Kônde lédés maada moñ ni Yéhôva ibale u nkit le u mboñ suklu ikeñi

1-2. (a) Ibale u mpohol i kena suklu ni bisu, kii u nlama téñbe i boñ? (b) I bibuk bini le “di kilak ndigi ikété oda mu nlélém njel” bi nkobla le kii? (Filipi 3:16)

BAGWÉLÉL ba Yéhôva bahogi ba bi kit le ba mboñ bisuklu bikeñi i mbus Bacc. Ba nhoñol le i suklu i, i nla hôla bo i léba loñge bôlô i i ga ti bo likala li kel, i hôla ki bo i gwélél Yéhôva i nya i yôni. Ibale u nhoñol le w’a kena suklu ni bisu, kii u yé ni le u boñ inyu tééda maada moñ ni Yéhôva? (Yakôbô 4:8a) Ibabé pééna, u bi boma mandutu ma ma bé le ma tômbôs hémle yoñ i suklu ilole u nkôs Bacc. Nano, u nlama ‘ndik kil ikété oda mu nlélém njel,’ hala wee u nlama ke ni bisu i gwélél Yéhôva kiki u ngi boñok nano.​—Añ Filipi 3:16.

² I bibuk bi Grikia bini le “di kilak ndigi ikété oda mu nlélém njel” bi mbéna gwéélana inyu pôdôl liké li bisônda bi bi nkiha ntôñ ibabé le bi telep tole bi témb ni mbus. Ibale u nkit le u mboñ suklu ikeñi, “kilak ndigi ikété oda mu nlélém njel” i nson u Yéhôva, ibabé le u telep, to témb ni mbus. Munu yigil ini, di ga pôdôl matiñ ma Bibel ma-na ma ma ga hôla we. I matiñ ma, ma tane bé we nkén. U mboñ biliya i noñ mo, ndi u nlama ke ni bisu i noñ mo i ngéda u ga ke i boñ suklu ikeñi, yak i ngéda u ga mal yo.

TÉÉDA BILEM GWOÑ BI MBUU

3. Ibale u nkena suklu yoñ ni bisu, mambe mandutu u nla boma?

³ Ndutu. Suklu ikeñi i ga héñha niñ yoñ, u ga bana ngandak mam i boñ hiki kel, ma ma yé le ma yoñ we libim li ngéda. Bebek, kiki u gwé ngôñ i sal loñge i suklu, i nla pam le u diihe ha bé nson woñ inyu Yéhôva. U yé yak le u bôdôl tôl makoda, likalô, u yoñ ha bé ngéda i nigil, to soohe.​—Masoola 2:4.

4. Kii i yé le i hôla we i bana “ngandak mam i boñ i nson u [Yéhôva]”? (1 Korintô 15:58)

⁴ Añ 1 Korintô 15:58. I ngéda mut a nyi luk baskô, i ndéñgés bé nye. Yak bés, ibale di nyi gwélél ngéda yés, di ban-ga “ngandak mam i boñ i nson u [Yéhôva],” yom yo ki yo i ga ndéñgés bé bés. Hala a mbat ndik bé le u tégbaha ndék ngéda i gwel minson mi mbuu, ndi nwon mi nlama ba jam li bisu i niñ yoñ. U hôiga bañ le u nlama ndugi ba ngwélél Yéhôva, suklu yo i nlo i mbus. (Matéô 22:37) Sita yada le Samantha a nkal le: “Me bi yoñ makidik ma ngui le ibale suklu yem i nkéñ me i gwélél Yéhôva kiki i mbéda, me ntéé yo.”

5. Kii u yé le u boñ inyu pagap ni nson u Yéhôva?

⁵ Kii u yé le u boñ ilole u nke i suklu ikeñi? U hôiga bañ le maada moñ ni Yéhôva mon ma nlôôha nseñ. Badba le: ‘Bimbe bitelbene me nyoñ inyu boñ le me bana lem i boñ yigil yem Bibel, le me tôl bañ makoda, to likalô?’ (Yôsua 1:8; Matéô 28:​19, 20; Lôk Héber 10:25) Hoñol ki: Lelaa u bé pamba ni mam ma mbuu nyoo suklu ilole u nkôs Bacc? Ibale u nhoñol le ngim mam i yé le u bé lama kodol, kii u yé ni le u boñ nano, le mam ma kee loñge? Yoñ makidik i pagap ni nson u Yéhôva kiki u nke i suklu ikeñi. Sal loñge i suklu, ndi u nwahak bañ le suklu i yoñ we ngéda yoñ yosôna kayéle u bana ha bé ngui, to ngéda i lédés maada moñ ni Yéhôva.a​—Matéô 6:24.

6. Mambe mambadga u yé le u badba inyu yi too u ngi biak nson u Yéhôva i bisu? (Béñge yak titii.)

⁶ Kiki u nkena suklu yoñ ni bisu, hiki sôñ témb yén, u wanba. Badba le: ‘Baa maada mem ni Yéhôva mon ma yé jam li bisu i niñ yem?’ Yimbe mam ma nla kéñ we i boñ hala. Kii ’héga, baa u mbéna tôl makoda tole u mbéna sôk mo? Baa u mbéna hoñol bibôlô ba nti we i suklu i ngéda likoda li ntagbe, tole u ntégbaha ndik makoda ni njel internet iloole u kodba ni lôk kéé yoñ i ndap Ane? U nla ki badba le: ‘Baa me ngi soohege, me añak Bibel kiki me bé boñ behee? Baa me nke i likalô ndik inyule “me boñ laa,” me gwéhék ki le li hoo mal?’ Ibale u ntimbhe ndik to mbadga yada mu le “ñ”, pala boñ mahéñha. U nwahak bañ le suklu yoñ i tinde we i bii nson u Yéhôva i mbus.

“YI WAN MAM”

7. Lelaa suklu ikeñi i yé le i héñha mahoñol moñ?

⁷ Ndutu. I nla pam le suklu ikeñi u mpohol i bôdôl niiga we “pék i bôt lôñni biyôglô bi malôga.” Kii ’héga, ba nla niiga we le Nyambe a ta bé ni le mam ma bi lo ni momede. (Kôlôsé 2:8) Suklu yoñ i nla ki tinde we i lôôha bôdôl wemede ñem. Njohok mankéé wada u nkal le: “Ba bé niiga ndik bé bés makeñge ma bôlô; ndi ba bé ba niiga yak bés i tehe mam nya ipe ndi i litehge li, li bé kiha bé ni litehge li Yéhôva. Kii ’héga, ba bé kal bés le inyu boñ le di laa pamba munu niñ ini, di nlama bôdôl bésbomede ñem. I jam li, li bi boñ le me bii Yéhôva ipañ. Hala a bi kahal lédél me i bôdôl Yéhôva ñem.”

8. Inyuki i yé nseñ ngandak le “u yi wan mam”? (Bingéngén 5:​1, 2)

⁸ Añ Bingéngén 5:​1, 2. Bibel i nkal we le u nlama “yi wan mam,” inyule Satan ni nkoñ ’isi wé ba nwaa bé noode héñha litehge joñ li mam. (1 Pétrô 5:8) Nkoñ ’isi u nla boñ le u yi ha bé maselna ipôla loñge ni béba, u nla yak tinde we i bôdôl pééna i yom Bibel i nkal inyu bibôdle bi niñ ni i pééna le Djob a yé. Bôt ba nkoñ ’isi ba ngwés le u bana i nya mahoñol i, inyu unda le u “nyi kaat ngandak,” ndi njel pék bé i. I mahoñol ma, ma yé “bijôñ inyu Nyambe.”​—1 Korintô 3:​18-20.

9. Kii u nla boñ inyu unda le u nyi wan mam?

⁹ Kii u nla boñ ilole u nke i suklu ikeñi? Inyu unda le u nyi wan mam ilole u nke i suklu ikeñi, ba nkwoog nkaa le i yom Bibel i nkal yon i yé maliga. Badba le: ‘Inyuki me nhémle le Djob a yé? Kii i nkwés me nkaa le Bibel i yé toi Bañga yé? Kii i nyis me le i yom Bibel i nkal inyu loñge ni béba i nloo i yom nkoñ ’isi u nhoñol huum?’ Hoñol ki: Yak i ngéda u bé ngi kôs Bacc, u bi meya u nok i yom bôt ba nkoñ ’isi unu ba nhoñol. Baa hala a bi boñ le u hémle ha bé le Djob nyen a yé ni le nyen a bi hek mam momasôna? Baa i ngéda baudu ba suklu ba bé boñ mam mabe, yak we u bééna ngôñ i boñ kiki bo? Ibale u nhoñol le u bé le u kodol ngim mam ha ngéda i, lelaa ni u yé le u kônde lédés hémle yoñ nano? Ibale u mpohol le u nke i suklu ikeñi, yoñ makidik le w’a téñbe i yi wan mam.b​—2 Timôtéô 2:​16-18.

10. Kii ipe u nla boñ inyu unda le u nyi wan mam?

¹⁰ Kiki u nkena suklu ni bisu, bana lem i wanba. Badba le: ‘Baa yak me, me nkahal gwés mam mabe bôt bape ba mboñ? I ngéda ba niiga me biyôglô bi mam, baa me nla yimbe le i biniigana bi, bi yé mahoñol ma bôt ba binam? Baa me yé toi nkwoog nkaa le ndik Ane Nyambe yon i ga mélés mandutu ma bôt ba binam?’ Inyu kônde yi wan mam, kee ni bisu i nigil Bañga i Djob. Ibale u ntééda lem i nigil Bibel ni i ôt pék mu, hala a ga kônde kwés we nkaa le wen u gwé maliga.​—1 Timôtéô 4:15.

TIBIL GWÉLÉL NGÉDA YOÑ

11. Inyuki i yé loñge le u tibil gwélél ngéda yoñ i ngeñ u mboñ suklu ikeñi?

¹¹ Ndutu. Suklu ikeñi i nla yoñ we ngandak ngéda téntén ibale u nkôôba makégse tole ibale ba nti we bôlô ipe nyoo suklu. Ibale u ngwélél bé ngéda yoñ loñge, u ga tomb, u bana ki ngandak nduña inyule u ga bana mam ngandak i boñ. Jon, u jôha bañ ni mbôô woñ i pes minsôn ni i pes mahoñol.

12. Inyu unda le u ‘ntibil yaga yi gwélél ngéda yoñ,’ mambe mam u nlama boñ? (Éfésô 5:​15, 16)

¹² Añ Éfésô 5:​15, 16. Hala a nla ba we ndutu i ‘tibil gwélél ngéda yoñ’ inyule u gwé ngandak mam i boñ. Kii ’héga, suklu yoñ i yé nseñ ndi i nlôôha ba nseñ le u tégbaha ngéda ni lôk kéé yoñ, yak ni lihaa joñ. (Tjémbi 133:1; Bingéngén 18:1) Mam ma mbuu mon ma nlama ba jam li bisu i niñ yoñ. (Matéô 6:33) Bebek, u gwé bôlô, u nlama ki hôla lihaa joñ. U nlama yak yoñ ndun ni mbôô woñ, u nlama yoñ ngéda inyu noi, u nlama ki hianda minsôn. (Ñañal 4:6; 1 Timôtéô 4:8) Inyu boñ i mam ma momasôna, u nlama yaga tibil gwélél ngéda yoñ.

13. Kii u nla boñ inyu tibil gwélél ngéda yoñ?

¹³ Kii u yé le u boñ ilole u nke i suklu ikeñi? Bibel i nkal le mam ma ga ke loñge inyu mut nu a ñôt pék ilole a mboñ jam. (Bingéngén 21:5) Ni i jam li i mahoñol, tibil tjek mam ilole u mbôdôl suklu. Inyu pam i boñ hala, hoñol ki: Baa u bé tibil gwélél ngéda yoñ i suklu ilole u nkôs Bacc? Ibale u nhoñol le u bé le u kodol ngim mam ha ngéda i, mambe mam u nla ni boñ nano? Yoñ makidik ma ngui le wen u énél ngéda yoñ, ndi he bé le ngéda yoñ yon i énél we.c

14. Mambe mambadga ma ga hôla we i wanba?

¹⁴ Kiki u nkena suklu ni bisu, bana lem i wanba. Badba le: ‘Baa ntjega wem u ñume me le me noi ni i hianda minsôn? Baa i ntjega u, u nti me pôla i ba ni lôk kéé i bôlôm ni i bôda? Baa me mpam i boñ bibôlô ba nti me i suklu? Ibale to, baa hala a yé inyule me gwé toi ngandak mam i boñ, tole me yé me mbem ndik manut ma nsôk inyu boñ mo? Baa mawanda mem tole bôt bem ba lihaa ba ntehe le me nlama lona mahéñha mu ntjega wem?’ Ibale u ntehe le u nla lona mahéñha mu ntjega woñ tole ibale u nôgda le wen u nlama noñ ntjega u bi téé, pala boñ mahéñha. U yé yak le u kwel ni bôt bape ba ba nyi gwélél ngéda yap inyu boñ le ba ti we maéba mu jam li.​—Bingéngén 11:14.

KEE NI BISU “I HIÔM NI BÔT BA PÉK”

15. Kiki u nke ni bisu i boñ suklu, imbe ndutu ipe u yé le u boma?

¹⁵ Ndutu. Bana baudu bape ba yé le ba naña we i tégbaha loñge ngéda ni bo. Bebek, u yé le u bana ngôñ i ba ni bo inyule bisega gwoñ bi, u ntégbaha yak ngandak ngéda i suklu ni bo, we ni bo ni ngwés bebee le minlélém mi mam. U nla yak kal le we ni mawanda moñ ma suklu ni gwé bilem gwada iloo ni lôk kéé yoñ i likoda. Ndi u nlama yoñ yihe. To ibale ni yé i ndap suklu yada, u nlama bé hoñol, to boñ mam kiki bo inyule we u gwé ngôñ i lémél Yéhôva. Kiki u ntégbaha ngéda ni bo, hala nyen yak we u mba u ntehe mam kiki bo. (1 Korintô 15:33) Michael, nu a bi nigil maléktrik nwii mina, a bi tehe le i jam li, li yé maliga. A nkal le: “Me bé tégbaha iloo 40 ma ngeñ hiki sonde ni mawanda mem ma bôlô ma ma bééna bipôdôl bi mpuñgu, ba bé emble nsik u u ta bé loñge inyu bikristen, ba yanak bôda.” Bipôdôl gwap ni maboñok map bi bi bôdôl yoña me ndék ni ndék.

16. I ‘hiôm ni bôt ba pék’ i nkobla le kii? (Bingéngén 13:20)

¹⁶ Añ Bingéngén 13:20. Bibel i mbéhe bés le di yoñ yihe ni bilôñ bibe. Ini pes ipe, “i mut a nhiôm ni bôt ba pék a’ bana pék.” Hala a niiga bés le i bôt bés ni bo di nkiha ba nla tinde bés i boñ loñge tole béba. Jon pohol mawanda ma ma nyéñ loñge yoñ, hala wee ba ba ngwés Yéhôva ni ñem wap wonsôna kiki we.​—Tjémbi 101:​6, 7; 119:63.

17. Kii u yé le u boñ inyu keñgle bilôñ bibe?

¹⁷ Kii u yé le u boñ ilole u nke i suklu ikeñi? Ôt pék mu ntén maada u gwé ngôñ i bana ni baudu ba suklu, u tééne ki wemede minwaa. Mankéé Trenton a nkal le: “Me yé me ba liyômba ni baudu ba suklu ndi me ntégbaha bé ngéda ni bo i mbus suklu. Me ntehe ndik bo kiki basolôñ bem ba suklu ndi ha kiki mawanda mem ma ñem nyuu bé.” Ndi we, kii w’a boñ inyu ba nkwoog nkaa le u ntégbaha bé ngandak ngéda ni bo, u nyoñ bé to bo kiki mawanda ma ñem nyuu? Inyu timbhe i mbadga i, hoñol ki: Mimbe minwaa u bé tééne wemede i suklu ilole u nkôs Bacc? Ibale u nhoñol le u bé le u kodol ngim mam ha ngéda i, mambe mam u nla ni boñ nano? Yoñ makidik ma ngui i ke ni bisu i ‘hiôm ni bôt ba pék’ ni i keñgle mawanda ma pôs biye, ma ma ngwés bé Yéhôva.d

18. Mambe mambadga u yé le u badba mu kii u nkena suklu yoñ ni bisu? (Béñge yak titii.)

¹⁸ Bana lem i wanba mu kii u nkena suklu yoñ ni bisu. Badba le: ‘Baa me nkahal bana maada ma bas bas ni baudu ba suklu? Baa me mbôdôl pot, hoñol tole boñ mam kiki bo? Baa Yéhôva a yé le a ba maséé i tehe me me nkiha ni bo?’ (Tjémbi 1:1) Ibale u ntehe le ngim jam i téé bé, pala boñ mahéñha. Yéñ mawanda ma ñem nyuu ipôla ba ba ngwés Yéhôva kiki we. U kon bañ to woñi i tééne baudu ba suklu likalô. Njee numpe a yé le a niiga bo maliga handugi we?

BA NKÔÔBAGA

19. Lelaa u yé le u kôôba inyu yémbél mandutu u mboma mu kii u nke i suklu ikeñi? Ti hihéga.

¹⁹ I mut a nke i bikai, a ban-ga pék, a nkôôba ilole a njôp i njel. A nla bé yi i mam a ga boma i bisu, a gwé ndik ngôñ i yi le nyuu yé yo i nti nye pôla i ke nyoo, le a gwé mambot ma bikai, a yik i homa a nke. Yak we nu u nsômbôl ke i suklu ikeñi, u nla boñ nlélém. Tééda hémle i ngui, haba “bijôl bi gwét gwobisôna bi bi nlôl yak Nyambe.” U hôya bañ inyuki u mboñ suklu ikeñi, njômbi yoñ i ta bé le u yila bañga mut munu nkoñ ’isi unu ndi njômbi yoñ i yé le u lémél Yéhôva ikété mam momasôna u mboñ.​—Éfésô 6:​11-13; 1 Korintô 9:​26, 27; 10:31.

20. Lelaa u nla ‘ke ni bisu i wanba i yi too u yé yaga ikété hémle’?

²⁰ Bibel i nti bés i makénd mana le: “Kena ni bisu i wanba i yi too ni yé yaga ikété hémle; kena ni bisu i wanba le ni yi mimbe mintén mi bôt ni yé.” (2 Korintô 13:5) U nla boñ hala i ngéda u mboñ suklu ikeñi. Bana lem i badba mambadga di ntehe munu yigil ini. Baa u ntééda bilem gwoñ bi mbuu? Baa u gwé ngap i yi wan mam ibale ba niiga we biyôglô bi mam nyoo suklu? Baa u ntibil yaga gwélél ngéda yoñ? Baa u yé liwanda ni lôk kéé, u keñglege bilôñ bibe? I mambadga ma mon u nlama badba, to u yé i suklu ikeñi, to u nsal, to u yé numbe homa. Yoñ makidik i kônde bana hémle i ngui to imbe ndutu u mboma. U nla ba nkwoog nkaa le Yéhôva a ga sayap biliya gwoñ.​—Bingéngén 3:​5, 6.