Lelaa di nla boñ le nduña i yuu bañ bés
Ngandak nduña i nla lona bés makon, i tômbôs ki bés mahoñol. I nla yak lona mandutu mape ma ma nloo i jam li tinak bés nduña.
Maéba inyu hôyôs nduña
U béna bañ emble manwin mabe. Ibale ngim kuu i nkwo, u ta nyégsaga i emble mam momasôna inyu kuu i. Ibale u béna emble, ni añ manwin mabe, hala a nla kôhna we woñi, a boñ ki we u lehel ñem.
Litiñ li Bibel: “Ñem u nsiida u ntuñus bihés”—Bingéngén 17:22.
“I yéñ yi hiki jam li ntagbe, li nla pala yila we lem, ndi i lem i i ta bé lam. Nduña yem i nsôs ngandak hiki ngéda me waa emble manwin mabe.”—Yôhanes.
Hek pék: Baa u yé nyégsaga i emble manwin hiki kel?
Tjek mam moñ. U nlama bana i nlélém ngeñ u nañle hiki kel, nlélém ngeñ u njél, nlélém ngeñ u mboñ bibôlô gwoñ di ndap. Ibale u tjek mam moñ hala, mam moñ ma ga ke loñge, hala a ga hôyôs ki nduña yoñ.
Litiñ li Bibel: “Bipék bi mut bôlô bi ga yon”—Bingéngén 21:5.
“I ngéda Kôrônavirus a bi bôdôl, me bi waa boñ mam kiki me bééna lem i boñ, me bôdôl tégbaha ngandak ngéda i béñge télé. Ndi me bééna ngôñ i tibil gwélél ngéda yem, inyu hala nyen me bi témb me tjek mam inyu boñ i mam momasôna ma yé me nseñ.”—Yôsep.
Hek pék: Baa u gwé tjegek ngéda u u mboñ le u ba maséé le u nyônôs mam momasôna u lam-ga boñ i ngim kel?
Bok mahoñol i mam ma nlam. U kalba bañ le ibale me yi, ki me bi boñ mam i nya ipe, tole u hégda bañ i mam mabe ma nla pémél we i dilo di nlo, hala a ga kônde ndik we nduña. Ndi bok mahoñol bo i jam jada tole mam ima ma u boñ nano, ma ma nla kôhna we maséé.
Litiñ li Bibel: “Ni yi ki ti mayéga.”—Kôlôsé 3:15.
“I añ Bibel hiki kel i hôla me le me nyônôs bañ boña wem ni manwim mabe ndi me bok mahoñol i mam ma nlam. Hala a nene bé bañga jam ndi hala a nhôla ngandak!”—Lisa.
Hek pék: Baa u béna bok mahoñol moñ i mam mabe ma mpémél we i niñ yoñ, u hôiga i mam malam ma mpémél we?
Tôñ bôt bape. I ngéda u gwé nduña u nla bana ngôñ le u kee u yén ndigi woñ homa wetama, ndi u mboñ bañ hala, hoñol lelaa u nla hôla bôt bape.
Litiñ li Bibel: “Ni yéñ ndigi bañ yéñe nan bébotama, ndi yak yéñe i bôt bape.”—Filipi 2:4.
“I bôñôl bôt mam li nlona me maséé. I ngéda me boñ jam li li kôhna bo maséé I nlélém ngéda hala a hôyôs nduña yem. I pot maliga, me pégi ngandak I hôla bôt kayéle mam ma nlona me nduña ma nlo bé me mahoñol.”—Maria.
Hek pék: Ikété bôt u yi ba imbee ba gwé toi ngôñ ni mahôla, kii u nla boñ inyu hôla bo?
Yoñ ngéda ni mbôô woñ. Boñ sport, u noi ki. Je bijek bilam. Ibale u yoñ ngéda ni mbôô woñ niñ i ga kônde lémél we, hala a ga hôyôs ki we nduña.
Litiñ li Bibel: “nyiñgha minsôn i yé mahee ndék”—1 Timôtéô 4:8”
“Me ni lok yem di nla ha bé pam i mbégdé inyu boñ sport kiki di bé boñ, inyu hala nyen di gwé lem i boñ sport i ndap hala a nhôla bés le di ba maséé, hala a hôla ki bés i nôgla.”—Catérine.
Hek pék: Baa i mbéda wel e u yoñ yihe ni je woñ, u boñ ki sport inyu tééda mbôô woñ?
Handugi i mam mana di sima ma ma nla hôyôs nduña, ngandak bôt i bi tehe ki nseñ i nigil mimbônga mi Bibel inyu dilo di nlo. Béñge i yigil ini le “Kii ane Djob i ga boñ?”