Neebe makidik ma bôt bape

1-2. Inyuki makidik més ma nla ba mahéñha ni ma bini bikristen bipe?

BAA ba ma bep kéés we inyu makidik u nyoñ? Baa i ma pam le yak we u kéés mankéé inyu makidik a nyoñ? Ibabé nkaa, hala a ma pémél ngandak yés.

² Hala a hélés bañ bés le ngim mangéda, makidik més ma ba bé nlélém ni makidik ma lôk kéé ipe. Inyuki? Inyule hiki wada wés a yé wé ntén. Hiki wada wés a gwé jé litehge li mam. Di ntehe bé mam nya yada inyule di nlôl bé i litén jada, di gwé bé binéñél gwada, niñ yés i ta bé to nlélém. Ndi to ibale di ntehe bé mam nya yada, di nwahak bañ le hala a ôbôs nsañ ni adna ikété likoda.​—Éfésô 4:3.

3. Kii i nla tinde bés i kéés mankéé inyu makidik a nyoñ?

³ I ngéda mankéé a nyoñ makidik ma ma nlémél bé bés, di yé le di bana ngôñ i kal nye le a nyoñ bé makidik malam tole di yé le di bana ngôñ i kal bôt bape hala. I nla ba le di gwé mahoñol malam. Di ngwés lôk kéé yés i bôlôm ni i bôda, di ngwés yak loñge yap. (Bingéngén 17:17) Jon di gwé bé ngôñ le ba yoñ makidik mabe, ma ba ga yik tam tole ma ma ga ôbôs maada map ni Yéhôva.

4-5. Kii di nlama boñ ibale mankéé wada a nyoñ makidik ma ma yé maselna ni ma di bak le di yoñ?

⁴ Ibale mankéé a nyoñ makidik ma ma nenne bé bés malam, baa di nlama kal nye hala? Ngim mangéda, di nla boñ hala; ndi mangéda mape, i ta bé nseñ i boñ hala. Kii ’héga, ibale di nok le a nyéñ boñ jam li li mbôk matiñ ma Bibel, gwéha i ga tinde bés i hôla nye inyu boñ le a héñha mahoñol mé. (Bingéngén 27:​5, 6) Ndi kii ni di nlama boñ ibale mankéé a nyéñ boñ jam li li mbôk bé matiñ ma Bibel ndi li bak mahéñha ni i yom di bak le di boñ? Ndimbhe i yé mu pes kaat i ñéga i yigil ini: “Ni kéés bañ nye inyule a gwé jé litehge li mam.”​—Rôma 14:1.

⁵ Ndi ibale hala a nlédél bés i neebe makidik mé, kii di yé le di boñ? Munu yigil ini, di ga tehe kii i nla hôla bés i neebe makidik bôt bape ba nyoñ ni lelaa di nla pam i boñ hala. Ndi di tehe ndugi makidik lôk kéé ipe i nla yoñ, ma ma nla tinde bés i kéés bo.

MAMBE MAKIDIK MA NLA TINDE BÉS I KÉÉS BAPE?

6-7. Sima ngim makidik lôk kéé i nla yoñ, i i yé le i tinde bés i kéés bo.

⁶ Kiki di mbôk di kal, binéñél gwés tole i mam ma mpémél bés i niñ ma nla tinde bés i bana ngim litehge li mam, ni i hoñol le litehge jés jotama jon li téé. Di nla yak hoñol le bape ba ntehe mam kiki bés. Ndi bebek, hala bé nyen bo ba nhoñol. Di yoñ le ndék dihéga. Hihéga 1: Ilole a njôp i maliga, mankéé nu munlôm wada a bi nañ ni isañ nu a bé lôôha nyo moog. Kel yada, ba naña nye i ngand, a tehe bikristen bipe bi yé i nyo moog. Hala a tééñga nye ngandak, a ke a kal bo le i yom ba yé i boñ i ta bé ilam. Hihéga 2: Mankéé nu muda wada a mbana béba kon, a sôk a mbôôp. I mbus ngéda, a nok le yak sita ipe i gwé kon a ban-ga. Mankéé wés nu muda a nyéñ hôla liwanda jé, a noode nyégsa nye i yoñ minlélém mi matibla. (A nla kal nye le a je bañ tokii tokii, a pohol ngim bijek a nje, a yoñ matibla ma dokta tole matibla ma nkoñ). Hihéga 3: Mankéé nu munlôm wada a bé i kwéha base ndi i len ini, a ngwés ha bé bana maada mo ki mo ni i base i. Nano, a nok le mankéé numpe a nke i maéya mu base i, hala a mpat nye ñem.a

⁷ Di yoñ ki dihéga dipe. Hihéga 4: Mankéé nu munlôm wada a néñél i het libim li bôt li ntehe bé loñge le munlôm a tééda liyéé, to muda le a haba loñ i ngéda a nke i makoda ni i likalô. Tolakii a nyi mahéñha ntôñ u nlona mu mam ma, a nai ndik ni litehge jé li mam, a nkal lôk kéé le mankéé nu munlôm a nlama bé tééda liyéé, to mankéé nu muda a nlama bé haba loñ inyu ke i makoda ni i likalô. Hihéga 5: Mañ wada u likoda u nyi mankéé wada nu a bi ke i suklu ikeñi, a yik tjôô maliga. Nano, njohok mankéé umpe u u yé i likoda ni i mañ u, u nkit le u mboñ suklu ikeñi. I mañ u, u nkon woñi, u kahal noode tinde i njohok mankéé u ni bagwal bé le ba héñha mahoñol.

8. (a) Kii i nla boñ le ngim bagwal i bôdôl kéés bana bagwal bape? (b) Ibale di gwé lem i kéés lôk kéé, kii hala a nla lona ikété likoda?

⁸ Nano, di wan jam lipe li li yé le li pémél bagwal. Hihéga 6: We nu u yé ngwal, u nsal ni ngui i néñés man woñ ikété “biniigana ni mabéhna ma Yéhôva.” (Éfésô 6:4) Ndi bagwal bape ba nti bon bap kunde i boñ mam we u nsôña bon boñ. Kii ’héga, ba nwas le bon bap ba huu juu, ba nwahak bo le ba tuk mintuk mi vidéô (mi mi gwé bé bisañ), tole ba mpala ti bon bap batitigi bitéléfôn. I ngéda man woñ a ntehe i mam ma, a nhoñol ndik le u nai ni mbanda. A nla yak bat we le: “Inyuki we u ta bé kiki bagwal ba liwanda jem?” I nya jam i, i nla boñ le u kahal bep kéés bana bagwal bape. I maliga, hiki ngéda ini kristen ipe i nyoñ makidik ma ma nlémél bé bés, di nla bep yoñ hala, di kahal yak kéés bo. Kii ’héga, di nla tehe le a mbep gwélél moni nwé, le a ngwés a ntuk niñ, ni le a nyi bé pohol mintuk nwé. Ndi di nlama bé nwas le i yom di nhoñol i ba nseñ iloo adna ikété likoda.

9. Kii di nlama bé hôya? (Béñge yak titii.)

⁹ Ibale kristen i nyoñ makidik ma ma yé mahéñha ni makidik ma kristen ipe, hala a nkobla bé le wada a nyoñ makidik malam, nuu numpe a nyoñ makidik mabe. (Rôma 14:5) I ta bé inyule Bibel i nkal bikristen le bi nlama ‘bana mahoñol mada’ inyu matiñ ma Yéhôva, jon hala a nkobla le bésbobasôna di nlama ndik tehe mam momasôna nya yada. (2 Korintô 13:11) Di nla hégha makidik més ni manjel di mpohol i ngéda di nyéñ ke ngim homa. Libim li ngéda, manjel ma yé ma ba ngandak ma ma nkena i nlélém homa. Ndi di mpohol njel i i nlémél bés, i bak loñge inyu yés. Nlélém ni bés, hiki kristen i nla yoñ mé makidik ndi bésbobasôna di gwé ndik njômbi yada: di nyéñ lémél Yéhôva. Jon di nkéés bé lôk kéé ipe inyu makidik ba nyoñ.​—Matéô 7:1; 1 Tésalônika 4:11.

INYUKI DI NLAMA NEEBE MAKIDIK MA BÔT BAPE?

10. Inoñnaga ni Yakôbô 4:​12, di gwé bé kunde i boñ kii, inyuki?

¹⁰ Bibel i nti bés ngandak manjom i i nlama tinde bés i neebe makidik bôt bape ba nyoñ. Di wan le ndék mu. Di gwé bé kunde i kéés bôt bape inyu makidik map. (Añ Yakôbô 4:12.) Yéhôva nyen a yé Nti mambén ni Nkéés nu a téé sép. Nyetama nyen a gwé kunde i tééne bés mambén ni i kal bés lelaa di nlama niñ. Hala a nkobla le i bisu bi Yéhôva nyen lôk kéé i bôlôm ni i bôda i ga timbhe, ndi he i bisu gwés bé. (Rôma 14:10) Di gwé bé kunde yo ki yo i kéés lôk kéé, to ôm bo nsohi ndik inyule ba nyoñ makidik ma nlémél bé bés tole ma nkiha bé ni i yom bés di nhoñol.b

11. Lelaa di nla boñ le adna i ba ikété likoda? (Béñge yak titii.)

¹¹ Yéhôva a mbem le bagwélél bé ba niñ ikété adna, ndi he bé le ba ba nlélém. I maliga, Yéhôva a ngwés mahéñha! Di ntibil tehe hala mu gwom a bi hek. Kii ’héga, to ibale tjai di yé i nlélém e, diba di ga ba mu le di ga ba toi bé nlélém. Kii di nla kal inyu bôt ba binam? Bôt ba binam ba yé iloo milliard juem i nkoñ ’isi, ndi d’a tehe bé bôt iba ba ba yé toi nya yada, ba boñok mam momasôna nlélém. Yéhôva a bi hek hiki mut wé ntén. A ngwés bé i ngéda maselna mo ki mo ma ta bé ipôla bôt iba. Ndi a gwé ngôñ le di niñ ikété adna. Jon iloole di nwas le mahéñha ma bagal bés, di yéñ nsañ. Inyu yés, nseñ le adna i ba ikété likoda iloole di bem le bôt bape ba boñ i yom bés di nhoñol le yon i téé.​—Rôma 14:19.

LELAA DI NLA NEEBE MAKIDIK MA BÔT BAPE?

12-13. Kii di nlama tééda i mahoñol i ngéda di ntehe le mankéé a nyoñ “béba njel”? (Galatia 6:1; béñge yak minkéñék mi matila mini le “I ngéda makidik ma mut numpe ma nlémél bé we.”)

¹² I ngéda bôt bape ba nyoñ makidik ma ma mbéñge bo. Badba le: ‘Baa i mut nu a yé i yoñ “béba njel” tole a yé ndik i yoñ njel ipe i i yé maselna ni yem?’ Ibale a yé i yoñ béba njel, hala wee a yé i bôk mbén, badba le: ‘Baa Bibel i nti me kunde i kodol nye, tole mañ u likoda won u kôli boñ hala tole mut mpe?’ Ibale Bibel i nti we kunde i hôla nye, wee kwel ni nye ni ñemlima. (Añ Galatia 6:1.) Ndi libim li ngéda, w’a léba le makidik mé ma yé ndik maselna ni i yom we u nhoñol. Ibale hala, u pôôs bañ nye mahoñol mabe, u pot bañ to nye béba inyu makidik a nyoñ. Neebe le a gwé kunde i yoñ makidik mé nyemede, u kéés bañ to nye.​—Rôma 14:​2-4.

¹³ Ôt le pék munu hihéga hini: Ibale we ni liwanda joñ ni nke i homa ba nuñle bijek, baa w’a nyégsa nye le a yoñ ndik minlélém mi bijek kiki we? To! W’a neebe kunde a gwé i yoñ bijek a ngwés. To ibale bijek a mpohol bi nlémél bé we, jam joñ bé li, we bé nyen w’a je gwo. Di héñha le mam! Nano, hégda le nyen a nyéñ yôñôl we bijek, baa w’a ba maséé le a pohlene we bijek bi bi nlémél nye, ki le gwo bi nlémél bé we? Nlélém ni bés, di ñunda le di ndiihe bape i ngéda di nwas le bon ba yoñ makidik map ibabé le di kahal nyégsa bo i boñ ndik mam kiki bés di ngwés.

14. I ngéda u nyoñ makidik ma ma mbéñge we, lelaa u ñunda le u ntééda adna ikété likoda? (1 Korintô 8:​12, 13)

¹⁴ I ngéda u nyoñ makidik ma ma mbéñge we. U nla hôla i tééda adna ikété likoda i ngéda u mboñ kii yosô u nla inyu boñ le makidik moñ ma babaa bañ bôt bape. (Añ 1 Korintô 8:​12, 13.) Ngim mangéda, i nla ba we “kunde” i boñ ngim jam Bibel i nsôña bé we. Ndi baa i jam li, li ga ba nseñc ibale li mbabaa lôk kéé? (1 Korintô 10:​23, 24) Ha ngéda i, iloole u kahal hoñol le u gwé kunde i boñ jo, i yé nseñ le u badba kii bôt bape ba ga hoñol. (Rôma 15:1) Ndi baa di ntip nga kal le bôt bape ba nlama neebe makidik di nyoñ, ma ma mbéñge bés? Ñ, hala nyen di nkal. Ba nlama neebe makidik més kiki yak bés di nlama neebe map. Ndi di nlama yak noñ maéba Bibel i nti i kaat Rôma 12:18: “Kiki la nan, ni ba ikété nsañ ni bôt bobasôna.” Jon di mboñ kii yosô di nla inyu tééda nsañ ni bôt bape, di keñglege i babaa bo yañga.

15. Lelaa mimañ mi ñunda le mi ntééda adna ikété likoda? (1 Korintô 4:6)

¹⁵ Mimañ mi neebe makidik ma bôt bape. Mimañ mi nhôla i tééda adna ikété likoda i ngéda mi ntééne bé lôk kéé mambén inyu makidik ma mbéñge bomede ni i ngéda ‘mi nlel bé nwaa u mam ma yé ntilga’ ikété Bibel. (Añ 1 Korintô 4:6.) Hala a nkobla ki le mimañ mi nti bé maéba ma ma nlôl bé mu Bibel, to mu bikaat gwés. Jam lipe ki, ibale mankéé wada a mbat mañ wada mahôla; i mañ u, u nlama bé ti maéba inoñnaga ni i yom u nhoñol le yon i téé, ndi u nlama ti maéba ma ma nlôl mu Bañga i Djob.​—Yésaya 48:​17, 18.

16. Lelaa mañ u nla unda le u neebe makidik juu li mimañ jolisôna li nyoñ?

¹⁶ Hiki mañ u nlama ki neebe makidik juu li mimañ jolisôna li nyoñ. I ngéda juu li mimañ li nsoohe inyu bat mbuu mpubi, li tibil wan Bitilna, li yoñ ki makidik, hiki mañ u nlama nit makidik libim li mimañ li nyoñ to ibale ma nkiha bé ni i yom nye a nhoñol. (Éfésô 5:17) Handugi hala, mimañ mi nlama noñ toi i mam ma yé ntilga ikété Bibel ni i bikaat bi ntôñ ndi mi yoñ yihe le mi kôde bañ i biniigana bi, inyu nit i yom bo ba nhoñol. Kii ’héga, mañ u likoda u nlama ndik bé yoñ nlôñ wada ikété ngim kaat inyu unda le i yom a nkal i yé maliga, ndi ki le a nwas mana mam mape ma yé ntilga mu kaat i. 

17. Bimbe bisai di nkôs i ngéda di neebe makidik ma bôt bape?

¹⁷ Kiki di ntip tehe, hiki mut a yé wé ntén. Hiki wada wés a gwé mé mahoñol ni mé mam ma nlémél nye. Ndi i mahéñha ma, ma yé bisai! Kiki bésbobasôna di nlôl bé i nlélém homa, di gwé bé to bilem gwada, hala a mboñ le likoda li ba loñge homa inyu hiki mut. Jon, iloole di nwas le i mahéñha ma, ma bagal bés, di mboñ kii yosôna di nla inyu tééda nsañ. Di nyoñ yihe le di babaa bañ bôt bape. Di neebe makidik bôt bape ba nyoñ inyu mam ma mbéñge bo. I ngéda di mboñ hala, biliya gwés bi num matam malam. Di ga boñ le likoda li ba maséé, li niñ ki ikété adna.​—Tjémbi 133:1; Matéô 5:9.