Ise do Istri ni si Kain?

Alus ni Bibel

Si Kain do anak siakkangan ni jolma na parjolo, i ma si Adam dohot si Hawa. Mangoli tu ibotona manang tu keluargana sandiri do ibana. Boasa boi didok songon i? Taida ma aha na didok Bibel taringot si Kain dohot keluargana.

Na didok Bibel taringot si Kain dohot keluargana

• Pinoppar ni si Adam dohot si Hawa do sude jolma. Bibel mandok, “Sian sada jolma [Adam] do dibahen Ibana sude bangso na mangingani saluhut portibi on.” (Ulaon ni Apostel 17:26) Jala si Hawa, istri si Adam do na gabe “omak ni sude jolma na mangolu.” (1 Musa 3:20) Pasti pinoppar ni si Adam dohot si Hawa do na gabe istri ni si Kain.

• Si Kain do anak na parjolo jala si Habel anak na paduahon na ditubuhon si Hawa. (1 Musa 4:1, 2) Dung dipamate si Kain anggina, diusir Jahowa do ibana. Alai didok si Kain ma, “Molo adong na pajuppang dohot au, pamateonna ma au.” (1 Musa 4:14) Mabiar tu ise do si Kain? Bibel mandok, “maranak marboru do si Adam”. (1 Musa 5:4) Olo do ra mabiar si Kain tu gelleng ni si Adam dohot si Hawa na asing na naeng pamatehon ibana.

• Tikki baru-baru ditoppa jolma, somal do mangoli manang muli tu keluargana sandiri. Misalna mangoli tu ibotona do si Abraham, alai dang saomak nasida. (1 Musa 20:12) Marratus taon dung mate si Kain, baru ma diorai halak mangoli manang muli tu keluargana sandiri, i ma na dipaboa di Patik ni si Musa. (3 Musa 18:9, 12, 13) Najolo molo tung pe muli manang mangoli sasahalak tu keluargana sandiri, dang gabe cacat gellengna songon na jotjot masa saonari.

• Sittong do hatorangan na dipaboa Bibel taringot si Adam, si Hawa, dohot keluarga ni nasida. Dang holan si Musa na manuratton tarombo ni si Adam, alai dohot do tong ahli sejarah songon si Esra dohot si Lukas na manuratton i. (1 Musa 5:3-5; 1 Kronika 1:1-4; Lukas 3:38) Panurat ni Bibel na asing pe hea do mangenet cerita taringot si Kain.—Heber 11:4; 1 Johannes 3:12; Judas 11.