Kaat Yésaya i nla hôgbaha we

1-2. Lelaa Yéhôva a nhôla bés i ngéda ndutu i nkwél bés?

HÉGDA le i jam lini: Mañge a nai ni maéya. Ngim jam i ntééñga nye. Bebek a ñee inyule bagwal bé ba nkit le ba mbôô, ba kee i yén haa ni mawanda mé. Tole mandaa mé momede mon ma ntééñga nye. Ha ngéda i, kii nyañ nu gwéha a nla boñ? A ga hôôba man, a emble nye mu kii a ntoñle nye jam li ntééñga nye, a kal ki nye le a ngwés nye.

² Ikété Bibel, Yéhôva a nhégha nyemede ni muda nu a ngwés man, a bôôhege nye. A nkal le: “Kiki nyañ man a mbôôhe man wé, hala nyen me ga bôôhe bé.” (Yésaya 66:13) Gwéha Yéhôva a gwé inyu yés i nloo gwéha bagwal ba gwé inyu bon bap huum. (Yésaya 49:15) I ngéda di nimis makénd tole di nok ndutu, Yéhôva a ngwélél Lipôdôl jé, hala wee Bibel, inyu hôgbaha bés; a nti ki bés ngui di gwé ngôñ.​—Rôma 15:4.

3. Kii di ga tehe munu yigil ini?

³ Kaat Yésaya i nti bés hogbe i i nlôl ni Yéhôva nyemede. (Yésaya 40:1) Tata wés nu gwéha nyen a bi boñ le i kaat i, i tilba inyu hôgbaha litén jé, Lôk Yuda, i ngéda mandutu ma bé kwél bo. Yak bés i len ini, di gwé ngôñ ni hogbe inyule di niñil i ‘mangéda mabe, ma bak ki nledek kiyaga’. (2 Timôtéô 3:1) Munu yigil ini, di ga tehe minlôñ mi Bibel minhogi mi kaat Yésaya, mi mi ga mômôs miñem nwés, mi lédés ki bés: (1) I ngéda mam ma nhéñha kunda yada i niñ yés, (2) i ngéda kiññem i nlôôha kéés bés, (3) i ngéda di nok njôghe inyule di nimis mut di gwéhék.

I NGÉDA MAM MA NHÉÑHA KUNDA YADA

4. I ngéda mam ma nhéñha kunda yada, kii di nla hoñol?

⁴ Niñ yés i nla héñha kunda yada. (Ñañal 9:11; 1 Korintô 7:31) Mpuhge kon, mahéñha ikété ntôñ, minyiñgha mi m’bô, tole liyep bi nla pémél bés i ngéda di bemek bé. Hok ngéda, i mahéñha ma, ma nla yumus bés. Ha ngéda i, hala a ta bé béba i badba le: ‘Nano ni, me kee hee? Me boñ laa?’ Mankéé wada le Joseph, nu a bi sal 17 nwii i Bétel a témb a yila nsañal nu ngéda yosôna, a nkal le: “Me bé nnimlak. Hala a bé ndutu ngandak i bôdôl niñ ipe me ma salak ngandak nwii i Bétel. Me bé yi hee me bôdle. I ngéda mam ma nhéñha hala kunda yada, lelaa Yéhôva a ngwélél kaat Yésaya inyu hôgbaha bés?

5. Kii Yéhôva a mbôn bés? (Yésaya 42:16; Béñge yak titii.)

⁵ Añ Yésaya 42:16. Yéhôva a mbôn le a ga éga bôt ba ndim i njel ba maa bé kil. A ga boñ ki le jiibe li yila mapubi i bisu gwap. I ngéda mam ma nhéñha kunda yada, hala a yé a yumus bés, a yé wengoñle di yé “ndim,” tole di nke mu “njel [di] maa bé kil,” i “jiibe,” tole mu “hisi hi hi gwé ngok.” I bibuk bi, bi ntibil unda woñi di nla bana inyu mam ma nla pémél bés yani. A yé ndik wee di yé i kil i ñem u lipan ndi di nyi bé imbe njel di yoñ. Ndi Yéhôva a mbôn bés le to imbe ndutu di mboma, a ga tjôô bé bés kekikel, a ga éga bés. A ga gwel bés i woo, a yébés bés bahoma ba jiibe, hala wee mangéda més mabe; a tibil njel yés, a béyéi ki yo inyu boñ le di bômda bañ. Lelaa Yéhôva a mpam i boñ hala? A ngwélél Bibel ni ntôñ wé inyu ti bés maéba malam. (Tjémbi 119:105; Yésaya 30:21) A ngwélél yak lôk kéé ni bôt bape inyu hôla bés. To ibale njel di nyoñ i nlet i noñ, tole di nimil mu njel, di ba nkwoog nkaa le kiki Yéhôva a yé Djob li gwéha, a ga nok bés, a hôla ki bés.​—Yésaya 41:10; 1 Pétrô 5:​6, 7.

6. Ibale mam ma nhéñha kunda yada i niñ yoñ, u nla ba nkwoog nkaa ni kii?

⁶ Joseph, nu di mbôk di sima, a ntoñol lelaa nye ni nwaa ba bi tehe lelaa Yéhôva a ñunda bo gwéha, lelaa a bi nit bo i ngéda ba bi nyodi i Bétel. A nkal le: “Di bi tehe woo u Yéhôva ni gwéha yé i ngéda di bi nyodi i Bétel. A bi gwélél lôk kéé i bôlôm ni i bôda inyu nit bés. A bi hôla bés i pes minsôn ni i pes mahoñol i ngéda di bééna toi ngôñ ni mahôla; yak i len lini, a nke ni bisu i boñ hala.” Ibale niñ yoñ i nhéñha kunda yada, yak i ngéda u nhoñol le u ta bé le u pamba, ba nkwoog nkaa le Yéhôva a ga nit we, a’ ti we ngui i mbéda we, a unda ki we njel u nlama nôñôl. (Yésaya 54:10; 58:11) Joseph a nkônde le: “Mu hiémbi hiés hiada hi ngembe nsik, di nléba bibuk bini le: ‘Kii i mbem me yani, me nla bé yi; to la, me gwé bé jam i kon woñi.’a Ñ, to ibale mam ma mbôña bé kiki di hoñlak, di nla ba nkwoog nkaa le Yéhôva a ga ba ni bés mu njel.”

I NGÉDA KIÑÑEM I NLÔÔHA KÉÉS BÉS

7. Kii ngandak bôt i nhoñol inyu bibéba ba bi boñ behee?

⁷ I ngéda di mboñ béba ikeñi, di nkôs mahôla ma mimañ, di mboñ ki biliya le di kwo ha bañ mu béba i. (Bingéngén 28:13; Yakôbô 5:​14-16; 1 Yôhanes 1:9) Ndi ngim mangéda, to ibale di nyi yaga le Yéhôva a nwéhél bés, kiññem i nla ke ni bisu i kéés bés. Di nla bôdôl hoñol le: ‘Lelaa Yéhôva a yé le a nwéhél me, me ma boñ i nya béba ini?’ (2 Korintô 2:7) I mahoñol ma, ma ta bé mabe inyule i béba i, i nla ba ndutu ngandak i begee, hala a nla ki ba nledek jam i hôya yo. Kiñe David a bi kal le: “Me bi boñ béba, inyu hala nyen me ta bé nwee. Njôghe yem i nai, i nyugut mensôna.” (Tjémbi 38:​3, 8) Ibale hala nyen yak we u yé u nhoñol inyu bibéba u bi boñ behee, kaat Yésaya i nla hôgbaha we.

8-9. Kii kaat Yésaya 1:18 i niiga bés inyu nwéhél i Yéhôva?

⁸ Añ Yésaya 1:18. Yéhôva a ngwélél titii i ngui inyu unda bés ipam limbe likala a nwéhél bagwélél bé. A nkal le to ibale bibéba gwés “bi nkôyôp kiki matjél,” a ga boñ le bi “pôp kiki libu li lisuni.” Matjél ma nkôyôp ngandak, kayéle i ngéda ma yé mu mbot, hala a yé ndutu ngandak i héya mo. Ndi Yéhôva nye a mbôn bés le i ngéda a nwéhél bés, a nsas bibéba gwés gwobisôna. Jon, bibéba di bi boñ behee bi nlama ha bé tét bés nano.

⁹ Di yoñ le hihéga hi Kiñe David. Tolakii a bi ke i ndéñg, a nol ki mut, Yéhôva a bi nwéhél nye, a kal yak i mbus ngéda le David a loñge mut, a téé ki sép. (2 Samuel 11:​3, 4, 14, 15; 12:13; 1 Bikiñe 9:​4, 5) Yéhôva a bé béñge bé bibéba bi David ndi a bé tehe nye kii mut le a ngwélél nye ni ñem u maliga. Yak bés, i ngéda di ntam bibéba gwés ni ñem wés wonsôna kiki David, Yéhôva a nwéhél bés, a hôla ki bés i bana kiññem i mpôp. Imbe hogbe ipe di nla léba mu kaat Yésaya i ngéda kiññem i nlôôha kéés bés?

10. Bimbe bibuk bi nhôgbaha bés i kaat Yésaya 38:17?

¹⁰ Añ Yésaya 38:17 ni buk isi lipep. I bibuk bini le “u bi lep bibéba gwem gwobisôna i mbus yoñ,” bi nla ki koblana le “u bi héya bibéba gwem gwobisôna i mis moñ.” Di hégda lelaa Yéhôva a nyoñ bibéba bi mboñbéba nu a ntam, a lep gwo i mbus yé i het a ga tehe ha bé gwo kekikel, to hoñol a ga hoñol bé to gwo. Kaat ndoñi bibuk yada i nkal le i nlôñ u, u nla ki kobla le: “U mboñ ndik wengoñle [bibéba gwem] bi ma ba bé.” Jon i ngéda Yéhôva a nwéhél bés, inyu yé, a yé wengoñle di ma boñ bé béba. I ngéda Yéhôva a nwéhél bés, a nlôô ha bé mu bibéba di bi boñ inyu ôm bés nsohi tole inyu kogse bés. I maliga, a yé a sas gwobisôna mu boña wé. A mbôn le: “Me ga hoñol ha bé to maboñok moñ mabe.” (Yésaya 43:25) Kinje bibuk bi nhôgbaha! Ibale Yéhôva Bayemlikok a nhoñol ha bé bibéba gwés, bés di yé bonjee le di hoñol gwo?

11. To ibale di bi boñ bibéba behee, kii Yéhôva a mbéñge? (Béñge yak titii.)

¹¹ Hiki ngéda kiññem i bôdôl kéés bés inyu bibéba di bi boñ behee, di hoñol mam momasôna Tata wés nu gwéha a mbôn bés. A nwéhél toi bés, a mboñ ki hala ni ñem wonsôna. A nwél bé bés nyuu inyu bibéba di bi boñ behee, a ta bé to kiki bôt ba binam ba ba ntéédana bape diun. (Yésaya 57:16) I yom Yéhôva a mbéñge i ta bé i mut di bé behee, ndi i mut di yé len, ni i mut d’a liya i ba yani. (Yésaya 55:7) Kinje Djob li gwéha ni li konangoo di ngwélél! Jon kekikel, di nwahak bañ le i béba di bi boñ behee bi nimha bés maséé més, di nwahak bañ to le bi kéñ bés i bana bisai bi boga.

I NGÉDA DI NIMIS MUT DI GWÉHÉK

12. Kii di nla kahal hoñol i ngéda di nimis mut di gwéhék?

¹² I ngéda i mut di gwéhék a nwo, ndutu i nla pat bés ñem i nya i mpala bé to mal. Ngim mangéda, bôt bahogi ba yé ba badba inyuki Yéhôva a nwas le mut wap a wo. Kel yada, hié hi bi ligis bagwal ba mankéé Michael, ba wo. A nkal le: “Hala a bi pat me ñem, me unbene Yéhôva inyule a bi nwas le bagwal bem ba wo. Me bé yi le Yéhôva bé nyen a nol bagwal bem, ndi a bi kéñ bé i jam li.” Bebek le yak we u ma hoñol hala. I ngéda i nya ndutu i i nkwél we, lelaa Yéhôva a yé le a hôla we, imbe botñem a nti we?

13. Umbe mbônga Yéhôva a nti i kaat Yésaya 25:8?

¹³ Añ Yésaya 25:8. Yéhôva a mbôn le a ga “mélés nyemb i boga ni boga.” Hégda i ngéda nyemb y’a ba ha bé! Di ga ee ha bé kekikel inyule i mut di gwéhék a nwo. (Yésaya 35:10) Njôghe y’a pat ha bé we ñem inyule w’a tehe ha bé bisoñ bi ntima. Di gwé i mbônga unu le di ga témb di tehe bôt bés ba ba bi wo, ba ga lo i bitugne, ba bak mbôô. I mbônga u, u ta bé dingaana ndi Yéhôva nyemede nyen a mboñ wo, ndik nyetama nyen a nla toi yônôs wo.​—Masoola 21:​4, 5.

14. Kii u nôgda i ngéda u nhoñol mbônga u bitugne? (Yésaya 26:19) (Béñge yak titii.)

¹⁴ Añ Yésaya 26:19. Yéhôva a ga mélés ndik bé nyemb, ndi a ga tugul yak bôt bés ba ba bi wo. A nkal inyu yap le: “Mim mi bôt bem mi ga telep.” Hala a ñunda le Yéhôva nyemede a ga yoñ mam i moo, a ntééda bo i boña wé. A ga tugul bo i ntéak wé ngéda. Ibale bibebela bi nwo, manwee ma nla boñ le bi témb bi oo. Hala nyen yak Yéhôva nu a nti niñ a ga boñ, a ga tôdôl ba bobasôna ba bi ke ’ilo nyemb. Ngand yon y’a ba yokel inyu leege bo!​—Béñge yak Markô 5:42.

15. Lelaa mbônga u bitugne u nhôla bés i ngéda di nimis mut di gwéhék?

¹⁵ I yé maliga le mbônga u bitugne u mélés bé ndutu yés, ndi hala a nhôgbaha bés i yi le Yéhôva a nhôya bé bôt bés ba ba bi wo. I mbônga u won u nlédés Michael, nu di ntip sima. A nkal le: “Yésaya 26:19 a nhôla me i nok le Yéhôva a ngwés bagwal bem tôbôtôbô, a ntééda bo i boña wé. A nke ni bisu i hoñol bo letee a tugul bo i ntéak wé ngéda. Hala a nhôgbaha me, a tinak me ngui.” Yak bés, di bok mahoñol més mu mbônga u bitugne hiki ngéda. Ibale di mboñ hala, ndutu yés i ga lôôha bé yuu bés.

16. Umbe nlôñ Bibel u nla hôgbaha we i ngéda ndutu i nyuu we?

¹⁶ Munu yigil ini, di nwan minlôñ mi kaat Yésaya minhogi, mi mi nhôgbaha bés téntén i ngéda mam ma nhéñha kunda yada, i ngéda kiññem i nlôôha kéés bés, ni i ngéda di nimis mut di gwéhék. Di nti Yéhôva mayéga kiyaga inyule a nhôgbaha bés, a gwéélak Bañga yé inyu mômôs miñem nwés! (Tjémbi 94:19) Baa u ntehe nlôñ Bibel u u nla hôgbaha we? Tééda wo i mahoñol, tila wo homa, tole péni wo i ngim homa i het u ga hoo tehe. Di nsoohe le minlôñ mi Bibel mini mi ti we hogbe i i nlôl yak Tata wés nu gwéha le Yéhôva.