Di nla ba maséé to ibale ba ñoo bés

1. Kii Yésu a bi kal, inyuki bibuk gwé bi nla hélés bés?

MU NKWEL wé i ngii hikôa, Yésu a bi kal le: “Maséé ni bé i ngéda bôt ba ñoo bé.” (Lukas 6:22) I bibuk bi, bi bi lama hélés i bet ba bé emble nye. I maliga, mut to wada a ta bé maséé le ba oo nye. Inyuki Yésu a bi kal ni hala? I mbadga i, i yé ilam ngandak inyule i len ini, ngandak bôt i ñoo bés banigil ba Yésu. Di tehe inyuki bôt ba ñoo bés, ni inyuki di nla ba maséé to ibale ba ñoo bés.

INYUKI BÔT BAHOGI BA ÑOO BÉS?

2-3. Inyu imbe njom bôt ba ntééñga bañga bikristen, lelaa hala a ntinde bés i tehe bakolba bés? (Yôhanes 16:​2, 3)

² Bôt ba ñoo bés inyule di mbégés Yéhôva. Inyu bet ba bé le ba tééñga banigil bé, yak ni i bet ba bé le ba nol bo, Yésu a bi kal le: “Ba bi pam bé i yi to Tata, to me.” (Añ Yôhanes 16:​2, 3.) Inyuki ba bi pam bé i yi Tata? Di ôt le pék ndék, njee nye a mboñ nga le bagwélél ba Yéhôva ba bana ngolba? Satan nu, “nyambe nu nkoñ ’isi unu.” (2 Korintô 4:​3, 4) A nyip bôt mis inyu boñ le ba yi bañ maliga inyu Nyambe, a ntinde ki bo i kolba i bet ba nyi Yéhôva, ba gwéhék nye. (Yôhanes 8:​42-44) Kiki di nyi le Satan nyen a nlôk bakolba bés, lelaa ni di ntehe bo? Hala a nhôla bés le to ibale bo ba ñoo bés, bés di oo bañ bo.

³ Di pôdôl Pavel,a nu a niñ i het ba nsôña nson wés. Kiki a bé téñbe i gwélél Yéhôva, ba bi gwel nye, ba bép nye ndôm tôlô, ba leñ nye i ndap mok, ba bi ha nye wé homa nyetama ngandak sôñ. Pavel a nkal le: “Inyu yem, pééna i ta bé, Satan ni mimbuu nwé mimbe bon ba ngwélél ndééñga inyu kéñ bôt i gwélél Yéhôva. Me nyi le ngandak bôt i i nsal i mandap ma mok, i ñunbene bé bés, i nôgôl ndik bioda ba nti bo.” Mankéé wada i loñ Krôasia, nu bagwal ba ta bé Mbôgi Yéhôva ba bi tééñga bañga bañga, a nkal le: “Nano me nok le Satan nyen a yé me bañga ñoo, he bagwal bem bé.”​—Éfésô 6:12.

4. Kii ndémbél i Yésu ni Étien i niiga bés? (Béñge yak titii.)

⁴ Di ñoo bé bôt ba nkolba bés. I maliga, bés di nsoohe yak inyu yap. (Matéô 5:44) I jam li jon ndémbél i Yésu ni Étien i niiga bés. I ngéda bisônda bi Rôma bi bi tômôl Yésu i kék njiiha, a bi soohe le: “A Ta, nwéhél bo.” (Lukas 23:34) Yésu a bi bat Yéhôva le a nwéhél i bisônda bi bi kôhna oda le bi nol nye. Bebek, a bé hoñol yak bôt ba litén baéga base ba bé tinde i lond le: “A nlama nôla.” Yésu a bi yi le to bisônda, to bôt ba litén ba bé yi bé toi i yom ba bé boñ. Yak Étien a bi soohe Yéhôva le a nwéhél i bôt ba bé ôm nye ngok inyu nol nye. (Minson mi baôma 7:​58-60) Baa Yéhôva a bi emble masoohe ma Yésu ni ma Étien? Ñ. Mukété bôt ba bi nol Yésu, ngandak i bi hiel miñem, i unda le i nhémle nye, i sôblana ki. (Minson mi baôma 2:​36-41) Mukété bôt ba bi nit makidik le ba nol Étien, i ndék yosô, mut wada mu le Saulô nu Tarsô, a bi yila kristen; a tam ki mam mabe momasôna ngiyi i bi tinde nye i boñ.​—1 Timôtéô 1:13.

5. Kii ñañ u César u niiga we?

⁵ I len ini, Yéhôva a nke ni bisu i emble masoohe di nsoohe inyu bet ba nkolba bés. Di yoñ hihéga hi César nu a yé i Vénézuéla. Isañ a bé kolba maliga iloo ’héga. César a nkal le: “Mama yem a bé loñge nwaa ni loñge nyañ bon kiyaga. A bé waa bé bii nson u Ane i bisu, ndi a bi yôi bé papa to ndék. Mama a bi niiga bés bon bé le di ti pua lipém. A kal ki bés le di nôgôl nye, a mah le a kal bés le di boñ i yom Yéhôva a ñoo.” I mbus ndék nwii, isañ César a bi bôdôl héñha. César a nkal le: “Kel yada, me bi soohe Yéhôva bañga bañga; i mbus, me bat pua too a nla nigil Bibel ni me. Me nyi bé lelaa me toñol i maséé me bi nôgda i ngéda a bi neebe.” I mbus ngéda, isañ César a bi sôblana. Bakolba bés bobasôna bé bon ba ga boñ i mahéñha ma, ndi bahogi ikété yap ba nla héñha i ngéda ba ntehe maboñok més malam ni lipém di nti bo. Kinje maséé di yé di nôgda ha ngéda i! Di nyamnda ni ngôñ i tehe lelaa Yéhôva, Nyambe nu konangoo ni “Nkéés nu hisi hiosôna,” a yé le a kônde ôt i mintén mi bôt mi i nyeni.​—Bibôdle 18:25.

6. Inoñnaga ni Markô 13:​13, inyu imbe njom ipe bôt ba ñoo bés?

⁶ Bôt ba ñoo bés inyule di neebe le Yésu nyen a yé Kiñe yés. Yésu a bi kal le bôt ba ga oo bés ‘inyule di yé banigil bé.’ (Añ Markô 13:13.) Hala a nkobla le di nsôñ “jôl jé,” di neebe ki le nyen a bi kôhna kunde i ba Kiñe i Ane Nyambe. Bôt ba ñoo bés inyule ba mbôdôl baane ba nkoñ ’isi ñem, ndi Yésu Kristô nu Yéhôva a bi pohol le a ba Kiñe, ba nkôm nye mbus. To kii i leñek, Yésu nye a bi mal yila Kiñe i Ane Djob i nwii 1914. Ndék ngéda, a ga tjé biane gwobisôna bi bi ntjél neebe énél yé.

7-8. Imbe njom ki i ntinde bôt i ndegle Mbôgi Yéhôva? (Yôhanes 15:​18-20) (Béñge yak bititii.)

⁷ Bôt ba ñoo bés inyule di mboñ bé mam kiki bo. Yésu a bi toñol le bôt ba ga oo banigil bé inyule “ba ta bé bôt ba nkoñ ’isi.” (Añ Yôhanes 15:​18-20.) Kiki bikristen bi hiai bisu, yak bés di ntjél mahoñol, bipôdôl ni maboñok ma ma mbébél Yéhôva. Inyu hala nyen bôt ba gwé lem i ndegle lôk kéé i homa bôlô tole i suklu. (1 Pétrô 4:​3, 4) Ndi di yé di ba maséé i ngéda bakolba bahogi ba yé ba héñha litehge jap inyu yés, ba béghak bés.

⁸ Di tehe i yom i bi pémél Ignacio, nu a yé i Amérika Ñemkété. Malét wé suklu wada a bi ndegle nye ngandak nwii inyule a bé nôgôl matiñ ma Bibel. Ilole a mélés suklu yé, i malét nu a bi bat nye kii i nhôla nye i ke ni bisu i nôgôl matiñ ma Bibel, ki le libim li bôt li waa bé ndegle nye. Ignacio a bi toñle nye le matiñ ma Bibel mon ma nsôñ nye. I mbus, a naña malét i likoda. Ignacio a bi hel ngandak a ma tehe malét wé a nlo i ndap Ane. Malét a bi yimbe le lôk kéé i ngwéhna ngandak, hala a tihba nye, a bôdôl lo i makoda. I mbus ngéda, nyemede malét a bôdôl boma ngolba inyule a bé nigil Bibel. To hala, a bi hol letee ni i sôble.

9-10. (a) Inyu imbe njom ipe bikristen bi yé mahéñha ni bôt ba nkoñ ’isi u Satan unu? (b) Kii ndémbél i ñôma Paul i niiga bés?

⁹ Di yé ki mahéñha ni nkoñ ’isi u Satan inyule di nyoñ bé ngaba yo ki yo i gwét, to i mam ma m’bô. (Yôhanes 18:36) Inoñnaga ni maéba kaat Rôma 13:1 i nti, di mboñ biliya i nôgôl ngomin. Ndi bés bikristen, di nyoñ bé ngaba yo ki yo i mam ma m’bô. Di nyéñ bé bitel bi m’bô, di mpohol bé to ñane loñ. Inyuki? Inyule di bi pohol le ndik Ane Yéhôva yon di nit, i Kristô a ñéga. Ngandak Mbôgi Yéhôva i yé i mok nano inyu hémle yap. Ndi yak nyoo, ba nke ni bisu i téé likalô. Ba nigle ñôma Paul nu a bi tégbaha ngandak nwii i mok. (Minson mi baôma 24:27; 28:​16, 30) Ndi a bi ke ni bisu i añle ba ba bé emble nye ñañ nlam, kii bo batat ndap mok, bakéés, baane ba bipes bi mbok, bikiñe, bebek yak bañga bôt i i bé sélél ñane nkeñi nu Rôma le Néron.​—Minson mi baôma 9:15.

¹⁰ Yak i len ini, lôk kéé i i yé i mandap ma mok i ñañle bôt ba ngwés emble bo ñañ nlam, bôt kii bo bakéés, bôt ba ngomin ni batat ndap mok. Mankéé wada, nu a bi tégbaha iloo nwii minsamal i mok inyule a bi tjél yoñ ngaba i mam ma m’bô, a nkal le a bé tehe bé mok kiki kogse, ndi a bé tehe nwo kiki bo ngim nkoñ u likalô Yéhôva a nti nye, inyu yéñ ba ba yé le ba ba mintômba nwé. Maséé ma yé ma nol bés i ngéda di nwas Yéhôva le a gwélél bés inyu añle i nya bôt i ñañ nlam! (Kôlôsé 4:3) Di tehe manjom mape ma ma nlona bés maséé to ibale ba ñoo bés inyule di ngwélél Yéhôva.

LELAA DI NLA BA MASÉÉ TO IBALE BA ÑOO BÉS?

11. Lelaa ndééñga i nla lédés hémle yés? Ti hihéga.

¹¹ Di nyi le ôa i nkoñ ’isi i nyônôs mbañ i Bibel. Yéhôva a bi kal i mbañ yé bisu le Satan ni mbôda yé, hala wee i bôt bobasôna ba nit nye, ba ga oo i bet ba ngwés Yéhôva, ba gwéélak nye. (Bibôdle 3:15) Mu bikaat bina bi bi mpôdôl niñ yé, Yésu nyemede a bi yigye i jam li ngandak ngélé. (Matéô 10:22; Markô 13:​9-12; Lukas 6:​22, 23; Yôhanes 15:20) Yak batila Bibel bape ba bi pot nlélém. (2 Timôtéô 3:12; Yakôbô 1:2; 1 Pétrô 4:​12-14; Yuda 3, 17-19) Inyu hala nyen i ngéda ndééñga i mbôdôl, hala a nhélés bé bés. Ndi di yé di ba maséé i tehe lelaa mbañ i Bibel i nyon. Hala a nkwés ndik bés nkaa le di mbégés toi bañga Nyambe. Sita yada i i niñ i het ba nsôña nson wés i nkal le: “I ngéda me bi ti memede nkikip yak Yéhôva, me bé yi le to kii leñek, m’a boma ndik ndééñga. Jon i ngéda manoodana ma bi lo, ma bi kônha bé me woñi, ma bi hélés bé to me.” Ikété bakolba bé, nlôm a bé wada mu. A bi kép nye mbai bañga bañga, a ligis yak Bibel yé ni bikaat gwé. Ndi to hala, sita yés i bi sehla bé to ndék, hémle yé yo i bé ndik i nkônde keñep. (Lôk Héber 10:39) A nkal le: “Bibel i bi béhe bés le ndééñga y’a lo, jon me bé yi le y’a lo ndigi. Ndééñga i bi kwés me nkaa le me yé i base maliga.”

12. Kii i bi hôla mankéé wada i hônba ndééñga?

¹² Di nyi le di ga boma ndééñga, ndi hala a nkobla bé le hala a yé jam li ntomb i hônba yo. Mankéé wada a mbigda ngéda a bi tégbaha i mok, a nkal le: “Ngim mangéda, nduña i bé i ba me nnayak, me bôô ndik maéya. Kii i bi hôla nye i pamba? A ntimbhe le: “Me bé soohe hiki ngéda. Me bé soohe hiki kegla. I ngéda me bé boma ngim ndutu, me bé me soohe. Yak i ngéda ngitelepsép i bé unbaha me, me bé me yipba i luk, me soohe.” Mankéé wés a bé yoñ ki ngéda i ôt pék mu ndémbél i ndéñbe bagwélél ba Yéhôva ba kôba ni ba len. Hala a bi hôla nye i hônba ndééñga ni i bana nsañ Yésu a bi bôn banigil bé.​—Yôhanes 14:27; 16:33.

13. Kii i nla hôla bés i yémbél ôa?

¹³ Gwéha yés i gwé ngui iloo ôa i nkoñ ’isi. Yésu a bi waa bé gwés Isañ kel to yada, to i ngéda a bé pémés nhébék wé u nsôk. Yésu a bé a ngwés yak banigil bé. (Yôhanes 13:1; 15:13) Ibale di nke ni bisu i unda le di ngwés Yéhôva ni lôk kéé, di ga la yémbél ôa. Lelaa? Inyu timbhe i mbadga i, di béñge ndémbél i ñôma Paul.

14. Kii i bi hôla Paul i téñbe ni Yéhôva to hala kiki a bé yi le ba nla nol nye?

¹⁴ Ndék ngéda ilole a nwo, Paul a bi tilna Timôtéô le: “Nyambe a bi ti bé bés miñem mi mbomb, ndi miñem mi ngui, [ni] mi gwéha.” (2 Timôtéô 1:7) Kii Paul a bé sômbôl kal? A bé gwés kal le i gwéha kristen i gwé inyu Yéhôva yon i ntinde nye i yémbél manoodana. (2 Timôtéô 1:8) I gwéha i yon yak Paul a bééna inyu Yéhôva, jon a bi téñbe to hala kiki a bé yi le ba nla nol nye inyule a ngwélél Yéhôva.​—Minson mi baôma 20:​22-24.

15. I len ini, lelaa lôk kéé i ñunda bañga gwéha ipôla yap? (Béñge yak titii.)

¹⁵ Ibabé pééna, bagwélél ba Yéhôva ba ngwés lôk kéé yap i i nke ni bisu i téñbe to hala kiki i mboma ndééñga. I len ini, bahogi ba yé bebee i nimis niñ yap inyu lôk kéé yap, nlélém kiki Priska bo Akila ba bé bebee i nimis niñ yap inyu Paul. (Rôma 16:​3, 4) Kiki hihéga, i loñ Ruslan, ngandak Mbôgi Yéhôva i yé i ke i ndap bikééhene inyu ti i bet ba bi gwel makénd. I ngéda sita yada, i i bé mok, i bi tehe lôk kéé i nlo i nit nye, hala a bi tihba nye ngandak kayéle a yén ngim ngéda, a la bé pot. I gwéha ngi mandon lôk kéé i bi unda nye i bi lédés nye i ngéda a bé bebee ni tomb. Ñ, gwéha yés i nloo ôa i nkoñ ’isi!

16. Inyuki Pétrô a bi kal le i bet ba nhônba ndééñga inyule ba ngwélél Djob, ba gwé njom i ba maséé? (1 Pétrô 4:14)

¹⁶ Djob a nkônôl bés maséé i ngéda di nhônba ndééñga. (Añ 1 Pétrô 4:14.) Ñôma Pétrô a bi kal le i bet ba nhônba ndééñga inyule ba ngwélél Djob, ba gwé njom i ba maséé. Inyuki? Ndééñga i ñunda le “mbuu Nyambe u yé i ngii [yés].” Pétrô a bé yi maséé mut a yé le a nôgda i ngéda a nlémél Nyambe, ni i ngéda a nhônba mandutu. Ndék ngéda i mbus Pentékôt 33 N.Y., ba bi om bisônda bi bi bé sal i témpel i gwel Pétrô ni bana baôma bape inyule ba bé téé likalô. Ndi ni ñem ngui, Pétrô a bi sôñ hémle yé. (Minson mi baôma 5:​24-29) To hala kiki ba bi bép bo, nye ni bana baôma bape ba bi ke ni bisu i téé likalô. Ba bi kon maséé inyule “ba bi éña kiki bôt ba kôli kôhna wonyuu inyu jôl li [Yésu].” Yak bés, di nla ba maséé i ngéda di nhônba mandutu.​—Minson mi baôma 5:​40-42.

17. I u u nsôk ilole a nwo, kii Yésu a bi kal banigil bé?

¹⁷ I u u nsôk ilole a nwo, Yésu a bi kal banigil bé le: “Nu ni nu a ngwés me, Tata ki a’ gwés nye; yak me, m’a gwés nye.” (Yôhanes 14:21) Di nyamnda ni ngôñ i niñ i ngéda bôt bobasôna ba ga oo ha bé bés, ndi i ngéda bobasôna ba ga gwés bés, inyule di gwélél Yéhôva! (2 Tésalônika 1:​6-8) Ndi ilole di mpam ha ngéda i, di yôñôl ndugi ngui mu ngandak manjom di gwé i ba maséé to ibale bôt bape ba ñoo bés.