Baa nkoñ ’isi u yé bebee ni tjiba? Kii i yé lisuk li ’isi?
Kii u hoñol ngéda u nok le “lisuk li ’isi”? Bebek u nla hoñol le hisi hi ga nyeñg kayéle bôt bobasôna ba wo, gwom gwobisôna bi tjiba. Ngim bôt i nkal le hisi hi yé bebee ni tjiba, téntén ngéda ba ñañ manwin kiki bo le:
“Gwét bi yé le bi ba ni bakindiñ—Bebek bôt b’a kôôba leñ gwét bi tole b‘a kôôba bé, bi nla ki lôl ni ngimanôgla.”—Bulletin of the Atomic Scientists.
“Munu jôm li nwii li tagbe, Mbuk mbebi a bi hôñ a ôbôs ngandak gwom, hié hi ligis mapan, lék i bé nnayak, ngim binuga i konok, yak malép ma bé ma hôl ma jôp mandap.”—National Geographic.
“Bitandi bi nyon i Afrika munu nwii mini, bi ôbôs ki gwom iloo i nwii mi ntagbe.”—The Associated Press.
Baa gwom gwobisôna bi ga tjiba munu nkoñ ’isi? Kii Bibel i nkal mu jam li?
Baa hisi hi ga tjiba?
Heeni. Bañga Djob le Bibel i ñunda bés le hisi hi ga nom i boga ni boga. (Ñañal 1:4) Iloole a tjé hisi a bi hek Nyambe a ga “lona tjiba i ngii ba ba ñôbôs hisi.”—Masoola 11:18, MN.
Baa bôt ba binam ba ga tjiba?
Bibel i ñunda le “nkoñ ’isi” u u nlama tjiba u yé bôt ba binam bobasôna ba ba ngwélél bé Nyambe, ba noñok ndik ngôñ yap bomede. Ndik kiki a bi boñ i dilo di Nôa, Djob a ga lona tjiba i ngii “nkoñ ’isi u bôt ba nyan Nyambe.”—2 Pétrô 2:5; 3:7.
Kiki kaat 1 Yôhanes 2:17 i ñunda, “nkoñ ’isi u yé i tagbe, yak minheña nwé.” I nlôñ kaat unu u ñunda le Djob a ga tjé bé hisi, a ga tjé ba bobasôna ba nyan nye, ba noñok ndigi minheña nwap.
Imbe ngéda lisuk li ga loo?
Bibel i nkal bé bés hilo lisuk li nkoñ ’isi li ga ba. (Matéô 24:36) Ndi i ñunda le lisuk li yé bebee. Bibel i bi bôk pot le:
Gwom kiki bo gwét, njal ikeñi, dimala, ni nyeñg disi ikeñi bi ga ba “bahoma ni bahoma.”—Matéô 24:3, 7, 14; Lukas 21:10, 11; Masoola 6:1-8.
Libim li bôt li ga bana maboñok mabe ngandak. Kiki hihéga, ba ga ‘gwés moni,’ ba ga ‘yi bé ti mayéga,’ ba ga ‘bana bé hôtnyuu.’—2 Timôtéô 3:1-5.
Ngandak bôt i nkal le ibôdôl i nwii 1914, mam ma mbôña i nkoñ ’isi ma ñéba le Bibel i mpot mbale, ni le lisuk li nkoñ ’isi li yé bebee. Inyu kôhna biniigana bipe, béñge ño nkwel unu ni pulasi le: “Que révèle la chronologie de la Bible sur l’année 1914?” ni unu le: “Quel est le signe des derniers jours?”
Kii i buk ini le “masoola” i nkobla ikété Bibel?
Ikété hop u lôk Grikia, buk ini le “masoola” i nkobla le “léba” tole “yelel.” Libim li ngéda i mpôdôl mam ma bé ma sôli ndi ba bi sôk yelel mo. Bibel i mpôdôl yak “masoola ma Nwet le Yésu,” ma ma mbôña ngéda Yésu a nlo a ban-ga kunde i mélés mandutu ni bibéba bi mam bi mbôña hana ’isi ni i bom i bet ba mbégés Nyambe.—2 Tésalonika 1:6, 7; 1 Pétrô 1:7, 13.
Kaat i nsôk i ikété Bibel i gwé jôl le Masooola, inyule i yelel mam ma ga bôña i dilo di nlo. (Masoola 1:1) I kaat i i gwé miñañ milam ni nwin u botñem inyu bôt ba binam. (Masoola 1:3) I ñunda le Nyambe a ga héa ngitelepsép yosôna i yé munu nkoñ ’isi unu, a yilha hisi paradis. Ha ngéda i, bôt ba binam ba ga nok ha bé ndutu, to nyemb y’a ba ha bé.—Masoola 21:3, 4.
Baa u gwé ngôñ i yi minbônga milam mimpe mi yé i Bibel? Mbôgi Yéhôva y’a ba maséé i nigil Bibel ni we ibabé le u saa. U nla tilna bo nano ibale u ngwés.