I buk ini le “kristen” i nkobla le kii?—Bibel i nkal laa?

I len ini, ngandak bôt i nkal le i yé bikristen, ndi maboñok u bat bé. Bahogi ba yé wim, ba bak bôt ba wip, tole ba yé bibéba bi bôt. Bape ba ntjôô sobiina wap inyu ke i ndéñg. I maboñok mabe ma, ma ntinde bôt bahogi i badba le: ‘I buk ini le kristen i nkobla toi le kii?’

I buk ini le kristen i nkobla toi le kii?

Hala a ntomb ngandak i kal le, “Me yé kristen.” Ndi hala a kôli bé. Bibel i ñunda le kristen i yé nnigil Yésu Kristô. (Minson mi baôma 11:26) Yésu nyemede a bi kal le: “Ibale ni ntééda bibañga gwem, ni yé toi banigil bem.” (Yôhanes 8:31) I yé maliga le mut nye ki nye a ta bé le a nôgôl bibañga bi Yésu i nya i yé peles. Ndi kristen i nlama jo sañ i noñ biniigana bi Yésu, a undga ki hala hiki kel ni njel maboñok mé. Di yoñ ndék dihéga.

Bikristen bi gwé bañga gwéha

Kii Yésu a bi kal: “Me yé i ti bé mbén mondo, le ni gwéhna bé ni bé; ndik kiki me bi gwés bé, yak bé ni gwéhna hala bé ni bé. Hala nyen bôt bobasôna b’a yi le ni yé banigil bem, ibale ni ngwéhna bé ni bé.”​—Yôhanes 13:34, 35.

Kii Yésu a bi boñ: Yésu a bé unda mintén mi bôt nwominsô bañga gwéha, ibabé i béñge too ba nyep, too ba yé ngwañ, to hee ba nlôl. A bé mbuubaha bakokon, a kéblak bôt bijek, a bi ti yak niñ yé inyu bôt ba binam.​—Matéô 14:14-21; 20:28.

Kii bikristen bi mboñ: Bikristen bi ñunda bañga gwéha i ngéda bi nkap, bi undga le bi ntodol bé mut nye ki nye, bi nwéhlanaga. Bi nhôla diyeyeba, bi bak bebee i boñ bisesema inyu bôt bape.​—1 Yôhanes 3:16.

Bikristen bi yé maliga

Kii Yésu a bi kal: “Me yé . . . maliga.”​—Yôhanes 14:6.

Kii Yésu a bi boñ: Yésu a bé maliga i bipôdôl ni i bibôñôl. A maa bé lôk bôt, to tinde bo i si ni si, i boñ jam libe. Bôt ba bé yi le a yé maliga, yak i ngéda hala a bé lona nye bikuu.​—Matéô 22:16; 26:63-67.

Kii bikristen bi mboñ: Bikristen bi ntembee bé, bi nsaa tas yap, bi nip bé, bi ngeñee bé to i bôlô, ndi bi nsal ngeñ yap i bôlô. (Rôma 13:5-7; Éfésô 4:28) Bi nkadal bé bôt moni ni malôga, bi mbéñge bé lipep li mut i ngéda makégse, bi nlôk bé to i ngéda bi nlama yônôs mapep inyu léba bôlô ni mam mape hala.​—Lôk Héber 13:18.

Bikristen bi gwé loñgeñem

Kii Yésu a bi kal: “Lona i meeni, a bé bobasôna ba ni ntumbba ni nson, ni bak ki ni bééga mbegee i ñét, m’a ti bé hogbe. Yoña kop yem nson, ni niglene ki i meeni inyule me gwé ñem nwee ni suhulnyuu, le ndi ni kôs hogbe. Inyule kop yem nson i ntomb i begee, yak mbegee yem i nhoi.”​—Matéô 11:28-30.

Kii Yésu a bi boñ: Tonjee nyen a bé kôôge Yésu bebee inyule a bééna loñgeñem. A bé gwés boñge, a hôgbahaga ba ba nok ndutu, a tinak bôt lipém.​—Markô 10:13-15; Lukas 9:11.

Kii bikristen bi mboñ: Bikristen bi mpôdôs bôt loñge; bi gwé bé bibuk bibe, to bibuk bi mpuñgu. (Éfésô 4:29, 31, 32) Bi ngwés bôt, bi yéñék manjel i lôl bo i mahôla.​—Galatia 6:10.

Bikristen bi nke bé i ndéñg

Kii Yésu a bi kal: “Jam Nyambe a ñat, mut nye ki nye a bagal bañ jo.”​—Markô 10:9.

Kii Yésu a bi boñ: To hala kii Yésu a bi biiba bé, a bi ti babiina makénd le ba ke bañ i ndéñg. (Matéô 19:9) A bi béhe bo inyu mam ma ma yé le ma mélés libii jap.​—Matéô 5:28.

Kii bikristen bi mboñ: Bikristen bi mboñ bé jam jo ki jo li li nti bé libii jap lipém. (Lôk Héber 13:4) Nwaa bo nlôm ba ngwéhna, ba tin-ga lipém.​—Éfésô 5:28, 33.