Lukas

23 Dung i, hehe ma sude natorop i jala diboan ma Jesus tu si Latus. 2 Dilului nasida ma sala ni Jesus, ninna ma, “Tardapot do ibana mangaliluhon bangsonami. Diorai do manggarar pajak tu Kesar jala didok do ibana Kristus, raja i.” 3 Disungkun si Latus ma Jesus, “Raja ni Halak Jahudi do ho?” Dialusi Jesus ma, “Tutu, songon na nidokmi ma.” 4 Dung i didok si Latus ma tu angka malim kepala* dohot tu natorop i, “Ndang adong dapot ahu sala ni baoa on.” 5 Alai lam gogo do didok nasida, “Dibahen ibana do hagunturon tu bangso on marhite pangajarionna di saluhut Judea, mulana di Galilea jala saonari nunga sahat tuson.” 6 Dung dibege si Latus i, disungkun ma manang na tutu ibana halak Galilea. 7 Dung diboto si Latus na sian luat na nirajaan ni si Herodes do Jesus, diboan ma ibana tu si Herodes, jala pas di Jerusalem do tingki i si Herodes.

8 Las situtu ma roha ni si Herodes dung diida ibana Jesus. Nunga leleng naeng jumpang ibana dohot Jesus, ai godang do barita dibege taringot tu ibana. Jala hirim do rohana idaonna Jesus mambahen tanda halongangan.* 9 Dung i godang ma sungkun-sungkun dibahen si Herodes, alai ndang dialusi Jesus. 10 Alai mulahulak ma jongjong angka malim kepala* dohot siboto surat jala marsigorgor do roha nasida laho patuduhon sala ni Jesus. 11 Dung i direhei si Herodes dohot angka tentarana ma Jesus. Dibahen ma pangkeonna baju na arga laho mangaleai ibana, jala disuru ma ibana muse mulak tu si Latus. 12 Marmusu hian do si Herodes dohot si Latus, alai mulai sian i gabe mardongan ma nasida.

13 Dung i, dijou si Latus ma marpungu angka malim kepala,* angka panggomgomi dohot angka rayat. 14 Ninna ma tu nasida, “Diboan hamu do ibana tu ahu jala didok hamu do ibana mangaliluhon angka rayat asa mangalo. Di jolomuna do hupareso ibana, alai ndang adong jumpangku sala ni ibana songon na nidokmuna i. 15 Si Herodes pe songon i, disuru do muse ibana mulak tu hami, ndang adong diulahon halak on manang aha pe na mambahen ibana patut diuhum mate. 16 Alani i, linsinganku ma ibana dung i paluaonku ma.” 17 *—— 18 Alai sude ma natorop i marsurak, “Pamate ma ibana, palua ma si Barabas di hami!” 19 (Dipenjarahon do si Barabas ala manggunturi di kota jala mambunu.) 20 Diulahi si Latus ma muse mangkatai tu nasida, ai naeng paluaonna do Jesus. 21 Alai marsurak ma nasida, ninna ma, “Uhum mate ibana tu hau! Uhum mate ibana tu hau!” 22 Didok ibana ma patoluhalihon tu nasida, “Boasa? Ai hajahaton aha diulahon ibana? Ndang adong dapothu manang aha na mambahen ibana patut diuhum mate. Alani i, linsinganku ma ibana dung i paluaonku ma.” 23 Alai, lam dipagogo nasida ma soarana mamaksa asa diuhum mate ibana,* ujungna saut ma na nidok ni nasida i. 24 Alani i, dibahen si Latus ma songon na pinangido ni nasida. 25 Dipalua ma halak na pinangido ni nasida, na dipenjarahon ala manggunturi jala mambunu. Dung i dipasahat ibana ma Jesus tu nasida, asa dibahen manang songon dia lomo ni roha ni nasida.

26 Tingki diboan nasida Jesus, ditangkup nasida ma si Simon halak Kirene, na ro sian huta di luat i. Dibahen nasida ma hau partinaonan i* tu si Simon asa diihuthon ibana Jesus sian pudi. 27 Torop do halak na mangihuthon ibana, dohot do nang angka borua na sai tumatangis jala na sai mamungkuli diri nasida alani lungun ni roha nasida. 28 Diida Jesus ma tu angka borua i jala ninna ma, “Unang ma ahu tangisi hamu ale angka boru Jerusalem. Alai tangisi hamu ma dirimuna dohot ianakhonmuna. 29 Ai na ro ma tingkina dohonon ni halak ma, ‘Marlas ni roha ma borua na mandul, na so hea tubu-tubuan* jala na so hea patarushon!’* 30 Dohonon ni nasida ma tu angka dolok, ‘Tipa ma hami!’ dohot tu angka dolok-dolok, ‘Hungkupi ma hami!’ 31 Ai molo songon on do dibahen nasida tingki mangolu dope hau i, lam boha ma molo dung mahiang hau i?”

32 Tingki i, adong do dua halak parjahat na diboan laho diuhum mate rap dohot Jesus. 33 Dung sahat nasida di inganan na margoar Tangkurak, dipakkuhon nasida ma ibana tu hau rap dohot angka parjahat i, sada di siamunna jala sada nai di hambirangna. 34 Alai ninna Jesus ma, “Ale Amang, sesa ma dosa ni nasida, ai ndang diboto nasida na binahen ni nasida i.” Dung i, dibagi-bagi nasida ma pangkeanna marhite undi. 35 Jongjong ma angka halak mangida i. Alai direhei angka panggomgomi ma ibana jala ninna ma, “Ia na asing dipalua, molo na tutu do ibana Kristus na Pinillit ni Debata, dipalua ma jo dirina.” 36 Dohot do nang angka tentara mangarehei ibana, dipajonok nasida ma tu ibana jala dilehon ma anggur na asom tu ibana, 37 ninna ma, “Molo ho do Raja ni Halak Jahudi i, palua ma dirim.” 38 Di atas ni uluna adong do tarsurat, “On do Raja ni Halak Jahudi.”

39 Dohot do sahalak sian parjahat na targantung disi mangaleai Jesus, ninna ma, “Ai ndang na ho Kristus i? Palua ma dirim songon i nang hami!” 40 Alai dipinsang parjahat na sada nai ma ibana, ninna ma, “Na so dihabiari ho do Debata? Dos do panguhuman na tu ho dohot tu ibana. 41 Ai na patut do hita hona uhum. Tajalo do upa ni pambahenanta, alai anggo ibana ndang adong diulahon na sala.” 42 Dung i ninna ibana ma, “O Jesus, ingot ma ahu molo dung masuk ho tu Harajaonmi.” 43 Gabe didok Jesus ma tu ibana, “Tutu do na hudok on tu ho sadari on, rap do ho dohot ahu di Paradeiso.”

44 Hira-hira jam 12 arian* do tingki i, alai mangkolom ma saluhut luat i sahat tu jam tolu botari,* 45 ai ndang marsinondang mata ni ari. Jala ribak dua ma tire ni bagas joro sian ginjang sahat tu toru. 46 Dung i, gogo ma dijouhon Jesus ninna ma, “Ale Amang, tu tanganmu ma hupasahat hosangkon.” Dung didok songon i, mate ma ibana.* 47 Tingki diida komandan ni tentara na masa i, dipuji ibana ma Debata ninna ma, “Tutu do ndang adong sala ni baoa on.” 48 Dung diida sude natorop na pungu disi na masa i, mulak ma nasida huhut ditompuhi andorana. 49 Sude halak na mananda Jesus dohot angka borua na mangihuthon ibana sian Galilea, jongjong do mangida na masa i sian na dao.

50 Adong ma sahalak baoa na margoar si Josep, sahalak anggota ni Pengadilan Agama Jahudi.* Burju do ibana jala diulahon na sintong. 51 (Ndang sapandapot ibana tu sangkap dohot na binahen ni nasida.) Sian Arimatea do ibana, i ma sada huta di Judea jala sai maima-ima do ibana tu Harajaon ni Debata. 52 Laho ma ibana tu si Latus mangido bangke ni Jesus. 53 Dipaturun ibana ma bangke i, dibungkus tu abit linen jala dipeakkon ma i tu kuburan, i ma dolok batu naung diliangi na so hea dope dibahen bangke tusi. 54 Ari Pangaradeon* do tingki i jala naeng ari Sabbat nama. 55 Alai angka borua na mangihuthon Jesus sian Galilea, dohot do nasida mangida didia kuburan i jala mangida songon dia bangke i dipeakkon. 56 Dung i, mulak ma nasida paradehon angka rempah-rempah dohot miak na angur. Jala di ari Sabbat maradi ma nasida songon naung diparentahon i.