TIKKI NAEK ARGA NI SITUHORON

Burju ma tu Halak na Asing

Molo susa do ngolumuna, olo do ra didok rohamuna dang mungkin be hamu boi mangurupi halak na asing. Alai sebenarna godang do manfaatna molo burju hamu tu halak na asing di situasi na songon i. Nang pe ikkon hemat hamu, tetap do boi hamu mangurupi halak na asing.

BOASA IKKON BURJU HITA TU HALAK NA ASING

Nang pe holan otik na boi taulahon lao mangurupi halak na asing, boi do gabe tamba las ni rohatta jala lam percaya diri ma hita. Piga-piga dokter mandok tamba do sehat ni dagingta dohot pikkiranta molo murah hati hita tu halak na asing. Misalna boi do i mangorui arsak ni rohatta, boi do i mambahen hita gabe dang mura stres, dang darah tinggion, dang marngilutan be dagingta manang marsahit. Jala boi do i mambahen lam renges hita modom.

“Umlas do roha ni halak na mangalehon sian na manjalo.”—Ulaon ni Apostel 20:35.

Molo dang holit hita tu halak na asing jala sai rade mangurupi nasida, dang gabe hira na so tabo be perasaanta tikki diurupi nasida. Songon i ma na dihilala si Howard na tinggal di Inggris. Didok ibana, “Ala dang holit hami saleleng on tu akka dongan jala sai rade mangurupi nasida, dang gabe hira na so tabo be pakkilalaakku dohot istrikku tikki diurupi nasida.” Memang dang berharap halak na murah hati asa dibalos haburjuon ni nasida. Alai molo murah hati sasahalak pasti godang do donganna na olo mangurupi ibana tikki susa.

“Sai lehon hamu ma tu na asing aha na adong di hamu, asa dilehon nasida tu hamu manang aha na adong di nasida.”—Lukas 6:38.

NA BOI TAULAHON

Mangalehon sian na tolapmuna. Boi do hamu mangalehon tu halak na asing nang pe saotik. Misalna mangalehon sipanganon, nang pe dang sipanganon na arga. Songon i do na diulahon si Duncan dohot keluargana na tinggal di Uganda. Nang pe pogos nasida, boi do nasida patuduhon kemurahan hati. Didok si Duncan, “Tiap ari Minggu, sai adong do halak na hutogihon hami asa rap mangan di jabu nang pe dang arga sipanganonna. Alai gabe boi ma hami rap bergaul.”

Alai ikkon masuk akkal do hamu tikki mangurupi halak na asing. Unang ma gabe hurang kebutuhan ni keluargamuna alani mangurupi halak na asing.—Job 17:5.

Coba ma on: Lehon ma sipanganon manang siinumon tu sasahalak. Dang ikkon sipanganon manang siinumon na arga dilehon hamu. Molo adong barangmuna na so digunahon be, lehon ma i tu dongan manang tu tetangga na makkaporluhon i jala na olo mamakke i.

Mangurupi halak na asing. Dang holan hepeng na boi dilehon hamu lao mangurupi halak na asing. Alai boi do dilehon hamu tikkimuna dohot gogomuna lao mangurupi. Jala boi do tong hatatta patoguhon halak na asing. Alani i unang ma maila hamu lao mamuji donganmuna manang mandok na dihaholongi hamu nasida.

Coba ma on: Urupi ma donganmuna padenggatton jabuna manang mangulahon karejona di jabu. Boi do muse dikirim hamu kartu lao mandok mauliate tu nasida, manang mangirim pesan lao patuduhon na parduli hamu tu nasida.

Pasti tamba do las ni rohamuna molo berupaya hamu burju tu halak na asing.

“Unang ma lupa hamu mangulahon akka na denggan jala urupi hamu ma na asing.”—Heber 13:16.

Suami istri na manapu halaman ni sahalak borua na matua. Dilehon borua na matua i do siinumon tu nasida.