Cara Mancetak Publikasi na Lam Sederhana na Marlaba tu “Saluhut Jolma”

Lomo do roha ni Jahowa asa ‘saluhut jolma boi mandapot parbinotoan na bagas taringot hasittongan’. (1 Timoteus 2:3, 4) Alai adong marratus bahasa na dipakke akka halak di portibi on, termasuk akka dongan dohot akka halak na tajuppangi tikki marbarita. Alani i ganup taon dicetak hami ma hira-hira 2 miliar publikasi di marratus bahasa. Jadi aha ma naung diulahon hami asa bijak mamakke sumbangan tikki mancetak akka publikasi i di marragam bahasa?

Lam Otik Inganan Percetakanna, Alai Lam Canggih do Peralatanna

Saleleng taon 1980-an, di lobi sian 40 luat do dicetak hami sude majalahnami. Alai berupaya do hami asa lam denggan cara kerjanami. Hasilna holan sian 9 luat ma saonari hami mancetak sude publikasinami. Jala tamba ma bahasa ni pubikasitta na dicetak, gabe 6 hali loppit ma godangna. Boasa boi dicetak hami publikasi di unggodang bahasa, hape holan di 9 luat nama inganan percetakannami? Sada faktor na penting ala adong peralatan na lobi canggih.

Ala nga adong mesin cetak na baru, gabe ukkatop jala unggodang ma publikasi na boi dicetak hami. Molo mamakke mesin cetak na sebelumna, tikki nga sae dicetak hami sada publikasi, porlu do godang tikki lao paradehon mesin cetak i asa boi dipakke muse lao mancetak publikasi na asing. Alai molo mamakke mesin cetak na baru on, gabe opat hali loppit ukkatop ma tikki na dihaporluhon lao paradehon mesin i asa boi dipakke muse lao mancetak publikasi na asing. Gabe ukkatop jala unggodang ma karejo na boi dipasae hami, termasuk ma i mancetak akka publikasi di bahasa na holan otik halak na mamakke bahasa i. Alai dung mancetak ganup publikasi na baru, ikkon digatti do plat cetakna. Di bagasan sataon na parpudi on, habis do hira-hira 33 miliar rupiah holan lao manuhor plat cetak. Jadi asa boi menghemat biaya, dipakke hami ma mesin cetak digital molo holan lao mancetak saotik publikasi. Ala mamakke teknologi laser do mesin cetak digital on, gabe boi ma holan saotik biaya na dipakke lao mancetak publikasi na so pola godang. Alana dang porlu mesin on mamakke plat cetak.

Saleleng tolu taon na parpudi on, lobi sian 164 miliar rupiah ma biaya na dipakke hami lao mambahen asa lam canggih mesin cetak dohot mesin jilidnami na adong di liat portibi on. Saonari taida ma jo perbandingan taringot akka mesin na dipakke lao mambahen Bibel. Najolo dung dicetak sada Bibel, porlu do diulahon 40 tahap nai. Termasuk ma i manjahit, mamotong, merapihon, mangamplas, dohot mambahen dekorasina. Jala ikkon dipapinda hami do Bibel i sada-sada sian sada mesin tu mesin na berikutna. Saonari dung adong mesin na baru, gabe boi ma dipasada piga-piga tahap di bagasan sada mesin. Alani i holan 10 tahap nai nama na dihaporluhon dung dicetak sada Bibel. Hasilna moru ma lobi sian 55 persen parkarejo na dihaporluhon lao mambahen Bibel. Songon di kantor cabang Jepang, najolo 2.000 Bibel ma na boi dijilid di bagasan 8 jom. Alai saonari boi do dijilid nasida hira-hira 35.000 Bibel di bagasan 8 jom!

Lam Otik Barang na Disippan, Lam Otik ma Pengeluaran

Ala dipakke hami peralatan na lobi canggih, gabe unggodang ma muse hepeng na boi dihemat hami. Misalna ala otik-otik nama saonari publikasi na dicetak hami, gabe godang ma moru pubikasi na disippan di inganan percetakan. Songon on ma na didok si Gary na melayani di kantor cabang Amerika Serikat, “Di mulana sukkun-sukkun do rohakku, boasa ma gabe otik-otik dicetak publikasitta jala jotjot dicetak. Menuruthu dumenggan do molo pittor godang publikasitta i dicetak. Dung otik-otik dicetak hami publikasitta jala unjotjot, tamba do lobi sian 900 juta rupiah biaya manuhor plat dohot harotas di bagasan sataon. Alai boi do moru biaya manippan harotas dohot publikasitta lobi sian 25 miliar rupiah di bagasan taon i!” Gabe boi ma biaya na dihemat i dipakke hami tu kebutuhan na asing, misalna pajongjokkon akka Bale Harajaon manang lao gabe bantuan kemanusiaan.

Ala lam otik barang na disippan, gabe lam godang ma ruangan na boi dipakke di piga-piga kantor cabang. Jala gabe boi ma akka ruangan i dipakke tu kebutuhan na asing. Ala holan di piga-piga negara nama saonari inganan percetakan, gabe boi ma diorui hami balga ni akka kantor cabang na lao dipajongjong. Misalna di taon 2018, dipapinda ma inganan percetakan kantor cabang Inggris Raya tu percetakan kantor cabang Eropa Tengah dohot kantor cabang na asing. Gabe boi ma marmiliar biaya na dihemat tikki pajongjokkon kantor cabang na baru di Chelmsford, Inggris.

“Diingot Ho do Hape Au!”

Alai na paling penting ala nga sederhana be saonari caratta mancetak publikasi, gabe boi ma lam godang halak na taurupi asa jonok tu Jahowa. Boi ma saonari hita mancetak akka publikasi tu unggodang bahasa, bahkan tu bahasa na holan otik publikasi na dicetak. Misalna, holan hira-hira 35.000 halak do na marbahasa Wallisian di Kaledonia Baru, Wallis, dohot di Futuna. Alai di bulan Agustus 2024, dirilis do Bibel Hata ni Debata tu Akka Jolma na Naeng Mangolu di Tano na Imbaru versi lengkap di bahasa Wallisian. Songon on ma na didok si Selafina sahalak penyiar na marbahasa Wallisian, “Saleleng on Bibel marbahasa Prancis do na hujaha, alai dang huattusi. Jadi tikki hujalo hami Bibel di bahasa Wallisian las hian ma rohanami, sappe manetek ma ilukku. Martangiang ma au tu Jahowa, ‘Ale Jahowa, diingot Ho do hape au! Dang dibeda-bedahon Ho hape jolma!’”

Nang pe dang sahat tu 500.000 halak na marbahasa Sanga di Republik Demokratik Kongo, alai dibahen do bukku Mangolu Saleleng ni Lelengna di bahasa i. Songon on ma na didok si Josué na bergabung tu huria marbahasa Sanga, “Sebelum adong bukku Mangolu Saleleng ni Lelengna di bahasa Sanga, maol do au naeng patorakkon sada hata manang istilah tu parsiajar Bibelhu. Nang pe nga hupatorang i tu ibana, tetap do maol ibana mangattusi isi ni bukku i. Alai dung adong bukku on di bahasa Sanga, las hian ma rohanami. Gabe boi ma saonari diattusi parsiajar Bibelhu isi ni bukku i. Jala dang porlu be au marganjang-ganjang lao patorakkon i tu ibana.”

Saonari unggodang do bahasa na dipakke di akka publikasinami asa boi unggodang halak na manjaha i. Alani akka sumbanganmuna do umbahen na boi dibahen hami songon i, termasuk ma sumbangan na dilehon hamu marhite situs donate.jw.org. Mauliate ma tu kemurahan hatimuna.