Kii ba nsébél le Watch Tower Bible and Tract Society?
Watch Tower Bible and Tract Society of Pennsylvania i yé ngim boma i ba bi bot i ñwii 1884, i ta bé inyu yéñ nseñ moni. Ba bi bot yo inoñnaga ni mambén ma pes i loñ Amérika le Pennsylvania. Mbôgi Yéhôva i ngwélél yo inyu nit nson wap ikété nkoñ isi wonsôna, yak nson u pémés bi Bibel ni bikaat bi ntoñol Bibel.
Inoñnaga ni matiñ mé, su jam u boma i, u yé “base, biniigana, ni lona bôt mahôla,” téntén i “añal ni niiga ñañ nlam u Ane Djob i si énél i Kristô Yésu.” Inyu tila jôl mu boma i, ba nlama ndugi naña we. Mut a njôp bé mu inyule a nti ngandak moni. I bôt ba yé mu boma i, ni i bet ba ñéga yo, ba nhôla Juu li Bakena ntôñ li Mbôgi Yéhôva.
Biboma le ngomin a nyi, bi bi gwé ki maada ipôla yap
U héya Watch Tower Bible and Tract Society of Pennsylvania, ikété ngandak biloñ, Mbôgi Yéhôva i ngwélél ngandak biboma bi bi gwé kunde i nlôl i ngomin. Ngandak mukété biboma bi, i gwé môl ma ma gwélél bini bibuk le “Watch Tower,” “Watchtower,” tole ngobol i bibuk bi.
Ibôdôl kii di bi bot biboma bi, bi ma hôla bés i boñ ngandak mam kiki bo:
Tila ni pémés bikaat. Di ma pémés jam kiki bo 220 ma didun ma Bibel ni bebee le 40 ma dikôô ma didun ma bikaat bi ntoñol Bibel, ikété iloo 700 dilémb. Ngandak bôt i nla añ Bibel ikété site yés internet le jw.org ibabé i saa ikété iloo 120 dilémb. Ba nla ki kôs mandimbhe i mambadga ma Bibel kiki bo: “Kii i yé Ane Djob?”
Biniigana. Di bi bot ngandak bisuklu inyu niiga Bibel. Kiki hihéga, ibôdôl ñwii 1943, iloo 8 000 di Mbôgi Yéhôva di bi tagbe mu suklu i Giléad inyu ba basañal i biloñ bipe, tole inyu lédés ni hôñôs nson wés ni nkon isi wonsôna. Hiki sonde didun di bôt, yak i bet ba ta bé Mbôgi Yéhôva, ba nkôs biniigana i makoda més. Di gwé ki suklu i niiga añ ni tila, di bi pémés ki man kaat wada ikété 110 dilémb inyu niiga bôt i añ ni tila.
I lona bôt mahôla. Di bi lona mahôla i bahoma bôt ba bi kôhna bikuu—le bôt bomede ba bi kand, kiki bo ngéda litén jada li bé sômblak tjé litén lipe i loñ i Ruwanda i ñwii 1994, tole bikuu bipe kiki bo nyeñg disi i Ayiti i ñwii 2010.
To hala kii di ngwélél biboma bi inyu boñ ngandak mam, nson wés u nla ke ni bisu to ibale biboma bi bi ta bé. Hiki kristen i gwé mbegee i mbéñge nyetama le a yônôs nson Djob a bi ti nye, i añal ñañ nlam ni i niiga Bibel. (Matéô 24:14; 28:19, 20) Di yé nkwoog nkaa le Djob a nit nson wés ni le a ga ke ni bisu i ba “nu a nhôlôs.”—1 Korintô 3:6, 7.