Lukas

21 Tingki diida Jesus dompak poti inganan ni pelean, diida ibana ma angka na mora mandabuhon silehon-lehon ni nasida tusi. 2 Dung i, diida ibana ma disi sahalak ina na mabalu na pogos mandabuhon dua hepeng logam na otik argana.* 3 Didok Jesus ma, “Tutu do na hudok on tu hamu, gumodang do didabuhon ina na mabalu na pogos on sian sude na didabuhon nasida. 4 Ai sude nasida, didabuhon nasida do sian lobi-lobi ni nasida. Alai ina na mabalu on nang pe pogos, dilehon ibana do sude na porlu di ngoluna.”

5 Dung i, adong ma manang na piga halak mangkatai taringot tu uli ni bagas joro binahen ni angka batu na uli. Jala dihatai nasida do muse taringot tu ragam ni pelean tu Debata. 6 Didok Jesus ma, “Idaonmu do haduan, na ro nama tingkina ndang na laho adong nanggo sada batu na martindi muse dison na so dirumpakkon.” 7 Dung i disungkun nasida ma tu Jesus, “Guru, andigan ma masa angka i jala aha ma tanda na laho masa sudena i?” 8 Dialusi Jesus ma, “Manat ma, so tung adong na mangaliluhon hamu. Ai torop ma halak na ro mamangke goarhu mandok, ‘Ahu do ibana’, jala ‘Nunga jonok tingkina’. Unang ma ihuthon hamu nasida. 9 Alai molo dibege hamu soara ni na marporang dohot na gaor,* unang ma mabiar hamu. Ai ingkon jolo masa do i, alai ndang pintor ro dope ujung ni na masa i.”

10 Dung i didok Jesus ma tu nasida, “Marporang ma bangso tu bangso jala harajaon tu harajaon. 11 Masa ma gempa* na mansai gogo jala masa ma haraparon dohot sahit di godang inganan. Adong ma tanda na mambahen mabiar dohot tanda na balga sian langit.

12 “Alai andorang so masa sudena i, tangkupon ni angka halak ma hamu. Bahenon ni nasida ma na hansit jala boanon ni nasida ma hamu tu jolo ni angka sinagoga* dohot tu penjara. Boanonna ma hamu tu jolo ni angka raja dohot tu angka gubernur alani goarhu. 13 Laos i ma dalanmuna jongjong di jolo ni nasida laho paboahon taringot tu ahu. 14 Alani i, marsitutu ma hamu di bagasan rohamuna asa unang jolo diparade hamu alusmuna. 15 Ai lehononku ma bisuk tu hamu jala urupanku do hamu mamboto sidohononmuna, musumuna pe ndang tolap mangalusi manang aha. 16 Alai dohot do nang natua-tuamuna, haha anggimuna, keluargamuna dohot donganmuna pasahathon* hamu jala pamateonna ma deba sian hamu. 17 Jala sogo ma roha ni sude jolma tu hamu alani goarhu. 18 Alai ndang na laho mago nanggo sada pe obuk sian ulumuna. 19 Tongtong ma hamu mangolu molo marsihohot hamu.

20 “Molo diida hamu Jerusalem dihaliangi tentara, boto hamu ma nunga jonok hasesegana. 21 Ingkon lari do halak na di Judea tu angka dolok. Laho ma sian i angka na di kota i, jala unang ma masuk tusi halak na di luar ni kota i. 22 Ai i ma tingkina mandabu uhum,* asa saut sude na tarsurat i. 23 Marjea ma borua na mardenggan daging* jala na patarushon* poso-poso di tingki i! Ai masa do haporsuhon bolon di luat i dohot panguhuman tu bangso on. 24 Marragean ma nasida alani podang jala ditaban sude bangso ma nasida. Degean ni angka bangso* ma Jerusalem sahat tu na digohi tingki naung ditontuhon tu angka bangso.*

25 “Dung i adong ma angka tanda di mata ni ari, di bulan dohot di bintang. Marsak situtu ma sude bangso di tano on ala ndang diboto nasida dalan laho malua sian galumbang ni laut na marhasak i. 26 Pingsan ma angka halak alani biarna dohot alani paimaimahon na laho masa tu saluhut tano on, ai humutur ma angka huaso ni langit. 27 Dung i, idaon ni nasida ma Anak ni jolma i ro di atas ni ombun di langit, mardongan huaso na mansai balga dohot hasangapon. 28 Alai molo masa angka i, pos ma rohamuna jala togu ma hamu, ai nunga jonok haluaonmuna.”

29 Dung i dipaboa Jesus ma sada tudosan tu nasida, “Parrohahon ma hau ara dohot sude hau na asing. 30 Molo diida hamu martumbur hau i, botoonmuna ma naung jonok ari logo. 31 Songon i ma, molo diida hamu masa sudena i, botoonmuna ma nunga jonok Harajaon ni Debata. 32 Tutu do na hudok on tu hamu, ndang na laho salpu sundut* on so jolo masa i sude. 33 Laho salpu do langit dohot tano on, alai ndang na laho salpu hatangki.

34 “Parrohahon hamu ma dirimuna, asa unang dirajai sipanganon dohot siinumon na marlobi-lobi rohamuna. Jala unang paholsohu tu parngoluon, ai tompu ma ro ari i tu hamu 35 songon jorat. Jala ingkon ro do ari i tu atas ni sude jolma na maringanan di tano on. 36 Alani i, sai jaga ma hamu, tongtong ma pangido asa malua hamu sian sude na laho masa i jala asa boi hamu jongjong di adopan ni Anak ni jolma i.”

37 Tingki arian mangajari do Jesus di bagas joro, alai di borngin ni ari kaluar ma ibana jala marborngin di Dolok Jetun. 38 Jala manogot dope, nunga ro sude halak mandapothon Jesus laho manangihon ibana di bagas joro.