Kii i yé béba?

Ndimbhe i Bibel

Béba i yé liboñok, yom mut a nôgda tole mahoñol ma ma nkolba matiñ ma Djob. I yé i tjél nôgôl mambén ma Djob di boñok mam mabe, tole mam ma ma téé bé sép i mis ma Djob. (1 Yôhanes 3:4; 5:​17) Bibel i mpôdôl yak bibéba mut a mboñ ngi kôôba, tole jam a mboñ li li téé bé.​—Yakôbô 4:​17.

I dilémb ba bi gwélél inyu tila Bibel, bibuk ba bi gwélél inyu pôdôl béba bi nkobla le “i les ngim yom” tole ngim njômbi. Kiki hihéga, bisônda bi Israel i ngéda kwañ bi bé yi leñ ndamb kayéle bi bé “les bé to ndék.” Ibale di nke i kobol bibuk bini buk i ngii buk, bi nla kobla le ba bé “kwo bé i béba.” (Bakéés 20:16) Jon i boñ béba i nkobla le i boñ mam ma ma mbôk matiñ ma Djob.

Djob a gwé kunde i tééne bôt ba binam matiñ inyule nyen a bi Nhek bés. (Masoola 4:​11) Djob a ga kéés hiki wada wés inoñnaga ni maboñok mé.​​—Rôma 14:12.

Baa mut a nla niñ ibabé le a boñ béba?

To jam. Bibel i nkal le: ‘Bésbobasôna di bi boñ béba, di mpam bé to lipém li Nyambe.” (Rôma 3:​23; 1 Bikiñe 8:​46; Ñañal 7:​20; 1 Yôhanes 1:8) Inyuki hala?

Bôt binam ba bisu hala wee Adam bo Éva, ba bééna bé liton li mahindi jo ki jo i ngéda Djob a hek bo. Ba bé peles, Djob a bi hek bo i pôna yé. (Bibôdle 1:​27) Ndi, ba bi nimis libak jap li peles i ngéda ba bi ndogbene Djob. (Bibôdle 3:​5, 6, 17-​19) I mbus, ba bi lôôs bon bap i béba i, ni libak jap li kwéha. (Rôma 5:​12) David kiñe Israel a kal le: “Me yé mboñbéba ibôdôl i ngéda mama yem a bi yoñ jém jem.”​—Tjémbi 51:5.

Baa ngim bibéba i yé ikeñi iloo ipe?

Ñ. Kiki hihéga, Bibel i nkal le bôt ba tison i Sôdôm ba bé ‘bibéba bi bôt . . . yak bibéba gwap bi bi lôôha.’ (Bibôdle 13:13; 18:20) Di béñge mam maa ma ma ñunda le béba i yé ikeñi, tole i gwé ngui ngandak.

1. Béba ikeñi. Bibel i mbéhe bés le di yoñ matat ni bibéba bikeñi kiki bo malal ma nyega, i bégés bisat, wip, lihiua, ngadla, manola, maada ni mimbuu mimbe. (1 Korintô 6:​9-​11; Masoola 21:8) Bibel i mboñ maselna ipôla bibéba bi, ni béba mut a mboñ ibabé i yi le a mboñ béba, tole béba mut a mboñ ngi kôôba, kiki bo bipôdôl tole maboñok ma ma mbabaa mut. (Bingéngén 12:18; Éfésô 4:​31, 32) Ndi to ibale laa, Bibel i nti bés makénd le di yan bañ béba to yada, inyule ndék ni ndék i nla boñ le di kwoo i béba ikeñi, di bôk mambén ma Djob.​—Matéô 5:​27, 28.

2. Mahoñol. Ngim bôt i nkwo i béba inyule i nyi bé mambén ma Djob. (Minson mi baôma 17:30; 1 Timôtéô 1:​13) Tolakii hala a nti bé mut kunde i boñ béba, Bibel i mboñ maselna ipôla béba mut a mboñ inyule a yik bé ni béba mut a mbôñ ni ntjeñ tole béba a nkôôba boñ, a bôk mbén Djob, a kwo i béba. (Ñañga bôt 15:30, 31) I béba mut a nkôôba mboñ i nlôl i “ñem wé mbe.”​—Yérémia 16:12.

3. Lem. Bibel i mboñ ki maselna ipôla béba mut a mboñ ngélé yada ni béba mut a gwé lem i boñ, a mboñ ki yo hala a yé ntandaa ngéda. (1 Yôhanes 3:​4-8) I bet ba “gwé lem i kôôba boñ béba,” yak i mbus le ba nigil i yi i yom i téé, ba nkwo nkaa i bisu bi Djob.​—Lôk Héber 10:26, 27.

I bet ba mboñ bibéba bikeñi, ba nla nôgda le bibéba gwap bi nyuu bo. Kiki hihéga, Kiñe David a tila le: “Mahôha mem ma yé i ngii ño wem; kiki mbegee i i nyét, me nla bé begee mo.” (Tjémbi 38:4) Ndi Bibel i nti bés i botñem ini: “Béba mut i nwas maboñok mé mabe, mut mam mabe a nwas bipék gwé bibe; a témb yak Yéhôva nu a ga kônôl nye ngoo, a témb yak Nyambe wés, inyule a nwéhlana ngandak.”​​—Yésaya 55:7.