Mambot més ni bieñg gwés

Bésbobasôna di nhaba bé nya yada, di ngwés bé to minlélém mi bieñg. Ndi ibale di nôgôl matiñ ma Bibel, bésbobasôna di nla eñgep i nya i nlémél bés i lémlak yak Yéhôva. Di wan ngim matiñ i i nla hôla bés.

1. Mambe matiñ ma nla hôla bés i tibil pohol mambot més ni bieñg gwés?

Di nlama pohol “mambot ma kôli, lôñni hôtnyuu ni liyi hek pék,” kayéle di bana linen-ge lilam, li li ñéba bôt bape le ‘di tiñi ni Nyambe.’ (1 Timôtéô 2:9, 10) Di béñge matiñ ma Bibel ma-na di nla ôt mu minlôñ mi Bibel di ntip soñgol: (1) Mambot més ma nlama ba ma “kôli.” Kiki di ntehe i makoda més, bagwélél ba Yéhôva ba nhaba bé nya yada, ndi mambot més ni bieñg gwés bi ñéba le di ngwés Djob. (2) “Hôtnyuu” hala wee, mambot més ma nlama bé tééñga bôt bape tole ma éba bijô gwés bi nyuu. (3) “Liyi hek pék” hala wee, di bana bañ lem i somb hiki yom i ntip pam. (4) Bieñg gwés bi nlama éba le di yé bôt ba ba “ntéñbe” ni Nyambe, hala wee bi nlama unda bôt bape le di mbégés bañga Nyambe.—1 Korintô 10:31.

2. Kii lôk kéé i nhoñol inyu haba wés?

To hala kiki di yé kunde i pohol i yom di nsômbôl haba, di nlama yoñ yihe ni i yom bôt bape ba ga hoñol. Di mboñ biliya le di tééñga bañ mut to wada, ndi, di nliya i “lémél mut [wés] libôk inyu boñ nye loñge, ni inyu hôlôs nye.”—Añ Rôma 15:1, 2.

3. Baa haba wés u nla tinde bôt i gwélél Yéhôva?

Di mboñ biliya inyu haba loñge hiki ngéda, ndi téntén i ngéda di nke makoda més, tole likalô. Bôt ba nlama emble ñañ nlam di ñañle bo, iloole ba kida i béñge haba wés. Maselna ni hala, di nsômbôl le haba wés u ôt bôt i maliga, u ‘lémés ki biniigana bi Nyambe wés ni Ntohol wés.’—Titô 2:10.

KÔNDE TÉM

4. Bieñg ni mambot ma ma nti Yéhôva lipém

Kii i tinde bés i yoñ yihe ni haba wés ni bieñg gwés? Añ Tjémbi 47:2, i mbus ni kwélél mambadga mana:

• Kiki di yé bagwélél ba Yéhôva, lelaa hala a nla tinde bés i tibil pohol mambot més ni bieñg gwés?

• Baa u nhoñol le i yé loñge i tibil pohol mambot més i ngéda di nke makoda tole likalô? Inyuki u nkal hala?

5. Matiñ ma ma nhôla bés i tibil pohol mambot més ni bieñg gwés

Tuk VIDÉÔ.

VIDEÔ: “Boña mam momasôna le Nyambe a kôhna lipém.” (10:18)

To mambot més ma nhee diye to ma nhee bé diye, i yom i nlôôha ba nseñ i yé le, ma nlama ba mapubi, ma kiha ki ni i bôlô di nsal. Añ 1 Korintô 10:24 ni 1 Timôtéô 2:9, 10. I mbus, ni kwel inyu yi inyuki di nlama bé haba mambot ma ma . . .

• yé mahindi ma bak bipéda.

• nlôôha sude mut nyuu, ma tôdlak ngôñ malal.

To hala kiki bikriten bi ta ha bé isi Mbén Môsi, i mbén i, i nhôla bés i yi mahoñol ma Yéhôva inyu mambot ni bieñg. Añ Ndiimba Mbén 22:5, i mbus ni kwélél i mbadga ini:

• Inyuki di nlama tjél mambot ni bieñg bi bi mboñ le munlôm a pôôna muda, tole muda a pôôna munlôm?

Añ 1 Korintô 10:32, 33 ni 1 Yôhanes 2:15, 16, i mbus ni kwélél mambadga mana:

• Inyuki di nlama yoñ yihe le, haba wés tole bieñg gwés bi tééñga bañ bôt ba libôga jés, to lôk kéé i likoda?

• Mimbe mintén mi mambot ni bieñg bôt ba nhaba i libôga joñ?

• Baa u nhoñol le ngim mahabga mu i ta bé loñge inyu bikristen? Inyuki u nkal hala?

I SEM KWEP

I ngéda di ntibil pohol mambot més ni bieñg gwés, di ñéba le di nti Yéhôva lipém, di diihege ki bôt bape.

Mambadga ma mbidga

• Inyuki haba wés ni bieñg gwés bi yé nseñ i mis ma Yéhôva?

• Mambe matiñ ma Bibel ma nla hôla we i tibil pohol mambot moñ ni bieñg gwoñ?

• Inyuki di nla kal le haba wés ni bieñg gwés bi nla tinde mut i gwés maliga tole i oo mo?

KÔNDE YÉÑ

Kii bôt bape ba nhoñol, i ngéda ba ntehe mambot u nhaba?

“Ngéda mut a ntehe haba wem, kii a nhoñol?” (Kee i jw.org)

Inyuki di nlama tibil hek pék ilole di nkebba bikun, hala wee di mboñ tatouage i nyuu yés?

“Kii Bibel i nkal inyu i kebba bikun (taouage)?” (Kee i jw.org)

Béñge ngim matiñ ipe i i nla hôla we i yoñ makidik malam.

“Baa mambot u nhaba ma nti Djob lipém?” (Nkum Ntat Dipos 2016)

Béñge ñañ u mut wada nu a bi sôk neebe le yak bôt bape ba gwé kunde i pohol.

“Je croyais que la coquetterie était condamnable” (Réveillez-vous!, 22 décembre 2003)