Baa u nyi Yéhôva loñge loñge?

1. I ngéda di ñôt mahoñol mu yi ni pék i Yéhôva, ni minson nwé mi hélha, lelaa di ntehe bésbomede?

BAA u ma yoñ ngéda i wan ipam limbe likala Yéhôva a gwé pék ni mam ma hélha a mboñ? I ngéda u nhoñol Nhek woñ, baa u ntehe bé le u yé ntitigi i bisu gwé? Bebek, yak we u nhoñol kii ñôma Paul nu a bi kal le: “Éé kinje ndip lingwañ li Nyambe li yé, yak pék yé lôñni yi yé! Mbagi yé i nla bé wéna, yak manjel mé ma mbuma ñañ!”​—Rôma 11:​33, 34.

2. Kii i yis bés le di nla toi yi Yéhôva?

² To ibale di nla bé pam i yi mam momasôna inyu Yéhôva, di nla yaa yi umbe ntén Djob a yé. Kiñe David a bi kal man wé Salômô le: “Yéñ le u yi Nyambe nu isoñ, gwélél nye ni ñem u yôni . . . Ibale u nyéñ nye, a ga nwas le u yi nye.” (1 Miñañ 28:9) Ngandak nwii mbus, yak ñôma Yôhanes a bi hôñlaha lôk kéé yé hala, a kal bo le: ‘Di bi kôs pék le ndi di bana yi i nu a yé maliga.’ (1 Yôhanes 5:20) Yésu nyemede a bi kal le nu ni nu a gwé ngôñ i yi Isañ, a ga “yeelene [nye] njee Isañ a yé.”​—Matéô 11:27.

3. Kii di ga tehe munu yigil ini?

³ Ba bobasôna ba bi ti bomede nkikip yak Yéhôva ba ma nigil ngandak mam inyu yé. Ndi kekikel, d’a waa bé ‘nigil i yi nye.’ (Yôhanes 17:3; béñge note d’étude i homa nunu le “qu’ils apprennent à te connaître.”) Kiki hihéga, di nla nigil i yi kii i kônha nye maséé ni lelaa di nla lédés maada més ni nye. Munu yigil ini, di ga timbhe mambadga maa. Di nlama ôt mahoñol mu mambadga ma to di ngwélél Yéhôva ibôdôl behee, to di ntip bôdôl gwélél nye: I nigil i yi Yéhôva i nkobla le kii? Inyuki di nlama ke ni bisu i tibil yi nye? Lelaa di ga pam i boñ hala?

I NIGIL YI YÉHÔVA I NKOBLA LE KII?

4. I nigil yi Yéhôva i nkobla le kii?

⁴ Inyu nok kii i nigil yi Yéhôva i nkobla, di hoñol mam a bi bôn Lôk Yuda i i bi nyodi i minkôm, i Babilôn. A bi kal le: “Me ga ti bo ñem le ba bana ngôñ i yi me, i yi le me yé Yéhôva.” (Yérémia 24:7) Ibabé pééna, Lôk Yuda i i bi nyodi i minkôm i bé yi ngim mam inyu Yéhôva. Ndi inyu pam i tibil yi nye, i bé béda le ba gwés nye ni ñem wap wonsôna. Kaat yada i ntoñol i jam li, i nkal le: “Maselna ma yé ipôla i yi mam inyu Yéhôva ni i yi Yéhôva. Di nla hégha i jam li ni añ bikaat bi bi mpôdôl gwéha ni gwés mut.” I yi le Yéhôva a yé Nyambe ni i yi jôl jé, hala a kôli bé. Di nlama pam i yi bilem bilam bi Yéhôva.

5. Lelaa ñañ u Yôsia u nhôla bés i nok kii i yi Yéhôva i kobla?

⁵ I ngéda di nigil yi Yéhôva, di ga yi kii i nlémél nye ni kii i mbébél nye. Di yoñ le hihéga hi Kiñe Yôsia. Bibel i nkal le: “I nwii mi nyônôs 8 mi ane yé, to hala kiki a bé a ngi yii mañge, a bôdôl yéñ Nyambe nu sôgôlsôgôl wé David.” (2 Miñañ 34:3) Ndi Yôsia a bi nigil ndik bé i yi Yéhôva, a bi bii i mam a bé nigil i bibôñôl. Ni njel mpôdôl Yérémia, Yéhôva a bi kal inyu Yôsia le “a bé nit mbagi sép ni telepsép,” a kééhak hop u bôt ba nok ndutu ni u diyeyeba. Yéhôva a kônde le: “Baa hala bé nyen i mut a nkal le a nyi me a nlama boñ?”​—Yérémia 22:​15, 16.

6. Kiki kaat Tjémbi 9:10 i ñunda, i ngéda di nigil yi Yéhôva, hala a ntinde bés i boñ kii?

⁶ Añ Tjémbi 9:10. Kiki di nke ni bisu i yi Yéhôva, hala yak nyen di nkônde bôdôl nye ñem. I jam li jon li bi pémél ñôma Paul. I mok nwé mi nsôk iloole a nwo, a bi tila le: “Me nwo bé me nyuu. Inyule me nyi Nu me nhémle.” (2 Timôtéô 1:12) I mam Paul a bi nigil, a tehe ki, ma bi hôla nye i bôdôl Nyambe wé ñem bañga bañga. Note d’étude mu nlôñ kaat u, i nkal le: “Paul a bé nkwoog nkaa le Yéhôva a ga hoñol ndéñbe yé letee ni i kel i, hala wee i kel a ga tugul nye.”

INYUKI DI NLAMA LIGIP I YI YÉHÔVA?

7. Kii i nla pémél i mut nu a ngwélél Yéhôva ngandak nwii?

⁷ I ngéda di bi yi maliga, di bi boñ biliya ngandak i nigil yi Yéhôva. Ndi bebek kii ngéda i ntagbe, di mboñ ha bé i biliya bi. Inyuki? I ngéda di ñañ Bibel bésbomede tole di ñañ yo i makoda, i nla pam le di tehe ndik lelaa i nla hôla bés mu niñ yés tole lelaa di yé le di gwélél yo inyu hôla bôt bape. Hala a yé loñge inyule Bibel i nti bés makénd i boñ hala. (2 Timôtéô 3:​16, 17) Ndi Bibel i nsoolene ki bés ngandak mam inyu Yéhôva, Nwet Bibel. (Tjémbi 25:​8-10) Jon di nlama ndik bé béñge lelaa Bibel i nla hôla bés ni bôt bape, ndi di nlama yak badba le: ‘Kii hala a niiga me inyu Yéhôva?’a

8. I ngéda di nkônde yi Yéhôva, maada més ni nye m’a ba lelaa? (Tjémbi 73:​24-28)

⁸ I ngéda di nkônde yi Yéhôva, maada més ni nye ma nkônde let. Kii ’héga, kii di nhoñol inyu Yéhôva i ngéda di mal añ Bibel, di mal emble JW Nkuu Biliñgeliñge tole i mbus likoda li ndôn? Ngim mangéda, di yé di nôgda le di nkônde tiige bebee ni Tata wés nu ngii le Yéhôva. Inyuki? Inyule di nigil ngandak mam inyu yé, hala a ntinde ki bés i bégés nye ni i ti nye mayéga. Yak bés di nhoñol kiki ntôp tjémbi nu a bi kal le: “Nyambe a yé nu a nti ñem wem ngui, a yé ki ngaba yem i mba ni mba.” (Añ Tjémbi 73:​24-28.) I biliya gwobisôna di mboñ inyu nigil yi Yéhôva bi ntinde bés i kônde ti nye mayéga inyu nsima nkeñi di gwé i ba liwanda jé.

9. I ngéda di ‘nyéñ mahoñol’ ma Yéhôva, hala a ntinde bés i boñ kii? Ti hihéga.

⁹ I ngéda di ‘nyéñ mahoñol’ ma Yéhôva, hala wee i ngéda di mbigda i mam di nigil inyu yé, di ôdôk pék le maboñok més ma nla lémél nye tole ma nla mbébél nye, hala a nhôla bés i yoñ makidik malam. (Bingéngén 3:​5, 6) Di yoñ le hihéga: Ngandak lôk kéé i bôlôm ni i bôda i gwé fôtô i sobiina wap i homa bôlô, i posa yap tole i téléfôn yap. Hala a ntinde bo i hoñol sobiina wap hiki ngéda, i yoñ makidik ma ma nlémél sobiina wap, ni i nkeñgle mam ma yé le ma babaa bo. I ngéda yak bés di nhoñol Yéhôva, hala a ntinde bés i yoñ makidik ma ma nlémél nye.​—Tjémbi 19:​13, 14.

10. I ngéda di nkônde yi Yéhôva, d’a pam i boñ kii?

¹⁰ Di nla bana bilem bi Yéhôva inyule di bi héga i pôna yé. (Bibôdle 1:26) Kii di nke ni bisu i yi bilem gwé, hala yak nyen di nkôna nye. Yésu a bi kodol bayimbén ni Farisai inyule ba bééna bé bilem bi Yéhôva. Ba bé diihe disii di mam di Mbén ndi ba yanak “mam ma nlôôha nseñ ikété Mbén [ . . . ] kiki bo telepsép, konangoo ni ndéñbe.” (Matéô 23:23) Di nigle bañ i baéga base ba, ndi di boñ kii yosô di nla inyu tibil nok lelaa bilem bi Yéhôva bi nene mu Mbén ni matiñ a nti bés. Hala a ga tinde yak bés i hôlôs bilem bi.​—1 Yôhanes 4:​8, 11.

LELAA DI NLA PAM I YI YÉHÔVA?

11. Lelaa u bi nigil yi Yéhôva?

¹¹ Njee a bi hôla we i yi Yéhôva? Bebek, u bi néñél i lihaa li bikristen. Ibale hala, ba bi nlama añle we ngim miñañ mi Bibel mi mi ñunda bilem bilam bi Nyambe, ni lelaa bilem gwé bi nene mu mam a bi hek. Tole Mbôgi Yéhôva yada yon i bi niiga we Bibel. Ibale hala, bebek le a bi gwélél i kaat ini le Niñ ilam i boga ni boga! inyu hôla we i tehe lelaa bilem bi Yéhôva bi nene mu miñañ mi Bibel ni mu mam a bi hek.b (Néhémia 8:8; Minson mi baôma 14:17) Nano, di tehe lelaa di nla ke ni bisu i nigil yi Yéhôva.

12-13. I ngéda di ñañ Bibel, kii di nla nigil inyu Yéhôva? Ti hihéga. (Yérémia 39:​15-18) (Béñge yak titii i lipep li bisu.)

¹² Jam li bisu li li nhôla bés i yi Yéhôva li yé le di añ Bañga yé, di nigil ki yo. Ngim mangéda, Bibel i nsima bilem bi Yéhôva. (Manyodi 34:​6, 7) Ndi mangéda mape, i mpôdôl ndik mimañ mi bôt ni makidik ba bi yoñ. I ngéda u ñañ i miñañ mi, noode tehe kii mi niiga we inyu Yéhôva.

¹³ Di yoñ le hihéga. I ngéda u ñañ Yérémia 38:​6-13, u nigil le i man Étiôpia nunu le Ébed-Mélek a bi lo i hôla Yérémia. Ibabé pééna, u nla tehe lelaa yak we u yé le u kôna Ébed-Mélek, ñem wé ngui ni gwéha yé inyu bagwélél ba Djob. Ndi baa u ntehe yak bilem bi Yéhôva mu ñañ u? (Añ Yérémia 39:​15-18.) Kiki hihéga, mimbe minlôñ mi Bibel mi ñunda le Yéhôva a ndiihe nson mut a nsélél nye? Kii i ñunda le Yéhôva a nkéés ni telepsép, kii ki i ñunda le Yéhôva a ntodol bé bôt? Bimbe bilem bi Yéhôva bipe u nla léba mu ñañ u? Hiki ngéda u ñañ Bibel, badba le: ‘Kii i ñañ unu u niiga me inyu Yéhôva?’ I ngéda u nléba bilem bi Yéhôva mu ñañ u, ti nye mayéga, u kal ki nye ipam limbe likala u ngwés nye.

14. Kii di nlama boñ inyu tibil ôt nseñ ni mam Yéhôva a bi hek?

¹⁴ Jam li nyônôs iba li li nhôla bés i kônde yi Yéhôva li yé le di ôt pék mu mam a bi hek. (Tjémbi 145:​9, 10) Hala a nkobla le di héléé ndik bañ i béñge mam Yéhôva a bi hek, ndi di nlama boñ iloo ha. Bôt bahogi ba ntégbaha niñ yap yosôna i nigil mam Nyambe a bi hek kii bo binuga tole bibebela, ndi ba nkal le Nyambe a ta bé, nu nye a bi hek i gwom bi, ba nyi bé to bilem gwé! Ñôma Paul a bi kal le: “To hala kiki mut a nla bé tehe bilem gwé, bi nene loñge loñge ibale di nigil lelaa a bi hek nkoñ ’isi, inyule bi nene ni njel gwom a bi hek.” (Rôma 1:20) Ngobol Bibel yada i nkal mu nlôñ u le: “Mut a ñôt pék nyen a nla tehe bilem bi Nyambe.” Jon inyu tehe bilem bi Yéhôva mu mam a bi hek, di nlama tibil ôt pék.

15. Kii Patrick a bi boñ inyu kônde yi Yéhôva, lelaa yak we u nla nigle nye? (Béñge yak titii.)

¹⁵ Ngandak ikété yés i niñ i bitison bikeñi i het bibebela, to binuga bi ntôl bé. Ibale yak we u nyééne i tison, baa u nla ôt pék mu mam Yéhôva a bi hek inyu pam i yi nye? Di yoñ hihéga hi Patrick, nu a yé i Brazzaville, nyañ nkoñ nu Kôñgô. A nkal le: “I ngéda me yé i libebe li ndap yem, me nyéñ ngim yom Yéhôva a bi hek, i me nla memle. Me yé me tehe bitandi tole dinuni di di nyéñ bijek tole di di mbôñgôl homa di nañle. Kel yada, me bi tehe dinuni di mbôngôl jumbul jap, di bé di yoñ ngim gwom mu mbédgé inyu oñ loñge jumbul ni i ha bon bap mu.” Ndi Patrick a bi héléé bé i béñge dinuni di, a bi yoñ ngéda i ôt pék, a tehe lelaa i bon ba bihégél ba, ba niiga nye ngandak mam inyu Yéhôva ni i kôôge nye bebee. A nkal le: “Me bi nigil le Yéhôva a ntôñ toi bihégél gwé, yak bi bi yé disisii di nla yan. Hala a nkwés me nkaa le a ntôñ yak me, a’ ti ki me mam ma mbéda me.”

16. Kii i bi hôla Maria i kônde yi Yéhôva, lelaa yak bés di nla nigle nye? (Béñge yak titii.)

¹⁶ Jam li nyônôs aa li li nhôla bés i kônde yi Yéhôva li yé le di hoñol lelaa Yéhôva a ma hôla bés. I jam li jon Maria, nyañ Yésu, a bi boñ. A bé yi Yéhôva loñge loñge, ‘a lémlak [nye].’ (Lukas 1:30) Ndi Yéhôva a bi bééga nye nson nkeñi kiyaga, won u bé le a ba nyañ Man Nyambe! Yéhôva a bi om añgel Gabriel le a ti nye makénd, a gwélél yak Élisabet, mut wé lihaa, inyu ti nye makénd. I mbus ngéda, Maria a bi ôt pék mu makénd Yéhôva a bi ti nye, a nigil ngandak mam inyu Yéhôva. A nigil le a gwé ngui iloo ’héga, a nkônôl bôt ngoo, a ntodol bé bôt, a ngwés bôt bobasôna, yak i bet bôt bape ba nyan. (Lukas 1:​46-55) Maria a bi kon maséé ngandak ni mahôla ma Yéhôva. Yak bés di ti nye mayéga i ngéda a nhôla bés “i loñge ngéda.” (Lôk Héber 4:16) I ngéda a nhôla we, badba le: ‘I bisai bini bi niiga kii me inyu Yéhôva?’ Bimbe bilem bi Yéhôva bi nene mu?’

DI GA WAA BÉ NIGIL I YI YÉHÔVA

17-18. Inyuki di ga waa bé nigil i yi Yéhôva?

¹⁷ Hégda nwii nwañen di ga boñ ndik inyu nigil i yi Yéhôva i mbok yondo. Di ga kôhna minhôôk mi bikaat mi mondo mi mi ga hôla bés i yi kii a gwé ngôñ le di boñ. (Masoola 20:12) Di ga kônde bana pôla i memle bihégél iloo nano. (Yésaya 11:​6-9) Di ga bana ngandak manjel mape inyu kônde yi Yéhôva. Kiki hihéga, i ngéda di ga tehe nye a ntugul mawanda més ni bôt bés ba lihaa, di tehge lelaa a ga yilha bés peles, di ga kônde yi nye.

¹⁸ Di ga waa bé nigil i yi Yéhôva kekikel. A niñ i boga ni boga, jon “yi yé i gwé bé nwaa.” (Tjémbi 90:2; 147:5) Di “ga yi bé bibôdle to lisuk li nson u bañga Nyambe.” (Ñañal 3:11) To di ma tégbaha nwii nwañen i ntôñ, di gwélél pôla di gwé inyu kônde yi Tata wés nu gwéha le Yéhôva.