Yigil 5

Bitééne bi Djob inyu hisi bi yé lelaa?

Inyuki Yéhôva a heg hisi? (1, 2)

Inyuki hisi hi ta bé paradis i len ini? (3)

Ki y’a pémél bibéba bi bôt? (4)

Ngéda i nkee lo, ki Yésu a’ bôñôl bakokon, mimañ mi bôt, bawoga? (5, 6)

Inyu bana bisai bi nkee lo, ki u nlama boñ? (7)

1. Yéhôva a heg hisi hini le bôt ba kon masé i niñil mu i boga ni boga. A ba gwéhég le hisi hi bana bôt ba téé sép, bôt ba nkon masé ngéda yosô. (Tjémbi 115:16; Yésaya 45:18) Hisi hi ga tjé bé kel yo ki yo; hi ga nom boga ni boga.—Tjémbi 104:5; Ñañal 1:4.

2. Ilole Djob a ba heg mut binam, a teb man homa hisi, a hielel nye loñge paradis. A sébél nye le wom Eden. Mu nyen a yihne munlôm nu bisu ni muda nu bisu, Adam ni Eva. Bitééne bi Djob bi bé le ba gwal bon, ba yônôs hisi hiosô. Ndég ni ndég, ba bé lama hielel hisi hiosôna Paradis.—Bibôdle 1:28; 2:8, 15.

3. Adam bo Eva ba kôôba tjél nôgôl mbén Djob ni bo ba boñ béba. Jon Yéhôva a luhul bo i wom Eden. Paradis i nimil. (Bibôdle 3:1-6, 23) Ndi Yéhôva a hôya bé bitééne gwé inyu hisi. A mbôn le a nhielel hio paradis, mu nyen bôt ba ga niñil boga ni boga. Lelaa a ga boñ lini jam?—Tjémbi 37:29.

4. Ilole hini hisi hi nyila paradis, bibéba bi bôt bi nlama nyodi. (Tjémbi 37:38) Hala a ga bôña i Armagédôn, gwét bi Djob bi bi mélés béba. I mbus hala Satan a ga kee i mog inyu 1 000 nwii. Hala a nkobla le béba mut to yada y’a yégle bé inyu ôbôs hisi. Bôt ba Djob botama bon b’a pei.—Masoola 16:14, 16; 20:1-3.

5. I mbus hala Yésu Kristô a ga énél hisi inyu 1 000 mwii. (Masoola 20:6) Ndég ni ndég a ga héya béba i mahoñol ni i manyu més. Di ga yila bôt ba ba gwé libak li peles kii Adam bo Eva ba bé bo ngi boñ béba. Ha ni nyen to makon, to biuni, to nyemb b’a ba ha bé. Bakokon b’a mbôôb, mimañ mi bôt mi témb njohog.—Hiôb 33:25; Yésaya 33:24; Masoola 21:3, 4.

6. Ngéda Ane i Yésu i hikôô hi nwii, bôt ba manôgla ba ga sal inyu yilha hisi hiosô paradis. (Lukas 23:43) Didun di bawoga di ga tugla na inyu niñil munu hisi. (Minson mi baôma 24:15) Ibale ba mboñ yom Djob a’ ba a mbat bo, ba ga niñ munu hisi boga ni boga. Ndi ibale hala bé, ba ga tjiba mba ni mba.—Yôhanes 5:28, 29; Masoola 20:11-15.

7. Ha nyen bitééne bi Djob bi bibôdle inyu hisi bi ga yon. Ba u yé le u gwés yoñ ngaba munu bisai bini? Ibale hala, u nlama ke ni bisu i nigil yi Yéhôva ni nôgôl mambén mé. Like makoda i Ndap Ane i Mbôgi i Yéhôva li ga hôla we i boñ hala.—Yésaya 11:9; Lôk Héber 10:24, 25.

[Titii i lipep 10]

Paradis i nimil

[Bititii i mapep 11]

I mbus Armagédôn, hisi hi ga yila paradis