2 Tessalonik

3 Ujungna angka dongan, sai tangiangkon hamu ma hami asa hatop sahat hata ni Jahowa tu sude halak, jala asa marsangap hata i dijalo nasida songon na masa di tonga-tongamuna. 2 Laos tangiangkon hamu ma asa malua hami sian halak na kejam dohot na jahat, ai ndang sude halak olo porsea. 3 Alai boi do tahaporseai Tuan i, patoguonna jala linggomanna do hamu sian Sibolis.* 4 Asing ni i, pos do rohanami tu Tuan i taringot tu hamu, na ihuthononmuna do tudu-tudunami saonari nang di ari na naeng ro. 5 Sai anggiat ma ditogu-togu Tuanta i rohamuna asa dihaholongi hamu Debata jala asa marsihohot hamu mangoloi Kristus.

6 Saonari angka dongan, hupaboa hami ma tu hamu di bagasan goar ni Tuanta Jesus Kristus: Pasiding ma angka dongan na so taratur dohot angka dongan na so mangihuthon ajaran* naung jinalomuna* sian hami. 7 Hamu sandiri pe, diboto hamu do songon dia bahenonmuna laho maniru hami. Ai tongtong do hami taratur tingki rap dohot hamu. 8 Hugarar hami do sipanganon na huallang hami. Loja do hami karejo arian nang borngin, asa unang adong sian hamu na susa laho manarihon hami.* 9 Ndang na so marhak hami mambahen songon i, alai asa diihuthon hamu do sitiruon na hubahen hami. 10 Gariada, tingki rap dope hami dohot hamu, nunga hupaboa hami sipaingot on tu hamu, “Manang ise na so olo karejo, unang ma mangan ibana.” 11 Hubege hami do na adong di tonga-tongamuna halak na so taratur, na so olo karejo, jala na sai mangantoi urusan ni na asing. 12 Huparentahon jala hupodai hami do halak sisongon i di bagasan goar ni Tuan Jesus Kristus, asa karejo nasida mangalului na laho panganonna jala asa unang diantoi nasida urusan ni na asing.

13 Alai hamu ale angka dongan, unang ma marnaloja hamu mangulahon angka na denggan. 14 Manang ise na so mangoloi tudu-tudu na hupaboa hami di surat on, tandai hamu ma ibana, jala unang be mardongan hamu dohot ibana asa maila ibana. 15 Alai unang ma bahen hamu ibana songon musu, tongtong ma podai hamu ibana songon sahalak dongan.

16 Sai anggiat ma dilehon Tuan silehon dame i hadameon tu hamu di saluhutna. Anggiat ma didongani Tuan i hamu sude.

17 Ahu si Paulus, ahu sandiri do na manurathon tabe on. Sai songon i do hubahen di sude surathu, asa diboto hamu ahu do na manurat surat i.

18 Sai didongani asi ni roha ni Tuanta Jesus Kristus na mansai balga i ma hamu sude.