Epesus
5 Ala angka anak na dihaholongi Debata do hamu, tiru hamu ma Ibana 2 jala tongtong ma patuduhon holong, songon Kristus na mangkaholongi hita jala mangalehon dirina humongkop hita gabe songon pelean na angur tu Debata.
3 Unang ma hea dihatai hamu taringot tu seks na so patut,* angka ulaon na ramun,* dohot hahisapon. Ai ndang patut i tu angka halak na badia. 4 Songon i nang angka pangalaho na so umboto ila, angka hata na so marguna, manang angka gait-gait taringot tu na so hasea. Ai pantang do dohonon angka sisongon i. Alai hata hamauliateon tu Debata ma hatahon hamu. 5 Ai tangkas do diboto hamu, manang ise na mangulahon seks na so patut,* na mangulahon na ramun, manang na mangulahon hahisapon, dos songon halak na manomba gana-ganaan do i. Angka halak na mangulahon sisongon i, ndang parsidohot tu Harajaon ni Kristus dohot Debata.
6 Unang ma olo hamu dioto-otoi halak marhite angka hata na so marguna, ai angka sisongon i do na mambahen muruk Debata tu angka halak na so mangoloi Ibana. 7 Alani i, unang ma tiru pangalaho ni nasida.* 8 Ai di haholomon do hamu najolo, alai nunga di bagasan hatiuron hamu saonari ala nunga marsada dohot Tuan i. Alani i, marpangalaho ma hamu songon angka anak ni hatiuron. 9 Ai angka na denggan, na hombar tu lomo ni roha ni Debata, dohot na sintong do na ro sian hatiuron i. 10 Pastihon hamu ma angka na hinalomohon ni Tuhan.* 11 Unang be ihuthon angka pangalaho ni halak na di haholomon. Alai pinsang ma nasida. 12 Ai manaringoti angka na diulahon nasida di na buni pe, nunga hailaon bolon i. 13 Ai sude do tarida dibahen hatiuron i, alani i gabe tiur ma sude na dipataridahon i. 14 Alani i ma didok, “Dungo ma hamu angka na modom, jala hehe ma hamu angka na mate, asa dipatiur Kristus i hamu.”
15 Sai parrohahon hamu ma pangalahomuna. Unang ma hamu songon halak na so marbisuk, alai marbisuk ma hamu. 16 Denggan ma pangke tingkimuna,* ai mangolu di angka tingki na jahat do hita saonari on. 17 Alani i unang ma songon halak na so marroha hamu, alai sai lului ma lomo ni roha ni Jahowa. 18 Jala unang ma mabuk hamu alani anggur, ai sursar do ngolumuna bahenon ni i. Alai sai digohi tondi parbadia ma hamu. 19 Masipatoguan ma hamu marhite mangendehon psalmen, mamuji Debata dohot mangendehon ende puji-pujian. Endehon hamu ma puji-pujian tu Jahowa sian bagasan rohamuna. 20 Di bagasan saluhutna, mandok mauliate ma tu Debata Ama i di bagasan goar ni Tuanta Jesus Kristus.
21 Molo sangap hita tu Kristus i, unduk ma hita na sada tu na asing. 22 Unduk ma tunggane boru tu tunggane dolina songon tu Tuan i. 23 Ai tunggane doli do ulu ni tunggane boruna, dos songon Kristus ulu ni huria, na gabe sipalua ni daging i. 24 Songon huria na unduk tu Kristus i, ingkon unduk do tunggane boru tu tunggane doli ni nasida di saluhutna. 25 Hamu angka tunggane doli, sai haholongi ma tunggane borumuna songon Kristus na mangkaholongi huria i jala na mangalehon dirina humongkop i. 26 Dibahen Kristus do songon i asa boi pabadiaonna huria i, paiasonna di bagasan aek, i ma hata ni Debata. 27 Dung i, boi ma bagak huria i jongjong di jolona. Ai lomo do rohana badia huria i jala ndang martihas.*
28 Suang songon i ma, ingkon haholongan ni tunggane doli do tunggane boruna songon mangkaholongi diri ni nasida. Manang ise na mangkaholongi tunggane boruna, na mangkaholongi dirina do ibana. 29 Ndang adong baoa na marsogo ni roha tu dirina.* Dilehon ibana do dirina mangan jala dihaholongi do i, dos songon na niulahon ni Kristus tu huria i. 30 Ai daging ni Kristus do hita sude. 31 “Alani i, tadingkonon ni baoa ma amana dohot inana asa rap* dohot tunggane boruna, jala gabe sada ma nasida na dua.” 32 Mansai ringkot do rahasia na badia on. Sasintongna taringot tu Kristus dohot taringot tu huria i do na huhatai saonari. 33 Alai, ingkon haholonganmuna do tunggane borumuna songon mangkaholongi dirimuna. Jala tunggane boru ingkon sangap do bahenonna tu tunggane dolina.