1 Tésalônika

1 Me Paul, Silvanô* lôñni Timôtéô, di ntilna likoda li bôt ba Tésalônika li li yé ikété adna ni Nyambe Tata lôñni Nwet le Yésu Kristô:

Konangoo i mbuma ñañ lôñni nsañ bi ba ni bé.

2 Di nti Nyambe mayéga hiki ngéda di nhoñol bébobasôna ikété masoohe més, 3 inyule di nwaa bé bigda bé i bisu bi Nyambe wés ni Tata wés inyu nson nan u hémle, ni ndumbba nan inyu gwéha, lôñni hônba nan inyu botñem ni gwééne Nwet wés Yésu Kristô. 4 Inyule, a lôk kéé Nyambe a ngwés, di nyi le a bi pohol bé, 5 inyule ñañ nlam di ñañal u bi pam nyoo bééni, ha ndik ni njel bibañga gwotama bé, ndi yak ni njel lipémba lôñni mbuu mpubi ni ngandak hémle, hala kiki ni nyi mintén mi bôt di bi yila ipôla nan inyu loñge nan. 6 Ni bi yila ki banigle bés ni ba Nwet, hala kiki ni bi neebe bañga ikété ngandak njiiha lôñni maséé ma nlôl ni mbuu mpubi, 7 kayéle ni bi yila ndémbél inyu bahémle bobasôna ba yé i Makédônia ni i Akaya.

8 Maliga ma yé le, ni njel nan nyen bañga i Yéhôva* i bi kéla, ha ndik i Makédônia lôñni Akaya bé, ndi yak hémle nan inyu Nyambe i bi añlana ni mbok yosôna, i nya i yé le di gwé ha bé jam i pot. 9 Inyule bomede ba nwaa bé añal kiki di bi boma bé lisañ li bisu, ni lelaa ni bi tjôô bisat, ni hielba inyu bégés Nyambe le ndi ni sal kiki minkol inyu Nyambe nu a niñ, nu a yé ki bañga Nyambe, 10 ni bemek Man wé nu a nlôl i ngii, nu a bi tugul ikété bawoga, hala wee Yésu nu a bi tohol bés le di pei hiun hi nlo.