Yéhôva a nla hôla we i ngéda nduña i nai

1-2. Kii i bé tééñga ñôma Paul ngim mangéda, inyuki ndémbél yé i nla hôla bés? (Rôma 7:​21-24)

KII i nlo we i mahoñol i ngéda u nhoñol ñôma Paul? Bebek u hoñol kii yosôna a bi boñ i nson u ñañ nlam, lelaa a bé niiga bôt, ni bikaat a bi tila mu Bañga i Nyambe. Ibale u nhoñol i mam ma, u nyoba bé. Ndi u nlama yi le yak nye a bé kiki bés. Ngim mangéda, nduña i bé le i pat nye ñem.

² Añ Rôma 7:​21-24. Mu kaat a bi tilna Lôk Rôma, Paul a mpot ngim mam i i yé le ngandak ikété yés i nôgda. A bé gwélél yaga Nyambe ni ñem wonsôna, ndi to hala a jok sañ inyule ngôñ yé i bé le a boñ ndik mam malam, ndi nyuu yé yo i nnayak ndik le a boñ mam mabe. Handugi hala, nduña i Paul i bé lôl ki mu mam mabe a bi boñok behee, a bééna yak ndutu ipe, i i bé téé bé nye makôô ’isi.

3. Kii di ga tehe munu yigil ini? (Béñge yak “Ndoñi i buk.”)

³ Paul a bi nwas bé le nduñaa i yuu nye. Munu yigil ini, di ga timbhe mambadga mana: Inyuki Paul a bi kal le a yé “ngoo”? Hee a bé yôñôl ngui i ngéda a bééna nduña? Kii i nla hôla bés i ngéda nduña i nai?

KII I BÉ TÉÉÑGA PAUL?

4. Kii i bé tééñga Paul?

⁴ Mam mabe a bi boñok behee. I ngéda Saulô, nu a bi yik yila Paul, a bé ngi ba kristen, a bi boñ mam mabe ngandak. Kiki hihéga, a bi ti kiñ le ba nol Étien. (Minsôn mi baôma 7:58; 8:1) A bi tééñga ki bikristen bañga bañga.​—Minson mi baôma 8:3; 26:​9-11.

5. Imbe ndutu Paul a bééna?

⁵ I ngéda Paul a bi yik yila kristen, mam mabe a bi boñok behee ma bé tééñga nye kiyaga. I nene le ngéda i bé i tagbege, a kôndge ndik nok njôghe i ñem inyu ndééñga a bi tééñga bikristen. Inyu hala nyen i ngéda a bi tilna lôk kéé i Korintô inyu ngélé bisu, bebee ni nwii 55 N.Y., a bi kal le: “Me kôli bé to sébla le ñôma inyule me bi tééñga likoda li Nyambe.” (1 Korintô 15:9) Ngéda i bi témb i tagbe jôga, yom kiki bo nwii mintan, a tilna lôk kéé i Éfésô, nye bo le a yé “yaga nuntitigi iloo nuntitigi ikété bapubhaga bobasôna.” (Éfésô 3:8) I ngéda Paul bé tilna Timôtéô, a bi kal nye le a bé ‘mut a ñôbôs jôl li Nyambe, a bak mut a ntééñga bôt ba Nyambe, ni mut lipamal.’ (1 Timôtéô 1:13) Baa u nla hégda i yom Paul a bi nôgda i ngéda a bi yuuga likoda jada, a boma bôt a bé tééñga, tole bôt ba lihaa ba bôt ba?

6. Imbe ndutu ipe Paul a bééna? (Béñge yak matila isi lipep.)

⁶ Loo ikété minsôn. Paul a bééna ndutu i i bé le i pat nye ñem! A bi sébél yo le ‘loo ikété minsôn.’ (2 Korintô 12:7) A bi tôp bé yo jôl, ndi i ngéda a nkal le loo ikété minsôn, hala a nkobla le bebek kon won u bé tét nye tole ndutu ipe i i bé téé bé nye makôô ’isi.b

7. Inyuki hala a bé lédél Paul i boñ loñge hiki ngéda? (Rôma 7:​18, 19)

⁷ Bilem bibe. Yak Paul a bééna bilem bibe. (Añ Rôma 7:​18, 19.) Ngôñ i bé yaga nye le a boñ loñge, ndi nyuu yé i bé ti bé nye pôla. Jon a bi kal le a bé jo sañ i ngui inyu boñ loñge, ndi nyuu yé yo i gwéhék ndik le béba yon a boñ. Ndi Paul a bi ti bé moo. (1 Korintô 9:27) Di nla hégda lelaa njôô i bé i gwel nye i ngéda a bé a boñ hihôha, a yik sañ a njo!

KII PAUL A BÉ BOÑ I NGÉDA NDUÑA I BÉ NYE NNAYAK?

8. Kii Paul a bé boñ inyu héñha libak jé?

⁸ Bikaat Paul a bi tila bi ñunda le a bi yoñ ngéda inyu nok lelaa mbuu mpubi u nla hôla bikristen i nwas mahoñol mabe inyu lémél Nyambe. (Rôma 8:13; Galatia 5:​16, 17) A bi yelel maboñok bikristen bi nlama keñgle inyu lémél Yéhôva. (Galatia 5:​19-21, 26) Hala a ñunda le nyemede a bé jo sañ inyu nwas bilem bibe. Ibabé pééna, a bé nigil inyu boñ le a yi lelaa a yé le a héñha libak jé. I mam a bi kal bôt bape le ba boñ, nyemede a bé boñ mo.

9-10. Kii i bé i hôla Paul i ngéda nduña i bé nye nnayak? (Éfésô 1:7) (Béñge yak titii.)

⁹ Paul a bi héléé bé i ngandak njelel ndi a bé kon maséé. Kiki hihéga, i ngéda lôk kéé i i bé lôl i makoda mape i bé legel nye nwin nlam, ñem u bé u ne nye. (2 Korintô 7:​6, 7) Yak mawanda mé ma bé kônha nye maséé. (2 Timôtéô 1:4) Paul a bé ki maséé inyule a bé liwanda li Yéhôva, a bé yi le a nlémél Yéhôva. (2 Timôtéô 1:3) Yak i ngéda Paul a bé i mok i Rôma, a bi kal lôk kéé le: “Kona maséé i Nwet.” (Filipi 4:4) Bibuk bi Paul bi mpôna bé bibuk bi mut nu a bé bé maséé. I ngéda nduña i bé nye nnayak, a bé jo sañ inyu boñ le a témb a ba maséé.

¹⁰ Jam lipe li li bé hôla Paul i ngéda a bé siida li bé le a bé bigda le Yéhôva a bi ep Man wé Yésu le a wo inyu yé nyemede. (Galatia 2:20; añ Éfésô 1:7.) Jon a bé yi le ni njel matjél ma Yésu ma ma bi kuba inyu yé, Yéhôva a bi nwéhél bibéba gwé. (Rôma 7:​24, 25) Paul a bé mboñbéba ndi to hala, a bé “gwel nson mpubhaga” inyu Nyambe ni maséé momasôna.​—Lôk Héber 9:​12-14.

11. Inyuki ndémbél i Paul i nlédés we?

¹¹ Bebek yak we u yé kiki Paul. Hiki ngéda, u nlama jo sañ inyu boñ le mahoñol moñ, maboñok moñ tole bibuk gwoñ bi unbaha bañ Yéhôva. Yak we u yé le u kal le: ‘Kinje ngoo mut me yé!’ Mankéé wés nu muda wada le Eliza,c nu a bééna 26 nwii ha ngéda i, a nkal le: “Ndémbél i Paul i nlédés me ngandak. I ñunda me le me ta bé metama. Yéhôva a nyi toi mandutu ma bagwélél bé.” Ndi kiki Paul, kii yak bés di nla ni boñ inyu lémél Yéhôva ni i ba maséé i ngéda nduña i yé bés nnayak?

KII DI NLA BOÑ I NGÉDA DI GWÉ NDUÑA

12. Kii di nlama boñ hiki ngéda inyu jôs nduña?

¹² Tiige Yéhôva bebee. I ngéda di ntiige Yéhôva bebee, di nhoñol ndik mam malam. A yé ndik kiki mut nu a mboñ mam ma nhôla nye i ba mbôô: A nje loñge, a mbéna hianda minsôn, a kenek ’ilo loñge; a yé mbôô kiki mañ u hiônde. Yak bés, i ngéda di mbéna añ Bibel, di kôôbaga makoda, di kenek i makoda, di timbhege nyoo, di kenek i likalô, ibale ba nkal mut le di yé di bana nduña, a mpééna.​—Rôma 12:​11, 12.

13-14. I ngéda lôk kéé i bi tiige Yéhôva bebee, bimbe bisai ba bi kôs?

¹³ Di béñge ndémbél i John nu a bi kon pos, a ban-ga 39 nwii. Nduña i bé i pat nye ñem, a kahal badba le: ‘Me nkon i nya kon ini, me bak me yii mañge lana?’ Lok yé i bééna ndik nwii maa ha ngéda i. Kii i bi hôla John? A nkal le: “Tolakii kon u bé wéés me ngandak, me ni bôt bem di bi waa bé tiige Yéhôva bebee. Di bi tôl bé likoda to jada, di kenek i likalô hiki sonde, di niglak ntôñ hiki ngéda, yak i ngéda hala a bé lédél bés. I ngéda ndutu i nkwo, di yé le di kahal tôñ ngandak; ndi i mbus ngéda, Yéhôva a nlédés bés, a unda bés gwéha yé. Yéhôva a bi lédés me, me nyi le a nla lédés yak we.”

¹⁴ Eliza nu a mbôk a pot len, a nkal le: “I ngéda me nke i makoda tole i ngéda me nigil Bibel, me nkônde nok le Yéhôva a ñemble toi masoohe mem, me nkônde ki nok le a ngwés me. Hala a nkônha me maséé.” Ngwélél makiiña wada i Afrika le Nolan, a nkal le: “To nduña i yé bés nnayak lelaa, me ni nwaa wem Diane di njôha bé ni yigil Bibel, makoda, masoohe ni likalô. Mu nyen di nyôñôl ngui. Di nyi le Yéhôva a ga hôla bés, a sayap ki bés; di nyi bé lelaa a ga sayap bés, ndi di nyi le a ga boñ hala.”

15. Kii ipe di nla boñ i ngéda nduña i yé bés nnayak? Ti hihéga.

¹⁵ Di nla ki boñ mam mape i ngéda nduña i yé bés nnayak. Di yoñ le hihéga inyu tibil nok: Ibale u nkon i bôbôk, ndi u koglaga, u nla kôs ndék hogbe ndi hala a kôli bé. I mbéda le u yi inyuki bôbôk i nsôghe we, jon u nke i dokta. Nlélém jam won di mboñ i ngéda nduña i nai, di nyéñ mu bikaat bi ntôñ inyu nok inyuki di gwé nduña ni lelaa di nla kôs hogbe. Di nla ki kwel ni nhôôlak mankéé inyu kôs maéba ma ma nla hôla bés. Nano, di béñge mam mape di nla boñ.

16. Kii i nla hôla we i yi mam ma ntééñga we? (Tjémbi 139:​1-4, 23, 24)

¹⁶ Soohe Yéhôva le a hôla we i yi mam ma ntééñga we. Kiñe David a bé yi le Yéhôva a nyi nye loñge loñge. Jon a bi soohe nye le a hôla nye i yi ‘mam ma ntééñga nye.’ (Añ Tjémbi 139:​1-4, 23, 24.) Yak we u nla soohe Yéhôva le a hôla we i yi kii i nlona we nduña, a hôla ki we i kôs hogbe. U nla ki badba le: “Kii i mboñ le me lôôha tôñ? Baa me gwé ngim jam i i nlôôha tééñga me? I ngéda nduña i yé me nnayak, baa me yé me bôdôl hoñol i mam ma nla kônha me maséé?

17. Mambe mam di yé le di nigil inyu boñ le di bana mahoñol malam? (Béñge yak titii.)

¹⁷ Nigil mam ma nla toi hôla we. I yé loñge i nigil mam ma nla hôla we i tehe bilem bi Yéhôva. I ngéda Paul a bé a bigda le Yéhôva a bi neebe le Man wé a wo inyu yé, a bak ki bebee i nwéhél nye, hala a bé lédés nye ngandak. Yak we u nla boñ kiki Paul. Kee i Ñéga inyu nyiña u bikaat bi Mbôgi Yéhôva tole i Index des publications des Témoins de Jéhovah, tole kaat ipe i bi pam ni hop woñ, u nigil bilem bi Yéhôva kiki bo konangoo, nwéhél, ni gwéha. Ibale u nléba miño mi minkwel mi mi yé le mi hôla we, tila nwo. I mbus, éde nwo i homa u nla hoo tehe. I ngéda nduña i ntémb i lo, u nla tiimba nigil i minkwel mi. Noode bii i mam u nigil i bisélél.​—Filipi 4:8.

18. Kii lôk kéé ihogi i bi nigil?

¹⁸ Eliza, nu a mbôk a pot len, a nkal le: “Me bi nigil ñañ u Hiôb. Niñ yé i mpôna niñ yem. Mandutu ma bi kwél nye kiki nop matan-ga. Ndi yak i ngéda i bé i pam nye i héya bitamb, a bi waa bé bôdôl Yéhôva ñem tolakii a bé yi bé inyuki a nok ndutu.” (Hiôb 42:​1-6) Yak Diane nu di bak di pôdôl len, a nkal le: “Me ni nlô wem di yé i nigil i kaat ini le Approchez-​vous de Jéhovah. I niiga bés le di yé kiki ték lima i moo ma Mma dibee le Yéhôva. Ilole di héléé i ngandak njelel, di mbigda le Yéhôva nyen a yé i mma bés inyu boñ le di kônde lémél nye. I ngéda di ntehe mam hala, di nkônde tiige nye bebee.”​—Yésaya 64:8.

BISAI BI MBEM BÉS

19. Kii di nlama yi?

¹⁹ To ibale di mbéna nigil, di soohege, di kenek i makoda ni i likalô, nduña i nla bé mal hala. Ngim mangéda, i nla yaga yuu bés! Ndi Yéhôva a nla ti bés hogbe i ngéda di gwé nduña. Di nyi le di yé mawanda ma Yéhôva, inyule di mboñ mam ma nlémél nye. Jon, to nduña i yé lelaa, di yé ndik maséé.

20. Mambe makidik u nyoñ ibôdôl nano?

²⁰ Di nwahak bañ le mandutu més, mam mabe di bi boñok behee, tole bibôô gwés bi bilem bi sôña bés i nok line li niñ. Yéhôva a nla ti bés bañga hogbe i ngéda nduña i yé bés nnayak. (Tjémbi 143:10) Ndék ngéda wee di njôp i mbok yondo i het nduña yo ki yo i mba ha bé. Mam momasôna ma ga kônha bés maséé. Hiki kel, d’a ba maséé, di gwéélak Yéhôva!