1 Tésalônika

2 A lôk kéé, bébomede ni nyi yaga le mayuuga més i bééni ma bi ba bé yañga. 2 Inyule to hala kiki di bi bôk ndugi di nok njôghe, ba wéha ki bés nyuu i Filipi, kiki ni nyi, Nyambe a bi ti bés makénd* i añle bé ñañ nlam ikété ngandak ngolba.* 3 Inyule maéba di bi ti bé ma nlôl bé ni hihôha, to ni nyega, to ni malôga, 4 ndi kiki i bi lémél Nyambe i bôdôl bés ñem inyu ti bés ñañ nlam, jon di mpot bé inyu lémél bôt, ndi inyu lémél Nyambe, nu a nwan miñem nwés.

5 Ni maliga, ni nyi le kekikel di bi lo bé i bééni, di gwéélak nkwel u dipôha, tole di bak bôt ba bihéñba inyu sôô hép nkus; Nyambe a yé mbôgi! 6 Di bi yéñ bé to lipém li nlôl ni bôt ba binam, to ni bé, to ni bôt bape; to hala kiki di bé le di yilna bé mbegee keñi* inyule di yé baôma ba Kristô. 7 Di bi yila ipôla nan kiki bôt ba ntôñ bé ni loñgeñem, ndik kiki nyañ bon a ntôñgôl* bon bé ni gwéha. 8 Jon, kiki di gwé gwéha keñi inyu nan, di bi kit* le di nlama ndigi bé añle bé ñañ nlam u Nyambe, ndi le di ti yak bé biniñ gwés* gwomede, inyule ni bi yila bôt le di ngwés ngandak.

9 A lôk kéé, ibabé pééna, ni hoñol nson wés nkeñi ni ndumbba yés. I ngéda di bi añle bé ñañ nlam u Nyambe, di bé sal juu ni njamuha inyu boñ le di bééga bañ mut to wada ikété nan mbegee keñi. 10 Bé bahémle ni yé mbôgi, yak Nyambe a yé mbôgi, le di bi ba bôt ba maliga, bôt ba téé sép, ni bôt ba nginsohi i bisu binan. 11 Bébomede ni nyi loñge le di bi téñbe i ti bé maéba ni hogbe, di bôglak ki hiki wada nan mbôgi, ndik kiki isañ a mboñ inyu bon bé, 12 le ndi ni ke ni bisu i hiôm i nya i kôli ni Nyambe, nu a yé i sébél bé i Ane yé ni i lipém jé.

13 Inyu hala yaga nyen yak bés di nwaa bé ti Nyambe mayéga, inyule ngéda ni bi leege Bañga i Nyambe di bi añle bé, ni bi leege bé yo kiki bañga i bôt ba binam, ndi kiki i yé toi, hala wee Bañga i Nyambe; i bañga ini yon i nsal ikété nan, a bé bahémle. 14 Inyule a lôk kéé, ni bi yila bôt ba noñ ndémbél i makoda ma Nyambe ma ma yé ikété adna ni Kristô Yésu nyoo Yudéa, inyule ni bi nok ndutu i moo ma bôt ba loñ nan inyu minlélém mi mam kiki yak bo ba yé i nok ndutu i moo ma Lôk Yuda, 15 i i bi nol Nwet le Yésu ni bapôdôl, i tééñga ki bés. Ndi ba nlémél bé Nyambe, ba nkolba yak gwéñe bi bôt bobasôna, 16 hala kiki ba noode kéñ bés njel i pôdôs bôt ba matén inyu boñ le ba kôhna tohi. Hala nyen ba nkônde mu bibéba gwap ngéda yosôna. Ndi i lisuk, hiun hié hi ga sôk hi lo i ngii yap.

17 Ndi, a lôk kéé, i ngéda di bé mbaglak lôñni* bé inyu ndék ngéda (di bé ha bé lôñni bé, ndi di bé hoñol bé ikété miñem), inyule di bééna ngôñ keñi i tehe bé, jon di bi boñ biliya gwobisôna i tehe bé i mbombom.* 18 Inyu hala nyen di bééna ngôñ i lo nyoo bééni, ñ, memede Paul me bi noode lo nyoo, ha ngélé yada ndik bé, ndi ngélé iba; ndi Satan a bi kéñ bés njel. 19 Inyule bonjee ba yé botñem yés, tole maséé més, tole ntut wés u mahak i bisu bi Nwet le Yésu ngéda a mba ha? Baa bé yaga bé? 20 Ibabé pééna, bé bon ni yé lipém jés ni maséé més.