MAMBADGA BOÑGE BA WANDA BA MBÉNA BAT
Baa malal ipôla bôlôm ni bôlôm tole bôda ni bôda ma yé béba?
“I ngéda me bé nañ, bôlôm bon ba bé lémél me, jon me bi lama jo sañ inyu yémbél i ngôñ bé i. Me bé hoñol le ngim ngéda, hala a ga tagbe, ndi i mahoñol ma, ma bi ke ndigi ni bisu i nañ.”—David, 23 nwii.
David a yé mañge wanda nu a ngwés lémél Djob. Ndi baa David a nla lémél Djob a ban-ga i ngôñ ibe i? Kii Djob a nhoñol inyu malal ipôla bôlôm ni bôlôm tole bôda ni bôda?
Kii Bibel i nkal?
I yom bôt ba nhoñol inyu malal ipôla bôlôm ni bôlôm tole bôda ni bôda i yé maselna inoñnaga ni i het mut a niñ tole ni bilem bi loñ. Ndi bikristen bi nkôna bé bôt. Ba ngwés bé le ba “ken-ga bo bahoma bahoma ni njel mandon ma bôt ba binam.” (Éfésô 4:14) I yom Bibel i nkal inyu malal ipôla bôlôm ni bôlôm tole bôda ni bôda yon ba nôgôl, nlélém jam inyu mana malal ma nyega momasôna mape.
Bibel i ntibil yaga kal i yom i mbéñge malal ipôla bôlôm ni bôlôm tole bôda ni bôda, i nkal le kal le:
“U lalna bañ munlôm kiki ba nlalna muda. Hala a yé liboñok libe.”—Lôk Lévi 18:22.
“Nyambe a bi nwas bo le ba boñok mam ma nyega ma ma yé bo mu miñem, . . . Nyambe a bi tjôô bo le ba bana ngôñ malal i i nwéha nyuu, inyule bôda bap ba nhéñha ligwéélak li kôli li manyuu map lôñni li li kôli bé.”—Rôma 1:24, 26.
“Ni yôm bañ. I bôt ba mboñ malal ma nyega, to babégés bisat, to bôt ba ndéñg, to bôlôm ba nlalna bôlôm, to bôt ba wip, to bôt ba huluk ñem, to bôt ba lihiua, to bôt ba nsola, to bôt ba ngadla b’a kôdôl bé Ane Nyambe.”—1 Korintô 6:9, 10.
Matiñ ma Yéhôva ma nhéñha bé inyu yom i mbéñge malal ipôla bôlôm ni bôlôm. Bésbobasôna di nlama bana hôtnyuu i ngéda nyuu yés i ntinde bés i bana ngim mahoñol i i nlémél bé Djob.—Kôlôsé 3:5.
Kii hala a nkobla . . . ?
Ndi baa Bibel i ntinde bés i oo ngim bôt?
Heeni. Bibel i nkal bé le di oo mut nye ki nye to ibale a mboñ malal ipôla bôIôm ni bôlôm tole bôda ni bôda. Maselna ni hala, i nkal bés di ‘noñ nsañ ni bôt bobasôna,’ ibabé i béñge niñ i mut. (Lôk Héber 12:14) Bibel i nti bé ki to bôt kunde i tééñga i bôt ba mboñ malal ipôla bôlôm ni bôlôm tole bôda ni bôda.
Baa bañga bikristen i nlama kolba mambén ma ngomin ma ma nti kunde i biiba ipôla bôlôm ni bôlôm tole ipôla bôda ni bôda?
Inoñnaga ni Bibel, libii li nlama ndik ba ipôla muda wada ni munlôm wada. (Matéô 19:4-6) Jon mambén ma ma mbéñge mabii ipôla bôlôm ni bôlôm ma yé mam ma m’bô, he mam ma hémle bé. Bibel i nti bañga bikristen maéba le ba yoñ bañ ngaba ni mam ma m’bô. (Yôhanes 18:36) Inyu hala nyen bañga bikristen i nit bé mambén ma ngomin ma ma nti bôt kunde i biiba ipôla bôlôm ni bôlôm tole ipôla bôda ni bôda, ndi ba nkolba bé to mo.
Ndi kii di nla kal inyu . . . ?
Kii di nla ni kal inyu mut nu a mboñ malal ipôla bôlôm ni bôlôm tole bôda ni bôda? Baa a nla héñha?
Ñ. Hala nyen ngandak bôt i hiai hi bisu i bi boñ! I mbus le Bibel i bi kal le i bôt ba mboñ malal ma nyega ba ga kôdôl bé Ane, i bi kônde le: “Hala nyen bahogi ikété nan ba bé.”—1 Korintô 6:11.
Baa hala a nkobla le i bet ba bi bana i nya mahoñol i, ba nla ha bé tiimba bana mo? Heeni. Bibel i nkal le: “Ni haba mut yondo, nu a nyila yondo ni njel bañga yi.” (Kôlôsé 3:10) I mbéda ngéda inyu boñ mahéñha.
Ndi kii di nla kal inyu mut nu a gwé toi ngôñ i nôgôl matiñ ma Bibel ndi mu ñem wé, ibale a yé munlôm, bôlôm bon ba ngi lémlék nye tole ibale a yé muda, bôda bon ba ngi lémlék nye?
To ibale laa, mut nyemede nyen a nkit i tjél yônôs i ngôñ ibe i. Lelaa? Bibel i nkal le: “Kena ni bisu i nwas le mbuu u Nyambe won u éga bé, ndi n’a yônôs yaga bé minheña mi minsôn nwo ki nwo.”—Galatia 5:16.
Baa u nyimbe le pes kaat i nkal le a’ yônôs yaga bé minheña mi minsôn nwo ki nwo. Ibale mut nu a nke ni bisu i añ Bibel, i soohe hiki ngéda, a’ bana ngui i yémbél minheña mi.
I jam li jon hihéga hi David nu di mpôdôl i bibôdle hi ñéba bés. Téntén i ngéda a bi añle bagwal bé i sañ a bé jo inyu yémbél ngôñ yé ibe. A nkal le: “Hala a bé me kiki mbegee le ba nhéya me i ngii bituu, a nkônde ki le, ibale me bôk me kwélés bagwal bem i bisu bi ngéda ki me bi pala yémbél i ngôñ ibe i.”
I nôgôl mambén ma Yéhôva i nlona bés maséé. Di yé nkwoog nkaa le “mabéhna ma Yéhôva ma téé sép, ma nkônha ñem maséé,” ni ki le “bom ikeñi i mbem nu a ntééda mo.”—Tjémbi 19:8, 11.