Pangungkapon
15 Dung i huida ma di banua ginjang sada nai tanda halongangan* na asing, na balga jala na mambahen longang. Adong pitu suru-suruan dohot pitu bala. On ma angka bala na parpudi, ai marhite i marujung ma rimas ni Debata.
2 Huida ma na songon laut kaca na marcampur api. Huida ma muse adong angka halak na jongjong di topi ni laut kaca i huhut maniop harpa na sian Debata. Nasida ma na manaluhon binatang buas i dohot patung ni binatang i. Jala nasida ma na so ditandai mamangke nomor ni goarna. 3 Diendehon nasida ma ende ni si Musa, i ma naposo ni Debata dohot ende ni Anak ni Biru-biru i, na mandok,
“Ale Jahowa Debata na Sun Hinagogo, na balga jala halongangan do angka ulaonmu. Ale Raja sisaleleng ni lelengna, na tigor jala na sintong do angka dalanmu. 4 Ise ma na so mabiar tu Ho ale Jahowa jala na so pasangaphon goarmu? Ai holan Ho do na marsihohot! Ro do saluhut bangso tu jolom jala manomba Ho, ai nunga patar angka parentam na tigor i.”
5 Dung i huida ma tarbungka bagas joro* na di tabernakel* na di banua ginjang. 6 Kaluar ma sian bagas joro i pitu suru-suruan dohot pitu bala. Marabit linen na ias jala na marhillong do nasida. Dialithon do ikat pinggang* na sian mas di andora ni nasida. 7 Dilehon sada sian opat kerubim i ma tu pitu suru-suruan i mangkuk na sian mas na marisi rimas ni Debata na mangolu saleleng ni lelengna. 8 Gok ma timus di bagas joro i alani hasangapon ni Debata dohot huasona. Ndang adong na boi masuk tu bagas joro i sahat tu na marujung pitu bala na sian pitu suru-suruan i.