Dialusi Debata do Tangiakku?

Na didok Bibel

Ido. Bibel dohot pengalaman ni akka halak patuduhon, tutu do Debata mangalusi tangiang. Bibel mandok, “Dilehon Ibana do sude na dihaporluhon akka halak na makkabiari Ibana. Ditangihon Ibana do angguk-angguk ni nasida na mangido asa diurupi, jala dipalua do nasida.” (Psalmen 145:19) Alai, aha na diulahon hamu tong do manottuhon lao dialusi Debata do tangiangmuna i manang na dang.

Na dipangido Debata ikkon diulahon

• Tangiangmuna ikkon dipasahat tu Debata Jahowa, dang tu Jesus, santo, suru-suruan, manang patung. Holan Jahowa do “Sitangihon tangiang”.—Psalmen 65:2.

• Ikkon sadalan do tangiangmuna tu lomo ni roha ni Debata na dipaboa di Bibel.—1 Johannes 5:14.

• Martangiang marhite goar ni Jesus, artina porsea hamu tu Jesus dohot tu akka na binahenna. Didok Jesus, “Dang adong na boi ro tu Damang i molo so marhite au.”—Johannes 14:6.

• Martangiang ala porsea tu Debata. Molo dang pos dope rohamuna tu Debata, pangido ma asa lam tamba haporseaonmuna.—Mateus 21:22; Lukas 17:5.

• Martangiang sian ias ni roha jala patuduhon serep ni roha. Bibel mandok, “Nang pe sangap Jahowa, diparrohahon Ibana do halak na serep marroha.”—Psalmen 138:6.

• Dang menyerah. Didok Jesus do, “Sai pangido hamu ma, ai na lehononna do i tu hamu.”—Lukas 11:9.

Na so diparsoalhon Debata

• Suku manang bangsomuna. Didok di Bibel, ‘Na so marimbar do jolma di jolo ni Debata. Lomo do roha ni Debata mangida ganup halak na makkabiari Ibana jala na mangulahon na sittong, dang soal sian bangso na dia pe nasida.’—Ulaon ni Apostel 10:34, 35.

• Posisimuna tikki martangiang. Boi do hamu martangiang tikki hundul, marsinggang, manang jongjong.—1 Kronika 17:16; Nehemia 8:6; Daniel 6:10; Markus 11:25.

• Martangiang huhut marsoara manang di bagasan roha. Alana boi do dialusi Debata tangiang na so diboto halak na asing.—Nehemia 2:1-6.

• Balga do masalahmuna manang na dang. Lomo do roha ni Debata asa ‘dipasahat hamu sude holso ni rohamuna tu Ibana, ai diparrohahon do hamu.’—1 Petrus 5:7.