangulahon na sittong jala dang toktong muruk tu donganna i. Biasana molo dang sapandapot hita tu dongan sahaporseaon, olo do terpancing hita naeng mandok hata na so denggan taringot ibana, gabe dendam, manang gabe dang olo be hita marpungu. Porlu do di hita habaranion asa unang sappe taulahon i. Jadi ikkon berupaya do hita sian nasa gogotta lao memaappon donganta. Alana molo taulahon i, gabe las ma roha ni Jahowa.
Nang pe adong parbadaan di si Barnabas dohot si Paulus, alai toktong do setia nasida melayani Jahowa. Diboan si Barnabas ma si Markus, markapal ma nasida tu Siprus jala marbarita disi. Molo si Paulus, ditogihon do si Silas. Diurupi Jahowa do nasida patoguhon akka dongan di huria, jala godang do na diurupi nasida mamboto barita na uli.
Sai muruk dope si Barnabas dohot si Paulus? Daong. Aha buktina? Tikki dibahen si Paulus surat tu akka dongan di huria, akka na denggan do dihatahon ibana taringot si Barnabas. Misalna, tikki dibahen si Paulus surat tu halak Korint, didok ibana do molo si Barnabas i ringgas karejo mangalului ngolu-ngolu asa boi toktong marbarita. (1 Kor. 9:6) Si Paulus pe dang muruk be tu si Markus. Misalna, tikki dibahen si Paulus surat tu akka dongan di huria, dijujui ibana do nasida asa denggan manjalo si Markus “keluarga ni si Barnabas”. (Kol. 4:10, 11) Jadi nang pe dang rap marbarita be si Paulus dohot si Barnabas, alai tetap do bersahabat nasida. Torus do si Barnabas marbarita na uli jala patoguhon akka donganna sian nasa gogona. Jala tikki rap saulaon dohot si Markus, pasti sai dilatik si Barnabas do ibana asa lam denggan melayani Jahowa dohot mangurupi akka dongan. Di pasal na mangihut, lao tabahas ma songon dia do si Markus patuduhon habaranion.
Jaha ma ceritana di:
Na lao dibahas:
Boha do cara ni si Barnabas patuduhon habaranion?
Bagas ma Parsiajari
1. Halak Lepi do si Barnabas. Mangihutton Patik, dang adong tano parbagianan ni halak Lepi. Alai boasa boi adong ladang ni si Barnabas? (4 Mus. 18:20; Ul. 4:36, 37; w98 15/4 20 ¶4, surat na di toru-wcgr)
2. Boasa didok molo si Barnabas i sahalak apostel? (Ul. 14:14; it “Si Barnabas” ¶3-wcgr)
3. Di Siprus, marbarita do si Paulus dohot si Barnabas tu sahalak bawa na margoar si Sergius Paulus. Di bukku Ulaon ni Apostel, didok si Lukas do molo si Sergius Paulus on sahalak “gubernur” manang “prokonsul”. Boasa sittong na didok si Lukas i? (Ul. 13:7, 12; it “Siprus” ¶6-wcgr) A
Bank of Cyprus Cultural Foundation Collection
Gambar A: Sada koin na patuduhon gambar ni si Klaudius. Ibana do na mamaretta Rom tikki ro si Barnabas dohot si Paulus tu Siprus. Di koin i dipaboa do tong molo si Klaudius i sahalak prokonsul manang gubernur di luat i
4. Boasa dang heran hita tikki dibahen halak Listra pelean lao menyambut si Barnabas dohot si Paulus? (bt 97, kotak)
Pikkirhon ma Aha Parsiajaranna
Songon dia do hita boi patuduhon haburjuon songon si Barnabas?
Tikki gabe misionaris si Barnabas dohot si Paulus, ra si Barnabas do na mangatur pardalanan ni nasida na parjolo. Alai di pudian ni ari, si Paulus do na unggodang mandapot tanggung jawab sian si Barnabas. Nang pe songon i, dang gabe cemburu si Barnabas tu si Paulus. Songon dia do hita boi maniru si Barnabas? B
Gambar B
Songon dia do caramuna maniru habaranion ni si Barnabas?
Rimangi ma
Sian kisah on, aha do na boi huparsiajari taringot Jahowa?
Aha do hubungan ni kisah on tu janji ni Jahowa taringot Paradeiso?
Boasa las rohamuna ala dohot si Barnabas dipillit lao mamaretta rap dohot Kristus di surgo?
Ida ma Muse on
Sian contoh ni si Barnabas dohot si Paulus, boasa boi pos rohatta na boi do halak na berbeda kepribadianna rap saulaon?
“Olo do Hamu Pasaehon Parsoalan jala Mardame?” (w17.06 28-31)
Di video on, tonton ma songon dia dua donganta bawa maniru si Barnabas dohot si Paulus tikki pasaehon parsoalan.