Yigil 4

Njee a yé Nsohop?

Satan Nsohop—a nlôl hee? (1, 2)

Lelaa Satan a nlôg bôt? (3-7)

Inyuki u nlama kolba Nsohop? (7)

1. Jôl li “nsohop” li kobla le mut a mpot bitembee inyu boñ numpe béba. “Satan” hala we ñoo, tole nkolba. Môl ma ñoo Djob nu bisu ma. I bibôdle, a ba añgel peles i ngii i pañ Djob. Mbus ngéda, a bôdôl hoñol bikeñi inyu nyemede, a kahal sômbôl kôhna bibégés bi nlama tiba ndik Djob.—Matéô 4:8-10.

2. I añgel ini le Satan, i pôdôs Eva ni njel nyoo. A gwélél bitembee le ndi muda a ndogbene Djob. Hala nyen Satan a bi kolba yom i nsébla le “kahab” Djob to le tel yé i Nungingii. Satan a pééna le ane i Djob i yé njel i nlona biloñge bi mam inyu bet i ñénél. Satan a pééna ki le mut nye ki nye a nla bé téñbe nôgôl Djob. Ni njel ini yon Satan a bi yilha nyemede ñoo Djob. Inyu hala nyen a sébla le Satan Nsohop.—Bibôdle 3:1-5; Hiôb 1:8-11; Masoola 12:9.

3. Satan a nheñ i lôg bôt le nyen ba béghag. (2 Korintô 11:3, 14) Njel yada a ngwélél i yumus bôt i yé base bitembee. Ibale base i niiga bitembee inyu Djob, we base i i mboñ sômbôl i Satan. (Yôhanes 8:44) Bôt ba yé i base bitembee ba nla hoñol ni ñem wap wonsô le ba yé i bégés Djob li maliga. Ndi i maliga nwet ba nsélél a yé Satan. Nyen a yé ‘djob li hiai hini.’—2 Korintô 4:4.

4. Ligwélél mimbu mimbe li yé ngim njel ipe i yé le Satan a mbémbne bôt. Bôt ba nla sébél mimbuu mimbe le mi tat bo, ni boñ bôt bape béba, ni kal bo mam ma nke lo mbus ngéda, tole i boñ mam ma hélha. Satan nyen a yé i béba ngui i i nit maboñog mana. Ibale di ngwés lémél Djob, di nlama bé bana maada mo ki mo ni mimbuu mimbe.—Ndiimba Mbén 18:10-12; Minson mi baôma 19:18, 19.

5. Satan a nlôg ki bôt ni ngandak ngôk u nlôl mbagla matén, ni libégés minlôñ mi mb’ô. Bôt bahogi ba nhoñol le litén jab tole loñ yab i nlel bi bape. Ndi hala a ta bé maliga. (Minson mi baôma 10:34, 35) Bôt bape ba nhoñol le minlôñ mi matéé ma loñ nwon mi ga mélés mandutu ma bôt hana isi. Ni hala nyen ba nlep Ane i Djob. Yotama yon y’a mélés mandutu més.​—Daniel 2:44.

6. Njel ipe i Satan a nyumhene bôt i yé le a ntinde bo i bana ngôñ mam mabe. Yéhôva a nkal bés le di keñgle maboñog mabe inyule a nyi le ma tiga nôgha bés ndutu. (Galatia 6:7, 8) Ngim bôt i nla yéñ le u kiha lôñ we ni bo inyu boñ mam mabe. Ndi u hôya bañ le Satan nyemede nyen a nsômbôl le u boñ mam ma.—1 Korintô 6:9, 10; 15:33.

7. Satan a nla bôñôl ndééñga to ngolba i tinde we le u nwas bôñôl Yéhôva. Bôt bape ba ba ngwés we ba nla unup ngandak inyule u nigil Bibel. Bape ba nla nol we. Ndi nje a bi ti we niñ? Satan a ngwés kôhna we woñi inyu boñ le u nwas nigil i yi nje a yé Yéhôva. U nwas bañ le Satan a yémbél we! (Matéô 10:34-39; 1 Pétrô 5:8, 9) Ibale u nkolba Satan, u yé le u kônha Yéhôva masé ni éba le u nit kahab yé.—Bingéngén 27:11.

[Bititii i mapep 9]

Base bitembee, ligwélél mimbuu mimbe, ni libégés loñ bi nyumus bôt

[Titii i lipep 9]

Kolba Satan, u téñbe nigil i yi Yéhôva