Baa Mbôgi Yéhôva i bi héñha Bibel inyu nit biniigana gwap?

To. Maselna ni la, ngéda di bi léba le biniigana gwés bi bé kiha bé ni Bibel, di bi lona mahéñha mu biniigana gwés.

Ntandaa ngéda ilole di mpémés Les Saintes Écritures. Traduction du monde nouveau (Bitilna bipubi. Ngobol i mbok yondo) ni hop Ngisi i ñwii 1950, di bi wan Bibel. Di bé gwélél to imbe ngobol i Bibel di bé le di bana, di kodlak ki biniigana gwés inoñnaga ni i mam di bé léba mu. Wan ndék dihéga di minlômbi mi biniigana bi Mbôgi Yéhôva, u kit ki too bi nkiha ni i mam Bibel i niiga toi.

1. Jam di nhémle: Djob a ta bé Trinitas. I sôñ Njéba, i nwii 1882, yigil i mbamble u u bééna jôl le Zion’s Watch Tower (Nkum Ntat nu Siôn) i kal le: “I bet ba nsoñgol bikaat gwés, ba nyi le mu kii di nhémle Yéhôva bo Yésu, ni mbuu mpubi, di ntjél biniigana bi bi nlôl bé i Bibel, kiki bo bini le bôt baa ikété Djob jada, tole kiki ngim bôt i nkal, djob jada ikété mop maa.”

   Kii Bibel i nkal: “Yéhôva Nyambe wés a yé Yéhôva wada.” (Ndiimba Mbén 6:4, Kaat Nyambe) “Ndi inyu yés Nyambe a yé ndik wada le Tata. Mam momasôna ma nlôl nyeni. Yak bés ki di yéne ndigi inyu yé. Nwet a yé ndik ki wada le Yésu Kristô. I nyeni nyen mam momasôna ma lôl, yak bés ki.” (1 Korintô 8:6, Kaat Nyambe) Yésu nyemede a kal le: “Inyule Tata a nloo me.”​—Yôhanes 14:28, Kaat Nyambe.

2. Jam di nhémle: Ngim bee hié i het bôt ba nson njonok mba ni mba i ta bé. Mbamble ni hop Ngisi le Zion’s Watch Tower (Nkum Ntat nu Siôn) nu sôñ Hilônde, i ñwii 1882, u u bééna ño le “Nsaa u béba u yé nyemb,” u bé sima kaat Rôma 6:​23 i i yé ikété Bibel ni hop Ngisi le King James Version (Bible du Roi Jacques), mbamble u bé kal le: “Kinje biniigana bi ntomb i nok. Ndi kinje hélha jam le ngandak bôt i i neebe Bibel kiki Bañga i Djob, i ngi kenek ni bisu i kolba biniigana bilam bi, i kalak le ba nhémle, ndi i kalak ki le Bibel i niiga le nsaa u béba u yé nson njonok mba ni mba ikété bee hié.”

   Kii Bibel i nkal: “Mut a mboñ béba, nyen a’ wo” (Ézékiel 18:4, 20, Kaat Nyambe) Kogse i nsôk inyu bet ba nkolba Djob, i ta bé njonok ba nson ikété bee hié, ndi i yé “tjiba i boga ni boga.”​—2 Tésalônika 1:9, Darby.

3. Jam di nhémle: Ane Djob i yé toi ngim énél i ngii, ndi i ta bé ngim jam ikété ñem. Inyu Ane i Djob, mbamble ni hop Ngisi le Zion’s Watch Tower (Nkum Ntat nu Siôn) i sôñ Libuy li nyéé, i ñwii 1881 u bé kal le: “Litééba li sômbôl i Ane, i gwé maada ni tjiba i biane bi nkoñ isi.”

   Kii Bibel i nkal: “Ndi i dilo di bikiñe bi nyen Nyambe nu ngii yosôna a’ téé ngim Ane i yé le y’a tjiba bé kekikel, to pot yé mbok ki y’a yégle bé i moo ma loñ ipe, ndi y’a bôk biane bi gwobisôna ngéñ ngéñ ni tjé gwo hies, ndi yomede y’a tééba mba ni mba.”​—Daniel 2:​44, Kaat Nyambe.

Baa i mbéda ndigi Mbôgi Yéhôva Traduction du monde nouveau (Ngobol i mbok yondo) inyu nit biniigana gwap?

To, di nke ni bisu i gwélél ngandak ngobol i Bibel ikété nson wés u likalô. Ntiik, to ibale di nti bôt Bibel yés le Traduction du monde nouveau (Ngobol i mbok yondo) ibabé i saa mu kii di ntégbaha bo yigil i Bibel, di yé ki maséé i nigil ni i bet ba ntehe nsen i gwélél ngobol Bibel ipe.