Pangungkapon
10 Huida ma suru-suruan na asing na gogo turun sian banua ginjang. Di bagasan* ombun do ibana jala adong pelangi di ginjang ni uluna. Bohina songon mata ni ari jala patna songon tiang api. 2 Ditiop ibana do sada gulungan na gelleng naung bungka. Jongjong do ibana, patna siamun mandege laut jala patna hambirang mandege tano. 3 Gogo do soarana songon soara ni singa na marauang. Tingki marsoara ibana, tarbege ma soara ni pitu ronggur mangkatai.
4 Tingki mangkatai pitu ronggur i, naeng ma husurat na nidok ni nasida i. Alai hubege ma soara sian banua ginjang mandok, “Rahasiahon* ma angka na nidok ni pitu ronggur i, jala unang surathon angka i.” 5 Dung i, diangkat suru-suruan i ma tangan siamunna dompak banua ginjang. 6 Marsumpa ma suru-suruan i marhite Ibana na mangolu saleleng ni lelengna, na manompa langit dohot nasa isina, tano on dohot nasa isina, laut dohot nasa isina. Didok ma, “Ndang paleleng-lelengon ni Debata be!” 7 Alai tingki naeng dipalu suru-suruan na papituhon tarompetna,* digohi ma rahasia na badia na pinaboa ni Debata gabe barita na uli tu angka naposona, i ma angka panurirang i.
8 Dung i hubege ma muse soara sian banua ginjang mandok tu ahu, “Laho ma ho, buat ma gulungan naung bungka i, na di tangan ni suru-suruan na jongjong di laut dohot na di tano i.” 9 Laho ma ahu mandapothon suru-suruan i jala hupangido ma gulungan na gelleng i tu ibana. Didok ibana ma tu ahu, “Buat jala pangan ma i. Gabe paet do i di butuham, alai tonggi do i songon situak ni loba* di pamanganmu.” 10 Hubuat ma gulungan na gelleng i sian tangan ni suru-suruan i jala hupangan ma i. Tonggi do i songon situak ni loba di pamanganku alai gabe paet ma i di butuhangku. 11 Didok nasida ma tu ahu, “Ingkon manurirangi do ho muse taringot tu angka halak, bangso, bahasa, dohot angka raja.”