Andigan do Marujung Portibi on?

Alus ni Bibel

Asa taboto andigan do marujung portibi on, ikkon jolo taattusi do lapatan ni hata “portibi” na adong di Bibel. Hata koʹsmos di bahasa Junani, biasana diterjemahon gabe “portibi”. Jotjot do hata on dipakke lao paboahon taringot akka halak na so mangulahon lomo ni roha ni Debata. (Johannes 15:18, 19; 2 Petrus 2:5) Sipata, dipakke do tong hata koʹsmos on lao paboahon taringot akka sistem na adong di portibi on, songon sistem perdagangan, politik, dohot agama.​—1 Korint 7:​31; 1 Johannes 2:​15, 16.a

Aha do lapatan ni hata “ujung ni portibi on”?

Hata “ujung ni portibi on” na adong di piga-piga terjemahan ni Bibel, boi do tong diterjemahon gabe “panutup ni jaman on”. (Mateus 24:3) Lapatan ni hata on dang berarti na lao hancur tano on manang sude jolma di portibi on. Alai akka sistem na adong di portibi on do na lao marujung.​—1 Johannes 2:​17.

Dipaboa do di Bibel, “na lao hancur do halak na jahat” asa boi halak na burju marlas ni roha di tano on. (Psalmen 37:​9-​11) Na lao dipamate do nasida di tikki “hasusaan bolon”. Jala ujung ni hasusaan bolon i ma porang Armagedon.​—Mateus 24:21, 22; Pangungkapon 16:14, 16.

Andigan do marujung portibi on?

Jesus mandok, “Taringot tu ari dohot jamna dang adong na mamboto i, nang akka suru-suruan na di banua ginjang, nang anak i, holan Ama i do na mamboto.” (Mateus 24:36, 42) Jala didok ibana na lao masa ma i ‘di tikki na so panagaman’.​—Mateus 24:44.

Nang pe dang taboto andigan ari dohot jamna, alai dipaboa Jesus do akka “tanda”, manang akka na lao masa na boi mangurupi hita mamboto di tikki andigan do marujung portibi on. (Mateus 24:​3, 7-​14) Di Bibel didok do i “panutup ni jaman on” dohot “ari parpudi.”​—Daniel 12:4; 2 Timoteus 3:​1-5.

Adong do na tinggal molo nungnga marujung portibi on?

Adong. Hot do anggo tano on. Alana Bibel mandok, “dang na lao meret i sian ingananna saleleng ni lelengna.” (Psalmen 104:5) Jala didok Bibel, “Lehononna do tano on gabe parbagianan ni halak na tigor marroha. Jala mangolu ma nasida disi saleleng ni lelengna.” (Psalmen 37:29) Pasauton ni Jahowa ma tujuanna manoppa tano on di mulana lao mambahen tano on gabe:

• Paradeiso.​—Jesaya 35:1; Lukas 23:43.

• Aman jala sonang ma ngolu ni sude jolma.​—Mika 4:4.

• Marlas ni roha do sude jolma alani halojaonna.​—Jesaya 65:21-​23.

• Dang adong be na marsahit manang na matua.​—Job 33:25; Jesaya 33:24.