Surat sian Punguan na Mangaradoti Organisasi

Tu Akka Dongannami:

Di suratna tu huria Smirna, didok Jesus do, “Unang ma mabiar ho tu hasusaan na naeng sitaononmu.” (Pgk. 2:10) Dilehon Jesus do tu nasida sipaingot asa unang mabiar. Alai hata ni Jesus on, tong do marlakku tu hita saonari na mangolu di “ari ni Tuan”. (Pgk. 1:10) Saonari ma masa “tikki hasusaan” i. Alai dipatogu do rohanami tikki mangida akka naposo ni Jahowa di liat portibi on na toktong setia. Godang do sian hamu na menghadapi tantangan na manguji haporseaon. Alai tetap do hamu barani jala marhaporseaon tu Jahowa!—2 Tim. 3:​1-5.

Ikkon toktong do tapatogu haporseaotta jala unang mabiar. (Heb. 10:39) Memang dang sai mura mangulahon i, alana olo do ra adong tantangan manang penganiayaan na dihadapi hamu. Asing ni i, marragam be do akka sifatta. Adong na parila, adong na barani. Alai dang soal songon dia situasina, tabahen ma keputusan lao mangutamahon Jahowa jala mangulahon lomo ni rohana. Aha ma na boi mangurupi hita mangulahon i?

Boi do Bibel mangurupi hamu gabe barani. Alana godang do disi teladan sian akka bawa dohot borua na patuduhon habaranion. Jadi, dibahen hami do bukku on lao mangurupi hamu asa lam mura mangarimangi teladan ni nasida. Alani i, huhut dijaha hamu akka kisah ni nasida, tangiakkon ma tu Jahowa asa diurupi hamu mamikkirhon songon dia carana maniru teladan ni akka tokoh i di ngolumuna. Jala asa rade hamu lao menghadapi akka tantangan di ari na naeng ro. Pikkirhon ma muse songon dia Jahowa boi mangurupi hamu asa barani. Asing ni i, ida ma songon dia teladan ni nasida boi mangurupi hamu di piga-piga situasi on:

Mambahen penyesuaian. (Jak. 3:17) Rimangi ma teladan ni si Jonatan. Ra didok roha ni si Jonatan, ibana do na lao manggattihon si Saul, bapakna gabe raja. Hape si Daud do na dipillit Jahowa, jala dao do upposo si Daud sian si Jonatan. Nang pe songon i, didukung si Jonatan do keputusan ni Jahowa i. Toktong do ibana setia tu Jahowa jala barani.

Mangulahon lomo ni roha ni Jahowa, dang soal songon dia pandapot ni akka halak. (Heb. 11:​32-34) Rimangi ma muse teladan ni si Hanania, si Misael, dohot si Azaria. Dang olo nasida marsinggang jala marsomba tu patung. Bahkan tetap do nasida setia tu Jahowa, nang pe ikkon disappatton tu api na marsigorgor.

Paboahon hasittongan taringot Jahowa dohot Jesus tu akka halak. (Mat. 22:16) Rimangi ma teladan ni si Saulus na sian Tarsus. Godang do halak Jahudi na mendukung ibana lao menganiaya akka siihutton Jesus. Alai muba do si Saulus. Ujungna gabe halak Kristen do ibana, jala barani paboahon tu akka halak Jahudi na tutu do Jesus i Messias.

Sai anggiat ma bukku on boi mangurupi hamu asa lam barani jala marhaporseaon na togu. (Ps. 27:14) Alai, unang ma holan hamu na mandapot manfaat sian bukku on. Pakke hamu ma tong bukku on lao mangurupi keluargamuna dohot akka dongan di huria asa toktong barani mendukung Harajaon ni Debata. Sai dipasu-pasu Jahowa ma upayamuna i!