Rom

3 Alani i, aha ma labana gabe halak Jahudi manang gabe halak na marsunat? 2 Mansai godang do labana. Na parjolo, ala tu nasida do dipasahat hata ni Debata. 3 Alai songon dia do molo deba sian halak Jahudi ndang halak na porsea? Na gabe so boi be tahaporseai Debata? 4 Tontu daong! Tung pe sude jolma pargabus, alai sai na sintong do Debata. Songon na nidok ni na tarsurat i, “Hatam patuduhon na sintong do Ho jala monang do Ho tingki diuhumi.” 5 Alai, songon dia ma dohononta, molo marhite pambahenanta na sala i gabe lam tangkas tarida na sintong Debata? Na so tigor do Debata molo diuhum Ibana hita? Songon i ma pandapot ni angka jolma. 6 Alai ndang sintong i! Molo ndang tigor Debata, songon dia ma Ibana boi manguhumi portibi on?

7 Molo huhatahon pe na so sintong jala alani i gabe patar ma hasangapon ni Debata, boasa ma pola dohonon ni Debata ahu pardosa? 8 Boasa ndang hudok hami tu hamu, “Taulahon ma na jahat asa ro na denggan?” Ai adong do na manudu hami mandok songon i. Sasintongna, ingkon hona uhum do nasida.

9 Antong, na dumenggan do hita sian halak na asing? Daong! Songon naung hudok hami, rap dirajai dosa do halak Jahudi nang halak Junani. 10 Songon na nidok ni na tarsurat i, “Ndang adong halak na sintong nanggo sahalak pe. 11 Ndang adong nanggo sahalak pe na mamboto na ingkon ulahononna. Jala ndang adong nanggo sahalak pe na mangalului Debata. 12 Nunga manimbil sude jolma, ndang marguna be nasida sude, jala ndang adong na burju nanggo sahalak pe.” 13 “Songon kuburan na bungka do pamangan ni nasida. Gabus do na kaluar sian dila ni nasida.” Jala “marbisa do bibir ni nasida songon ulok”. 14 “Gok bura dohot hata na posi do pamangan ni nasida.” 15 “Hatop do pat ni nasida laho mambunu.”* 16 “Parohon hamagoan do nasida jala mambahen halak susa. 17 Jala ndang diboto nasida songon dia asa mardame dohot na asing.” 18 “Ndang adong biar ni nasida tu Debata.”

19 Taboto do, sude na tarsurat di Patik ni si Musa i, laho tu halak Jahudi do i. Alani i, ndang adong be na boi marsidalian jala uhumon ni Debata do sude halak na di portibi on. 20 Alani i, ndang adong halak na didok mangulahon na sintong di jolo ni Debata marhite mangulahon patik i. Ai holan asa taboto do dosanta umbahen na adong patik i.

21 Alai saonari taboto ma, songon na tarsurat di Patik ni si Musa dohot na Sinurat ni Angka Panurirang, boi do sasahalak didok sintong di jolo ni Debata, nang pe ndang diulahon patik i. 22 Tutu, sude halak na porsea tu Jesus Kristus boi didok sintong di jolo ni Debata. Ai ndang marimbar jolma di Debata. 23 Nunga mardosa sude jolma jala ndang boi be nasida patuduhon hamuliaon ni pangalaho ni Debata. 24 Alai digarar Kristus Jesus do nasida marhite tobusan asa boi nasida malua jala boi didok sintong di jolo ni Debata. On ma silehon-lehon ni Debata alani asi ni rohana na mansai balga i. 25 Dibahen Debata do Kristus gabe pelean, asa boi halak mardame tu Ibana marhite haporseaon ni nasida tu mudar ni Kristus i. Dibahen do songon i laho patuduhon na tigor do Ibana. Ai sabar* do Debata manesa dosa ni angka jolma di tingki naung salpu. 26 Jala dipatuduhon Debata do na tigor Ibana sahat tu saonari, didok Ibana do sintong ganup halak na porsea tu Jesus.

27 Alani i, adong do na boi mambahen sasahalak marbalga ni roha? Ndang adong. Patik na dia do na mangorai sasahalak marbalga ni roha? Parniulaon ni sasahalak do na rumingkot didok di patik i? Daong. Alai ingkon marhaporseaon do sasahalak didok di patik i. 28 Di hita, alani haporseaon do umbahen na didok sasahalak sintong, ndang alani na mangulahon patik. 29 Ai holan Debata ni halak Jahudi do Ibana? Nda laos Ibana do Debata ni bangso na asing? Tutu, laos Ibana do Debata ni angka bangso na asing. 30 Ai sada do Debata. Alani i, didok Debata do sintong halak na marsunat dohot na so marsunat molo porsea nasida. 31 Antong, na so marlangku do Patik i ala porsea hita? Daong! Gariada na patoguhon* patik i do hita.