Ise do Sasittongna Malaikat i?
Alus ni Bibel
Umbalga do gogo dohot huaso ni malaikat manang suru-suruan sian jolma. (2 Petrus 2:11) Di surgo do inganan ni nasida. Disi do tong inganan ni Debata dohot Jesus. Dang boi taida akka na tinggal di surgo jala ussangap do surgo sian alam semesta on. (1 Raja-Raja 8:27; Johannes 6:38) Jadi dang boi taida akka malaikat.—1 Raja-Raja 22:21; Psalmen 18:10.
Sian dia do asal ni malaikat?
Didok Bibel Jesus do na “parjolo ditoppa sian saluhutna”. Jala dipakke Debata do Jesus lao manoppa akka malaikat. Bibel mandok, “Marhite ibana [Jesus] do ditoppa saluhut na di surgo dohot na di tano on, na tarida dohot na so tarida,” termasuk ma akka malaikat. (Kolosse 1:13-17) Dang menikah akka malaikat jala dang marianakkon nasida. (Markus 12:25) Alai sada-sada do “akka anak ni Debata na sittong” i ditoppa Debata.—Job 1:6.
Sebelum ditoppa Debata tano on, nungnga leleng ditoppa Debata akka malaikat. Tikki nga sae ditoppa Debata tano on, “marsurak marlas ni roha” do akka malaikat.—Job 38:4-7.
Sadia godang do jumlah ni akka malaikat?
Memang dang takkas dipaboa Bibel sadia godang jumlah ni akka malaikat, alai pasti godang do nasida. Misalna, tikki mandapot parnidaan Apostel Johannes, diida ibana do maratus juta malaikat.—Pangungkapon 5:11.
Adong do goar ni akka malaikat? Sarupa do sifat ni akka malaikat?
Adong do goar ni akka malaikat. Misalna disurat do di Bibel dua goar ni malaikat, i ma si Mikhael dohot si Gabriel. (Daniel 12:1; Lukas 1:26)a Akka malaikat na asing pe adong do goarna, alai dang olo nasida paboahon goarna i.—1 Musa 32:29; Panguhum 13:17, 18.
Marragam do sifat ni akka malaikat. Jala boi do nasida makkatai tu malaikat na asing. (1 Korint 13:1) Boi do nasida marpikkir jala mambahen puji-pujian tu Debata. (Lukas 2:13, 14) Diloas do nasida mamillit naeng mangulahon na sittong manang na sala. Buktina adong do piga-piga malaikat na mamillit mangihutton Sibolis mangalo Debata.—Mateus 25:41; 2 Petrus 2:4.
Sarupa do tugas ni akka malaikat?
Dang sarupa. Misalna si Mikhael do pamimpin ni akka malaikat. Umbalga do gogo dohot huasona sian malaikat na asing. (Judas 9; Pangungkapon 12:7) Massai penting do tugas ni serapim. Martugas di jonok ni tahta ni Jahowa do nasida. (Jesaya 6:2, 6) Akka kerubim pe penting do tugasna jala istimewa. Misalna disuru Debata do akka kerubim manjaga dalan masuk tu Taman Eden, dung diusir si Adam dohot si Hawa sian i.—1 Musa 3:23, 24.
Diurupi akka malaikat do akka jolma?
I do. Saonari pe dipakke Debata do akka malaikat na setia lao mangurupi akka jolma.
Disuru Debata do akka malaikat manogu-nogu akka naposona paboahon barita na uli taringot Harajaon ni Debata. (Pangungkapon 14:6, 7) Boi do on mangurupi parbarita dohot halak na mambege barita na uli i.—Ulaon ni Apostel 8:26, 27.
Dijaga akka malaikat do huria Kristen sian pengaruh ni halak na mangulahon na so sittong.—Mateus 13:49.
Ditogu-togu jala dijaga akka malaikat do akka halak na setia tu Debata.—Psalmen 34:7; 91:10, 11; Heber 1:7, 14.
Satokkin nai, lao marporang ma akka malaikat rap dohot Jesus Kristus lao mangaripasson halak na jahat.—2 Tessalonik 1:6-8.
Adong do malaikat na manjaga ganup halak?
Memang diurupi malaikat do akka halak na setia asa toktong togu haporseaon ni nasida tu Debata. Alai dang na gabe disuru Debata asa adong sada malaikat na manjaga ganup halak Kristen.b (Mateus 18:10) Dang dipadao malaikat sude sitaonon manang godaan sian naposo ni Debata. Alai didok Bibel tikki masa sitaonon tu hita, ‘patuduon ni Debata do dalan asa boi hita sabar’ jala marbisuk mangadopi sitaonon i.—1 Korint 10:12, 13; Jakobus 1:2-5.
Pandapot na sala taringot malaikat
Pandapot na sala: Burju do sude malaikat.
Na sasittongna: Didok do di Bibel adong “suru-suruan na jahat” dohot “akka suru-suruan na mardosa.” (Epesus 6:12; 2 Petrus 2:4) Sebelumna suru-suruan manang malaikat na burju do nasida. Alai ala diihutton nasida Sibolis mangalo tu Debata, gabe suru-suruan na jahat ma nasida.
Pandapot na sala: Dang boi mate malaikat.
Na sasittongna: Na lao dipamate Debata do akka suru-suruan na jahat termasuk ma i Sibolis.—Judas 6.
Pandapot na sala: Dung mate jolma gabe malaikat do nasida.
Na sasittongna: Dang jolma naung mate na gabe malaikat, alai ditoppa Debata do akka malaikat i. (Kolosse 1:16) Adong do jolma na lao dipahehe tu surgo. Jala dibahen Debata do nasida dang boi be mate salelengna. (1 Korint 15:53, 54) Gabe ussangap ma nasida sian akka malaikat.—1 Korint 6:3.
Pandapot na sala: Na lao mangoloi paretta ni jolma do akka malaikat.
Na sasittongna: Dang na lao mangoloi paretta ni jolma akka malaikat, alai mangoloi paretta ni Debata do nasida. (Psalmen 103:20, 21) Haru Jesus pe dang boi langsung mangido asa diurupi akka malaikat, alai ikkon jolo dipangido ibana do i tu Debata.—Mateus 26:53.
Pandapot na sala: Boi do hita martangiang tu malaikat mangido asa diurupi.
Na sasittongna: Bagian sian ibadatta do tangiang i, jadi holan tu Debata Jahowa do hita boi martangiang. (Pangungkapon 19:10) Jala holan di bagasan goar ni Jesus do hita martangiang tu Debata.—Johannes 14:6.
a Piga-piga terjemahan ni Bibel mamakke istilah “Lusiper” di Jesaya 14:12. Gabe dirippu akka halak ma Lusiper i goar ni malaikat na gabe Sibolis manang Setan. Alai molo di bahasa aslina i ma bahasa Heber, hata na dipakke di ayat on lapatanna “marsinondang”. Molo tajaha ayat na sebelumna gabe boi ma taboto taringot tu harajaon ni Babel do na dipaboa disi, dang taringot tu Sibolis manang Setan. Na lao dipaila Debata do harajaon ni Babel ala ginjang roha ni nasida. (Jesaya 14:4, 13-20) Jadi hata “marsinondang” disi, dipakke lao mangarehei pamarettaon ni Babel dung hancur nasida.
b Tikki dijaha akka halak cerita taringot malaikat na paluahon si Petrus sian penjara, gabe dirippu nasida ma memang adong do sada malaikat na gabe panjaga ni si Petrus. (Ulaon ni Apostel 12:6-16) Memang tikki ro si Petrus manjuppangi akka sisean na asing, adong do na mandok ‘suru-suruan ni [si Petrus]’ do na ro i. Didok nasida pe songon i dang na lao patuduhon na adong malaikat panjaga ni si Petrus. Alai dirippu nasida do i malaikat na mangurupi si Petrus jala na soarana mirip songon si Petrus.