MAMBADGA BOÑGE BA WANDA BA MBÉNA BAT

Baa me nlama sôblana?—Pes bisu: Kii i yé sôble?

Hiki nwii, ngandak boñge ba wanda ba ba bi néñél i lihaa li Mbôgi Yéhôva ba bi sôblana. Baa yak we u gwé ngôñ i sôblana? Ibale hala, u nlama ndugi yi kii i ti wemede nkikip ni sôblana bi nkobla.

Kii i yé sôble?

I sôble Bibel i mpôdôl, i yé i yube mut nyensôna i malép, i ta bé i kôp mut malép i ño, ndi i yé yimbne i jam li nlôôha ba nseñ.

I ngéda ba nyube mut nyensôna ikété malép i kel sôble, hala a ñunda i mbamba le a niñ ha bé inyu yé nyemede.
I ngéda u mpam ikété malép, hala a ñunda le u mbôdôl niñ i yondo: u niñ inyu boñ sômbôl i Djob.

I ngéda mut a nsôblana, a ñunda i mbamba le Yéhôva nyen a gwé kunde i kal nye kii yé loñge ni kii i yé béba, a mpahal ki i mbamba le a ga boñ ndik mam Yéhôva a mbat nye.

Hek pék: Kii i nlama tinde we i nôgôl Yéhôva niñ yoñ yosôna? Béñge 1 Yôhanes 4:19 ni Masoola 4:11.

I ti wemede nkikip, kii hala a nkobla?

Ilole u nsôblana, u nlama ti wemede nkikip yak Yéhôva. Lelaa?

Ikété masoohe, u mbôn Yéhôva le u ga gwélél nye i boga ni boga, le u ga boñ kii yosôna a mbat we to kii i mpémél we, ibabé i béñge i yom bôt ba mboñ.

Sôble i ñunda i mbamba le u nti wemede nkikip. I nyis bape le u niñ ha bé inyu wemede ndi le ibôdôl nano, u niñ inyu Yéhôva.—Matéô 16:24.

Hek pék: Inyuki niñ yoñ i ga lama ibale u nkit le u ngwélél Yéhôva? Béñge Yésaya 48:17, 18 ni Lôk Héber 11:6.

Inyuki sôble i yé nseñ?

Yésu a bi unda le inyu boñ le mut a ba nnigil wé, a nlama sôblana (Matéô 28:19, 20). Jon inyu ba kristen, mut a nlama sôblana. Yak Bibel i nyigye le inyu kôhna tohi, mut a nlama sôblana.—1 Pétrô 3:21.

Ndi u nlama sôblana inyule u ngwés Yéhôva, ni inyule u nti nye mayéga inyu mam malam a mbôñôl we. U nlama bana minlélém mi mahoñol kiki ntôp tjémbi nu a ntila le: “Kii me yé le me timbhe Yéhôva inyu loñge yosôna a bi bôñôl me? . . . M’a sébél ki jôl li Yéhôva. M’a yônôs makak me bi kégél nye.”—Tjémbi 116:12-14.

Hek pék: Mambe mam Yéhôva a ma bôñôl we, lelaa u yé le u ti nye mayéga? Béñge Ndiimba Mbén 10:12, 13 ni Rôma 12:1.

Yom bôt ba nhoñol ni yom i yé

YOM BÔT BA NHOÑOL — Ndik minañak mi bôt nwon mi yé nhôôlak inyu kôs sôble.

YOM I YÉ — Nwii bé nwon mi ñunda le mut a yé nhôôlak, ndi gwéha yé inyu Yéhôva ni i ngéda a yé bebee i nôgôl nye. Yôsep, Samuel ni Yôsia ba bi unda le ba yé nhôôlak ki le ba bé ba ngi yii boñge ba wanda. Yak i len ini, ngandak boñge ba wanda ba mboñ nlélém.

Bibel i nkal le: “To ibale a ngi yii mañge, maboñok ma mut ma ga unda too a gwé bilem bilam, too a gwé bilem bibe.”—Bingéngén 20:11, MN.

YOM BÔT BA NHOÑOL — Ibale mawanda moñ ma nsôblana, yak we u nlama sôblana.

YOM I YÉ — Ñem u hiki mut won u nlama tinde nye i ti nyemede nkikip yak Yéhôva ni i sôblana. Sôble i ta bé makégse, i ta bé to lem i mbok inyu unda le u nañ. U nlama bé sôblana ndik inyule bape ba nsôblana, to inyu lémél bôt.

Bibel i nkal le: “Bôt ba [Nyambe] ba ga ti bomede nkikip ni ñem wap wonsôna.”—Tjémbi 110:3.

YOM BÔT BA NHOÑOL — Ibale u yé ngi sôblana, u gwé bé le u timbhe inyu maboñok moñ.

YOM I YÉ — Ndik i ngéda u nkôs sôble bé nyen u ga timbhe bé i bisu bi Yéhôva, ndi i ngéda u mal yi loñge ni béba, u gwé le u timbhe i bisu bi Yéhôva.

Bibel i nkal le: “Jon mut a nyi boñ loñge ndi a boñ bé yo, wee a mboñ béba.”—Yakôbô 4:17.

MAÉBA: Ibale u nkon woñi i ti wemede nkikip ni i sôblana, inyuki u ta bé le u wanba inyu yi kii i nkônha we woñi, ni lelaa u nla yémbél i woñi u? Ini kaat ni hop Pulasi le Les jeunes s’interrogent. Réponses pratiques (volume 2) i pes yé 37 i nla hôla we.