Lelaa u nla unda le u nti mayéga inyu binoñ?

1-2. Kii sesema i Yésu i nyégsa bés i boñ, inyuki? (2 Korintô 5:​14, 15) (Béñge yak titii.)

IBALE ndap i nkwo u bak mukété, ndi mut a lo a péyés we mu, baa u ga ti bé nye mayéga? To ibale yak bôt bape ba mpei, wemede w’a gwés le u ti i mut nu mayéga inyu yoñ, inyu unda le u nyoñ bé mahôla mé kiki yañga jam.

² Kiki di bi tehe i yigil i ntagbe, di gwé ngôñ ni mut numpe nu a ntohol bés i mok mi béba ni mi nyemb. Ndi binoñ bi ntohol bés inyule bi mboñ le (1) Yéhôva a nwéhél bibéba gwés, (2) a yilha bés peles, (3) di ba ki mawanda mé. Inyu hala nyen di gwé botñem i niñ i boga ni boga mu mbok yondo Yéhôva a mbôn bés. Binoñ bi ñunda toi le Yésu a ngwés bôt ba binam. I nlélém gwéha u won a bééna ibôdôl behee ilole a nlo hana ’isi. (Bingéngén 8:​30, 31) Ñôma Paul a bi kal le “gwéha Kristô a gwé i nyégsa bés.” (Añ 2 Korintô 5:​14, 15.) Hala a nkobla le gwéha Kristô i nlama tinde bés i yéñ manjel inyu ti nye mayéga, ni i unda le di nyoñ bé sesema yé kiki yañga jam.

3. Inyuki hiki mut a nti mayéga inyu binoñ wé ntén?

³ Binoñ bi nla ni tinde we i boñ kii? Ndimbhe yoñ i nla ba mahéñha ni ndimbhe i mut numpe. Inyu toñol i jam li, hégda le bôt baa ba nyéñ ke i nlélém homa, ndi hiki wada a nyodne i yé yé tison. Hiki wada a ga yoñ yé njel. Nlélém, “njel” w’a yoñ i ga ba mahéñha ni i mut numpe inyule w’a ti mayéga inyu binoñ inoñnaga ni maada moñ ni Yéhôva. Ni i mam ma i mahoñol, di ga pôdôl mintén mi bôt maa: (1) Banigil Bibel, (2) minsôblege mi bikristen, (3) mintômba mi mi nke haa ni bémba.

BANIGIL BIBEL

4. Inyuki di nkal le Yéhôva a nyimbe banigil Bibel?

⁴ Ibale u nigil Bibel, ôt pék munu jam lini: Kiki u neebe ñañ nlam, nano u yé mu nsoñgi u bôt Yéhôva a ñôt inyu ba liwanda jé. (Yôhanes 6:44; Minson mi baôma 13:48) “Yéhôva nyen a nwan miñem.” Hala a nkobla le Yéhôva a nyimbe biliya u mboñ inyu yi nye, a nkon ki maséé i tehe mahol moñ mu kii u mboñ mahéñha inyu lémél nye. (Bingéngén 17:3; 27:11) Binoñ gwon bi nyible we njel i ba liwanda li ñem nyuu li Yéhôva. (Rôma 5:​10, 11) U yoñok bañ hala kiki yañga jam.

5. Lelaa banigil Bibel ba nla noñ maéba ma kaat Filipi 3:16?

⁵ Kiki u nigil Bibel, lelaa u nla unda le u nti mayéga inyu binoñ? Noñ maéba ñôma Paul a bi ti lôk kéé i Filipi, a nkal le: “To ibale mahol més ma mpam to limbe likala, wee di kilak ndigi ikété oda mu nlélém njel.” (Filipi 3:16) Ngobol Bibel ipe i nkal ha le: “Di waa bañ kil mu njel di bi bôk di yoñ.” Inyu unda le u noñ i maéba ma, u nwahak bañ le yom yo ki yo tole mut nye ki nye a sôña we i kil mu njel i nkena i niñ boga.​—Matéô 7:14; Lukas 9:62.

6. Ibale nnigil Bibel a ntehe hala ndutu i neebe ngim biniigana tole i nwas ngim lem ibe, kii a nla boñ? (Ndiimba Mbén 30:​11-14) (Béñge yak titii.)

⁶ Kii u nla boñ ibale u neebe bé ngim biniigana bi Bibel? Boñ minyiña, soohe ki Yéhôva le a hôla we i tibil nok i biniigana bi. (Tjémbi 86:11) Ibale to hala u ngi gwé ndutu i nok jam li, bii ndugi jo ipañ, ndi u téé bañ yigil yoñ. Kii ni u nla boñ ibale i yé we ndutu i nwas ngim lem ibe Bibel i nsôña? U hôiga bañ le Yéhôva a nla bé bat bikwéha bi bôt mam ba ta bé le ba boñ. Ñ, u nla nôgôl matiñ ma Yéhôva. (Añ Ndiimba Mbén 30:​11-14.) Yéhôva a mbôn le a ga hôla we. (Yésaya 41:​10, 13; 1 Korintô 10:13) Jon, u tomb bañ. U héléé bañ i béñge ndutu u gwé, ti Yéhôva mayéga inyu mam malam a mbôñôl we, ti yak nye mayéga inyu binoñ. Kiki gwéha yoñ inyu Yéhôva i mba i nkeñep, hala yak nyen u ga yimbe le “mambén mé ma nyét bé.”​—1 Yôhanes 5:3.a

7. Kii boñge ba wanda ba ba néñél i maliga ndi ba yé ngi sôblana ba nlama bé hôya?

⁷ A we mañge wanda nu u néñél i maliga ndi u yé ngi sôblana, kii u nlama boñ? Baa u nigil Bibel? Yi le ikété gwigil bi Bibel gwobisôna isoñ bo nyuñ ba gwé, yigil yoñ yon i nlôôha ba nseñ inyu yap. Bibel i nkal le: “Kôôgana bebee ni Nyambe, ndi yak nye a’ kôôge bé bebee.” (Yakôbô 4:8; 1 Miñañ 28:9) Ibale u mboñ biliya i kôôge Nyambe bebee, yak nye a’ kôôge we bebee. I ta bé inyule u ngwééne i lihaa li Mbôgi Yéhôva le Yéhôva a ñôt we i nyeni, to! Ndi a nôt we inyule a ngwés le u ba toi liwanda jé li ñem nyuu. Ndi kii i nti ni we pôla i ba liwanda li ñem nyuu li Yéhôva? Binoñ bi nyible we i njel i, jon u hôiga bañ i likébla li tôbôtôbô li Yéhôva a nti we. (Rôma 5:​1, 2) Ilole u nke i Mbigda Nyemb Yésu i nwii unu, yoñ ngéda i ôt pék mu nyemb yé ni kii hala a nkobla inyu yoñ. Inyu unda le u nti Yéhôva mayéga, boñ biliya i bana niñ i i nlémél nye, u téé ki ngim mam u yé le u gwés yônôs i pes mbuu.b

MINSÔBLEGE MI BIKRISTEN

8. Lelaa minsôblege mi bikristen mi ñunda le mi nhémle binoñ?

⁸ Ibale u yé nsôblege kristen, wee u ma unda ngandak ngélé le u nhémle binoñ. Kiki hihéga, u bi héñha maboñok moñ inyu lémél Yéhôva, u yila ki liwanda jé li ñem nyuu. U nôgôl ki i mbén Yésu ini le: di añle bôt ñañ nlam, di yilha ki bo banigil. U bi ti wemede nkikip yak Yéhôva, u sôblana ki. Bebek, u ma boma ngolba inyule u ngwélél Yéhôva. (2 Timôtéô 3:12) Ndi to hala, u ngi kenek ni bisu i gwélél Yéhôva, hala a ñunda le u ngwés nye ngandak, u nti ki nye mayéga inyu binoñ.​—Lôk Héber 12:​2, 3.

9. Himbe hiandi minsôblege mi bikristen mi nlama keñgle?

⁹ Yak minsôblege mi bikristen mi nlama yoñ yihe. Ndék ni ndék, mi nla bôdôl hôya ti mayéga inyu binoñ. Lelaa hala a nla bôña? Di yoñ hihéga hi bikristen bi Éfésô, i hiai bisu. Ba bi unda le ba nhônba, Yésu a bégés bo inyu lem ilam i. Ndi to hala, a bi kal bo le: “Me gwé i jam lini ikolba we: u bi nwas gwéha u bééna i bibôdle.” (Masoola 2:3, 4) Bibuk bi Yésu bi ñunda le kristen i nla bôdôl boñ mam inyu Nyambe ndik inyule a meya a mboñ mo, ndi a boñ ha bé hala ni ñem wé wonsôna. Kiki hihéga, kristen i nla soohe, i kenek i makoda ni i likalô ki le ñem u ta ha bé nye mu. Gwéha ha bé yon i tinde nye i boñ i mam ma. Kii u yé ni le u boñ ibale u nôgda le gwéha yoñ inyu Yéhôva i gwé ha bé ngui kiki ngéda bisu?

10. Lelaa u nla yoñ ngéda i “hoñol mam ma mbuu” ni i ‘jôp mu sum sum’? (1 Timôtéô 4:​13, 15)

¹⁰ Ñôma Paul a bi kal Timôtéô le a “yoñ ngéda i hoñol” mam ma mbuu, a “jôp yaga mu sum sum.” (Añ 1 Timôtéô 4:​13, 15.) Inyu unda le u noñ i maéba ma, hoñol lelaa u yé le u kônde lémés bibégés u nti Yéhôva, inyu boñ le u bégés nye ni “ngandak makénd.” (Rôma 12:11; béñge note d’étude ni hop Pulasi le “Débordez de zèle grâce à l’esprit.”) Kii ’héga, bebek u nla yoñ ngéda i kôôba makoda moñ loñge loñge, hala a ga hôla we i tibil nok biniigana nyoo. I ngéda u mboñ yigil yoñ i Bibel wemede, kee i homa a yé nwee, u bak nyoo wetama, inyu boñ le u tibil ôt pék mu mam u nigil, hala a ga hôla we i ôt nseñ ni yigil yoñ i Bibel. A yé wengoñle u nkuye hié ndi u kahal kônde tjéé mu inyu boñ le hi lém bañ, hala yak nyen u nlama jôp mu mam ma mbuu sum sum, le ndi u kônde ti Yéhôva mayéga inyu mam malam a mbôñôl we; ikété i mam malam ma, yak binoñ bi yé mu. Mu dilo di Mbigda nyemb Yésu, bigda bisai bi tôbôtôbô gwobisôna Yéhôva a ñumbe bagwélél bé. Ibabé pééna, hala a ga kônde tinde we i ti mayéga inyu binoñ, inyule gwon bi mboñ le u ba liwanda li ñem nyuu li Yéhôva.

11-12. Ibale u nimis makénd ngim ngéda i nson u Yéhôva, baa wee u nimis mbuu wé? Toñol. (Béñge yak titii.)

¹¹ Ibale u nimis makénd inyu ngim ngéda, bebek u nôgda ha bé makénd i nson u Yéhôva kiki u bak le u bana ngôñ, u ntomb bañ, u hoñol bañ to le u gwé ha bé mbuu u Yéhôva. Bigda i yom ñôma Paul a bi kal lôk kéé i Korintô inyu nson wé, nye bo le: “To ibale me ngwés bé boñ hala, Nyambe a bi mal yaa ti me nson u kindak.” (1 Korintô 9:17) Kii a bé sômbôl kal?

¹² I bé i pam le ngim mangéda Paul a bana bé ngôñ i téé likalô. To hala, a bi ke ni bisu i téé likalô. Yak we u nla boñ nlélém. U waa bañ téé likalô to ibale ñem u ta bé we mu. Soohe Yéhôva le a ti we “ngôñ lôñni ngui i boñ mam.” (Filipi 2:13) Pagap ni mam ma mbuu inyu kônde lédés maada moñ ni Yéhôva. Ba nkwoog nkaa le kiki u nke ni bisu i boñ i mam ma nyen u ntémb u bana ngôñ i boñ mo, kayéle u témb u bana makénd u bééna.

13. Lelaa di nla wanba i yi too di yé yaga “ikété hémle”?

¹³ Ngim mangéda, i yé bés loñge le di wanba, di noñ ki maéba mana ma kaat 2 Korintô 13:​5, i het Paul a nkal le: “Kena ni bisu i wanba i yi too ni yé yaga ikété hémle; kena ni bisu i wanba le ni yi mimbe mintén mi bôt ni yé.” Kiki hihéga, di nla badba le: ‘Baa mam ma mbuu mon me mbugus i niñ yem?’ (Matéô 6:33) ‘Baa mintuk nwem mi ñunda le me ñoo toi béba?’ (Tjémbi 97:10) ‘Baa me mboñ biliya i hôñôs nsañ ni adna ikété likoda?’ (Éfésô 4:​2, 3) Mbigda nyemb Yésu i yé loñge ngéda i ôt pék mu likébla lilam Yéhôva a bi ti bés le binoñ, i nti ki bés pôla i wanba ni i ba nkwoog nkaa le di niñ ha bé inyu bésbomede ndi di niñ nano inyu Kristô.c

MINTÔMBA MI MI NKE HAA NI BÉMBA

14. Kii i nla tinde lôk kéé ihogi i ke haa ni bémba?

¹⁴ Bikristen bihogi bi bi gwélél Yéhôva ngandak nwii tole ndék ngéda ndigi, ndi ba sôk ba bagla ni likoda. Inyuki? Mandutu ma niñ ma bi yuu bahogi. (Lukas 21:34) Bape, bibuk tole maboñok ma lôk kéé gwon bi bi boñ le ba baage. (Yakôbô 3:2) Bape ki, ba bi boñ béba ikeñi, nano ba nkon woñi i bat mahôla. To i ba lelaa, kii u yé le u boñ ibale u nke haa ni bémba? Kii binoñ ni gwéha Yéhôva bo Yésu ba ñunda we bi ntinde we i boñ?

15. Lelaa Yéhôva a ñunda le a ntôñ mintômba mi mi nke haa ni bémba? (Ézékiel 34:​11, 12, 16)

¹⁵ Baa u nyi lelaa Yéhôva a ntehe i bôt ba bi ke haa ni nye? A nkôm bé bo mbus. Ndi a nyéñ mintômba mi mi nimil. I ngéda a nléba nwo, a nhôla nwo i témb i nyeni, a jés ki nwo. (Añ Ézékiel 34:​11, 12, 16.) Baa Yéhôva a nla boñ yak nlélém inyu yoñ? Ñ! Ibale u yé i añ i Nkum Ntat nunu, wee u ngi gwé ngôñ i lémél Yéhôva. Ndik kiki Yéhôva a bi tehe mam malam mu ñem woñ, a ôt we i maliga, hala nyen a ngi tehge mam malam i weeni, jon a gwé ngôñ le u témb i nyeni.

16. Kii i nla hôla ntômba nnimlaga i témb i bémba i Yéhôva? (Béñge yak titii.)

¹⁶ I man kaat nunu le Soho, témb yak Yéhôva a gwé bibuk bi makénd ngandak, a nkal le: “Ba nkwoog nkaa le Yéhôva a ga hôla we i témb ikété bémba yé. A ga hôyôs nduña yoñ, a sayap ki biliya gwoñ i nwéhél bôt ba bi unbaha we. A ga hôla ki we i bana ñem nwee ni kiññem i mpôp. Hala a ga ti we makénd i témb bôdôl gwélél Yéhôva ni bilôk bikéé.” Bigda ki le mimañ mi yé toi bebee i hôla we. Mimañ mi nla bane we lisolbene “i ngéda mbuk mbebi a nhôñ ni homa mut a nsolop ôôm nop.” (Yésaya 32:2) Inyu unda le u nti mayéga inyu binoñ, badba le: ‘Kii me nlama boñ nano inyu “kodol mam” ni Yéhôva?’ (Yésaya 1:18; 1 Pétrô 2:25) Kiki hihéga, baa u nla témb u bôdôl ke i makoda i ndap Ane? Baa u nla tehe to mañ wada, u kal nye le u gwé ngôñ ni mahôla? A nla yiñil we mut nu a nla tégbaha yigil yoñ inyu ngim ngéda. Ibale u mboñ hala, u nla ba nkwoog nkaa le Yéhôva a ga sayap biliya u ga boñ inyu ti mayéga inyu binoñ man wé Yésu Kristô a bi ti.

KII U GA BOÑ NI NANO?

17-18. Lelaa di yé le di tibil gwélél ngéda yés ilole Mbigda nyemb Yésu i ntagbe i nwii unu?

¹⁷ Yésu a bi kal le binoñ bi bi tiba “inyu boñ le hiki mut a ñunda le a nhémle nye a tjiba bañ, ndi a bana niñ boga.” (Yôhanes 3:16) Binoñ bi yé bitelbene Yéhôva a ngwélél inyu kobol bés i mok mi béba ni mi nyemb. To wada wés a yoñok bañ i binoñ bi kiki yañga jam. (Rôma 3:​23, 24; 2 Korintô 6:1) Mbigda nyemb Yésu i yé loñge ngéda kiyaga inyule i nti bés pôla i ôt pék mu gwéha Yéhôva bo Yésu ba ñunda bés, i gwéha i yon i ntinde bés i ti bo mayéga.

¹⁸ Kii binoñ bi ga tinde ni we i boñ? Hiki mut nyen a nyi kii a ga boñ. Ndi ba nkwoog nkaa le Yéhôva a ga sayap biliya gwoñ i adba ni didun di bagwélél bé di di “niñ ha bé inyu yap bomede, ndi inyu nu a bi wo inyu yap.”​—2 Korintô 5:15.