1 Timoteus

3 Tutu do hata on: Molo marsitutu sahalak baoa naeng gabe sintua, na lomo do rohana mandapot ulaon na denggan. 2 Unang ma adong siinsahan di sahalak sintua, holan sada tunggane boruna, boi mangarajai dirina, marbisuk, taratur,* burju manjalo tamu,* malo mangajari, 3 ndang parmabuk, ndang halak na kasar, alai parroha na dame, ndang parbada, ndang holongan di hepeng,* 4 denggan mamimpin keluargana, anakkonna pangoloi jala marpangalaho na denggan 5 (molo ndang boi sahalak baoa mamimpin keluargana, songon dia ma ibana boi mangaradoti huria ni Debata?), 6 ndang halak na baru porsea, asa unang ginjang rohana jala gabe diuhumi songon Sibolis. 7 Asing ni i, ingkon denggan do pandapot ni halak na di luar ni huria taringot tu ibana, asa unang diinsahi* halak ibana jala madabu tu jorat ni Sibolis.

8 Songon i ma nang angka parhobas, ingkon halak na martanggung jawab do nasida, ndang pargabus, ndang parmabuk,* ndang holongan di hepeng manang holan mangalului untung tu dirina sandiri, 9 alai halak na marsihohot tu rahasia na badia* na hombar tu haporseaon* i, di bagasan panggora ni roha na denggan.

10 Asing ni i, ingkon jolo diuji do nasida laho mamboto tama manang ndang nasida gabe parhobas. Molo ndang adong siinsahan di nasida, boi ma nasida gabe parhobas.

11 Songon i ma nang angka borua, ingkon halak na martanggung jawab do nasida, ndang olo paroa-roahon donganna, boi mangarajai dirina, jala marsihohot di saluhutna.

12 Ingkon sada do tunggane boru ni parhobas. Ingkon denggan do ibana mamimpin ianakkonna dohot keluargana. 13 Ai molo denggan baoa marhobas, denggan ma pandapot ni halak taringot tu ibana. Jala ndang adong be na mangambati ibana paboahon haporseaonna taringot tu Kristus Jesus.

14 Naeng do nian tibu ahu ro mandapothon ho. Alai husurathon do i sude tu ho 15 asa molo tung pe leleng ahu ro, nunga diboto ho songon dia marpangalaho di keluarga ni Debata, i ma huria ni Debata na mangolu i, na gabe tiang dohot fondasi ni hasintongan i. 16 Sasintongna, balga situtu do rahasia na badia taringot tu ulaon manomba Debata: ‘Gabe jolma do ibana tingki di tano on. Didok Debata do ibana sintong, dung dipahehe ibana tu banua ginjang jala gabe rap ma ibana dohot angka suru-suruan. Dibaritahon do taringot tu ibana di tonga-tonga ni angka bangso, dihaporseai di saluhut portibi on, jala diangkat do ibana tu banua ginjang di bagasan hasangapon.’