Pangungkapon
4 Dung salpu i, huida ma sada pintu na bungka di banua ginjang. Soara na parjolo mangkatai tu ahu hubege songon soara ni tarompet. Didok ma tu ahu, “Nangkok ma ho tuson, asa hupatuduhon tu ho angka na laho masa.” 2 Dung i, pintor digohi tondi parbadia ma ahu. Huida ma adong habangsa di banua ginjang jala adong na hundul di habangsa i. 3 Ibana na hundul di habangsa i marhillong songon batu jaspis dohot batu sardis* jala di humaliang ni habangsa i adong pelangi na songon jamrud* idaon.
4 Di humaliang ni habangsa i adong 24 habangsa. Huida ma adong 24 sintua na hundul di habangsa i marabit na bontar, jala di ulu ni nasida adong mahkota na sian mas. 5 Kaluar ma sillam, soara dohot ronggur sian habangsa i. Adong do pitu api na marnala-nala* di jolo ni habangsa i na manggombarhon pitu tondi parbadia ni Debata. 6 Di jolo ni habangsa i, adong ma muse na songon laut kaca na suman tu kristal.
Di tonga-tonga do habangsa i jala di humaliangna adong opat kerubim.* Gok do mata di daging ni kerubim i, di jolo nang di pudi. 7 Bohi ni kerubim na parjolo songon singa, bohi ni kerubim na paduahon songon lombu jantan, bohi ni kerubim na patoluhon songon jolma, jala bohi ni kerubim na paopathon songon lali na habang. 8 Ganup kerubim adong do onom habongna, jala gok do mata di sude habong ni nasida. Sai didok nasida do arian nang borngin, “Na badia, na badia, na badia do Debata Jahowa, na Sun Hinagogo, naung adong hian, na adong nuaeng, dohot na naeng ro.”
9 Ganup dipasahat kerubim i hasangapon, hamuliaon dohot hamauliateon tu Ibana na hundul di habangsa i, i ma Ibana na mangolu saleleng ni lelengna, 10 marsomba ma 24 sintua i tu jolo ni Ibana na hundul di habangsa i. Disomba nasida ma Ibana na mangolu saleleng ni lelengna i, jala disampathon nasida ma mahkota ni nasida tu jolo ni habangsa i huhut mandok, 11 “Ale Jahowa Debatanami, na tama do ho manjalo hasangapon, hamuliaon, dohot huaso. Ai ho do manompa saluhutna, jala alani lomo ni roham do umbahen na adong angka i jala tartompa.”