TIKKI NAEK ARGA NI SITUHORON

Puas ma tu na Adong di Hamu

Molo puas sasahalak tu na adong di ibana, mura ma ibana menyesuaihon diri. Tikki muba pe situasina boi ma ibana mambahen penyesuaian asa unang unggodang pengeluaranna sian penghasilanna.

BOASA IKKON PUAS HITA

Sahalak psikolog na margoar si Jessica Koehler mandok, positif do cara marpikkir ni halak na puas tu na adong di ibana. Jala dang pola olo nasida marlate ni roha. Dang songgot rohatta mambege hata ni psikolog i. Alana molo puas sasahalak tu na adong di ibana, dang olo be ibana marsak mamikkiri ari sogot jala gabe marlas ni roha ma ibana. Jala molo taida pe adong do halak na boi marlas ni roha nang pe dang godang hepengna. Alana dang holan hepeng na mambahen nasida marlas ni roha, alai las do tong roha ni nasida molo adong tikkina rap dohot keluargana dohot akka donganna.

“Molo adong sipanganon dohot pakkeatta, las ma rohatta disi.”—1 Timoteus 6:8.

NA BOI DIULAHON

Unang ma banding-bandingkon dirimuna tu halak na asing. Molo dibanding-bandingkon hamu ngolumuna tu ngolu ni halak na ussonang sian hamu, boi do gabe dang puas be hamu jala gabe late ma rohamuna tu halak na asing. Hape belum tentu ussonang ngolu ni nasida sian hamu. Alana godang do halak hira na mora idaon, hape sasittongna godang hian utangna. Songon on ma na didok si Nicole na tinggal di Senegal, “Dang ikkon godang artakku asa boi au marlas ni roha. Molo puas au tu na adong di au pasti marlas ni roha do au nang pe unggodang arta ni halak sian au.”

Coba ma on: Unang ma ida iklan manang postingan ni halak na holan naeng patudu-tuduhon hamoraon manang ngolu na sonang.

“Nang pe godang arta ni sasahalak, dang sian artana i ngoluna.”—Lukas 12:15.

Bersyukur. Molo jotjot sasahalak bersyukur pasti puas do ibana tu na adong di ibana jala dang sai lalap hurangan be ibana. Songon on ma na didok si Roberton sian Haiti, “Hubahen do tikkiku lao mamikkiri haburjuon na dipatudu akka halak tu au dohot tu keluargakku. Dung i hudokkon ma mauliate tu nasida. Huajari do tong anakku na marumur ualu taon asa mandok mauliate tikki manjalo manang aha pe sian halak.”

Coba ma on: Suratton ma akka aha na boi disyukuri hamu ganup ari. Misalna boi do hamu mandok mauliate ala sehat hamu, ala kompak hamu na sakeluarga, ala adong sahabatmuna, manang ala mangida parbonom ni mataniari.

“Halak na marlas ni roha, torus do songon halak na marpesta.”—Poda 15:15.

Dang sai mura asa puas tu na adong di hita. Alai molo berupaya hita asa puas, pasti marlas ni roha do hita. Dang boi on tuhoron ni hepeng.