Kii i yé nuga bikai i i nkôyôp tjôôm i kaat Masoola pes 17?

Ndimbhe i Bibel

Nuga bikai i i nkôyôp tjôôm kaat Masoola pes 17 i mpôdôl, i yé yimbne i likoda li li bi tééba inyu at biloñ bi nkoñ ’isi ni pot i jôl jap. Jôl jé li bisu li bé le, Likoda li matén (SDN); nano li nsébla le, Adna i biloñ (ONU).

Matode ma ma nhôla bés i yi kii i yé nuga bikai i i nkôyôp tjôôm

1. I yé nlôñ u m’bô. Nuga bikai i i nkôyôp tjôôm i gwé “miño minsaambok” mi mi yé yimbne i “dikôa disaambok” ni i “bikiñe bisaambok” tole biane bi nkoñ ’isi. (Masoola 17:​9, 10) Dikôa ni binuga bi bikai bi ngwéélana i Bibel kiki yimbne biane.​—Yérémia 51:24, 25; Daniel 2:​44, 45; 7:​17, 23.

2. I yé titii i biane bi m’bô gwobisôna bi nkoñ ’isi. Nuga bikai i i nkôyôp tjôôm i mpôôna nuga i bikai ipe kaat Masoola pes 13 i mpôdôl; i nuga ipe i, i yé yimbne biane bi m’bô bi nkoñ ’isi. Binuga bi gwobiba bi gwé miño minsaambok, jôm li bitoñ, ni môl ma ñôbôs Nyambe jôl. (Masoola 13:1; 17:3) Binuga bi bikai bini bi nlôôha pôôna. Nuga i bikai i i nkôyôp tjôôm i yé toi titii, tole pôôna, i biane bi m’bô bi nkoñ isi.​—Masoola 13:15.

3. I nyôñôl ngui yé i biane bipe. Nuga i bikai i i nkôyôp tjôôm “i nlôl” i biane bipe, hala wee biane bi, gwon bi mboñ le i ba i niñ.​—Masoola 17:11, 17.

4. I gwé maada ni bibase. Babilôn Nunkeñi, hala we kwéha base, a yiine nuga i bikai i i nkôyôp tjôôm i ngii, hala a ñunda le bibase bi ntinde i nuga i bikai ini i boñ ngim mam.​—Masoola 17:​3-5.

5. I nti bé Nyambe lipém. Nuga bikai i yé “nyonok ni môl ma ñôbôs Nyambe jôl.”​—Masoola 17:3.

6. I bi nyoi ngim ngéda. Nuga bikai i i nkôyôp tjôôm i bé lama ba i “soñkum,”a hala wee i bé lama nyoi ngim ngéda, inyu tiimba lo i mbus ngim ngéda.​—Masoola 17:8.

Biyônôl bi mbañ i Bibel

Di béñge lelaa Adna i biloñ (ONU) ni ntôñ u bi bôk wo bisu, Likoda li matén (SDN), mi bi nyônôs mbañ i Bibel i i mpôdôl nuga bikai i i nkôyôp tjôôm.

1. I yé nlôñ u m’bô. Adna i biloñ i nsôñ mam ma m’bô, i sôñôk lini “litiñ le, biloñ gwobisôna bi yé mu boma i, bi kôli.”b

2. I yé titii i biane bi m’bô gwobisôna bi nkoñ ’isi. I nwii 2011, Adna i biloñ i bi kônde loñ i nyônôs 193 mu biloñ bi yé mu boma yé. Hala nyen Adna i biloñ i ñunda le i gwé kunde i pot i jôl li libim li biloñ bi nkoñ ’isi.

3. I nyôñôl ngui yé i biane bipe. Biloñ bi yé mu likoda li, gwon bi mboñ le Adna i biloñ (ONU) i ba, biloñ bi ki gwon bi nti ONU ngui a gwé.

4. I gwé maada ni bibase. Likoda li matén ni Adna i biloñ, gwobiba bi bi kôhna mahôla ma bibase bi nkoñ isi.c

5. I nti bé Nyambe lipém. Ba bi téé Adna i biloñ inyu “lona nsañ ni libak li nwee ni nkoñ isi wosôna.”d I njômbi i yé le i nene loñge, ndi i maliga, Adna i biloñ i nti bé Nyambe lipém i ngeñ i nkadba i boñ jam le Ane Nyambe yotama yon i nla boñ.​—Tjémbi 46:9, MN; Daniel 2:​44.

6. I bi nyoi ngim ngéda. Likoda li matén (SDN), li bi tééba ndék ngéda ndigi i mbus gwét bi ntôla bi bisu inyu lona nsañ, ndi li bi la bé kéñ gwét i pôla biloñ. Likoda li, li bi mal i ngéda gwét bi ntôla bi nyônôs biba bi bi bôdôl i nwii 1939. Adna i biloñ (ONU) i bi gwéé i nwii 1945, i mbus gwét bi ntôla bi nyônôs biba. Njômbi i ONU, makeñge mé ma bôlô, ni ntjega wé, bi yé bebee le nlélém ni bi Likoda li matén (SDN).