Sala do Molo Martato Au?

• Boasa adong na lomo rohana martato?

• Aha do na ikkon hupikkirhon?

• Prinsip ni Bibel na dia do na ikkon hupikkirhon?

Boasa adong na lomo rohana martato?

Sahalak bawa na poso na margoar si Ryan mandok, “Molo menuruttu, karya seni na massai bagak do tato i.”

Tikki dibege hamu pandapot ni sasahalak na mambahen tato, ra gabe tarpikkir do hamu naeng dohot mambahen tato. Misalna sahalak remaja na margoar si Jillian mandok, “Tikki sikkola au, adong sahalak donganku borua na mate omakna tikki gelleng dope ibana. Jadi dung balga ibana, ditato ibana ma goar ni omakna di pudi ni leherna. Menuruttu, alasan na denggan do i.”

Manang aha pe alasanna, ikkon jolo denggan do dipikkirhon ho sebelum mambahen tato. Alana, salelengna do i lokkot di kulitmu. Molo naeng martato ho, aha ma na ikkon dipikkirhon ho? Prinsip ni Bibel na dia ma na boi mangurupi ho tikki naeng mambahen keputusan?

Aha do na ikkon hupikkirhon?

Aha do bahayana tu kesehatan? Situs Mayo Clinic mandok, “Tikki mambahen tato, gabe lukka do kulit. Jadi boi do gabe infeksi kulit manang adong sahit na asing. Sipata, olo do gabe adong benjolan-benjolan na didok granuloma na muncul di sekitar ni tato i. Tato pe boi do gabe mambahen keloid. Keloid, i ma bekas ni lukka na menonjol akibat jaringan na berlebihan na adong di bekas ni lukka i.” Didok do muse di situs i, “Molo alat na dipakke mambahen tato i gabe tercemar ala hona mudar ni halak na marsahit, boi do hamu gabe hona sahit na menular marhite mudar.”

Aha do pengaruh ni tato tu reputasimuna? Biasana, boi do dinilai halak hamu sian penampilanmuna. Boi do hamu dianggap halak naung dewasa jala na boi dihaporseai, manang sebalikna. Sahalak remaja na margoar si Samantha mandok, “Molo huida halak na martato, pittor huanggap do ibana halak na karejona holan na minum-minum jala dang suman pangalahona.”

Si Melanie na marumur 18 taon mandok, “Menuruttu, molo martato ho gabe hira ditutupi ho ma haulionmu. Molo martato ho, hira na ditabunihon ho ma ise ho na sasittongna.”

Torus do lomo roham mangida tato i? Molo tamba mokmok sasahalak manang lam matua, boi do gabe muba bentuk ni tato na adong di ibana. Sahalak bawa na poso na margoar si Joseph mandok, “Hea do huida tato naung leleng hian dibahen, gabe roa do i idaon.”

Si Allen na marumur 21 taon mandok, “Lam leleng tato, boi do i gabe ketinggalan jaman. Na dianggap ho saonari penting dung i dibahen ho gabe tato, haduan olo do gabe dang penting be i dianggap ho.”

Tutu do na nidok ni si Allen i. Lam tamba umur ni sasahalak, boi do gabe muba pandangan, selera, dohot aha na dihalomohon rohana. Alai molo tato i daong. Sahalak borua na poso na margoar si Teresa mandok, “Tato boi do mambahen au gabe mangingot akka na so penting na huhalomohon najolo. Dang olo au mangulahon sada ulaon na gabe husolsoli di pudian ni ari.”

Prinsip ni Bibel na dia do na ikkon hupikkirhon?

Sebelum mambahen keputusan, ikkon jolo denggan do i dipikkirhon halak naung dewasa. (Poda 21:5; Heber 5:14) Taringot mambahen tato, pikkirhon ma akka prinsip on:

• Kolosse 3:20: “Hamu akka dakdanak, oloi hamu ma natua-tuamuna, ai i do na dihalomohon Debata.”

  Rap tinggal dohot natua-tuam dope ho? Molo ido, aha do akibatna molo dang dioloi ho nasida?

• 1 Petrus 3:3, 4: “Unang ma sian luar dipabagak-bagak hamu dirimuna, marhite mandandan obuk, mamakke perhiasan na sian mas, manang mamakke pakkean na arga. Alai rohamuna i ma pabagak hamu marhite perhiasan na so olo sega, i ma roha na lambok jala na dame.”

  Menurutmu, boasa didok Bibel massai penting pabagak roha?

• 1 Timoteus 2:9: “Akka borua, dipakke ma pakkean na tama mardongan toruk ni roha dohot bisuk.”

  Aha do maksudna “toruk ni roha”? Jala boasa undenggan “toruk ni roha” sian tato?

• Rom 12:1: “Pelehon hamu ma dirimuna gabe pelean na mangolu, na badia, jala na palasson roha ni Debata. Marhobas ma hamu tu Ibana sian nasa pikkiranmuna.”

  Aha pe na dibahen ho tu dagingmu, adong do hubunganna tu Debata. Boasa?

Ala mamikkirhon akka naung dipaboa nakkin, godang do halak dang olo mambahen tato. Gabe diboto nasida ma, adong do na dao undenggan sian tato. Si Teresa na dipaboa nakkin mandok, “Molo adong hata manang motto na menurutmu denggan, ulahon ma i. Manang molo adong halak na dihaholongi ho, paboa ma tu ibana na holong roham tu ibana. Unang pola bahen i gabe tato.”