Neebe le bôt bape ba nloo we
Hee ndutu i nla lôl
Ibale u ntôñ ndigi wemede u nla kahal todol bôt bape. I mut a ntôñ ndigi nyemede a nhoñol le a yé nseñ ngandak. A ntehe le nyen a nloo bôt bape, a ntehe ki le ibale mut a ta bé kiki nye, wee a nloo nye. Bésbobasôna di nla bôdôl bana mahoñol ma. Kaat ni hop ngisi ba nsébél le Encyclopædia Britannica i nkal le: “Libim li [matén] li nhoñol le liniñik jap, bijek gwap, mambot map, bilem gwap, base yap, mam ma yéne bo nseñ ni mam mape ki ma nloo bi matén mape.” Kii di nla boñ inyu boñ le di bana bañ mahoñol mabe ma?
Maéba ma Bibel
“Ndi lôñni suhulnyuu, ni neebege le bape ba nloo bé.”—FILIPI 2:3.
Kii hala a nkobla? Inyu boñ le di bana bañ ngôk, di nlama sal ini lem ba nsébél le suhulnyuu. Lem suhulnyuu i mboñ bés le di neebe le i makas ma niñ mape, bôt bape ba nloo bés. Litén to jada li gwé bé bilem bilam gwobisôna to ngap yosôna i nkoñ ’isi.
Di yoñ le hihéga hi Stéfan. Ngéda a bé nañ, loñ yé yosôna i bé i ngim parti ba bé sébél le Parti Communist. Ndi a bé oo bana bôt bape ba bé biloñ het parti i, i bé bé. Ndi sôk i nsôk, a bi yémbél mahoñol mabe a bééna inyu bôt ba biloñ bi. A nkal le: “Me nok le ibale di ntehe le bôt bape ba nloo bés, d’a héya lem i todol bôt ikété miñem nwés. Me nyi bé me mam momasôna. Bôt bape ba nla niiga me mam me yik bé me.”
Kii u nla boñ
Bana litehge li mam li li kôli, u yik le wemede u gwé bibomb. Neebe le bôt bape ba nla boñ mam loñge iloo we. U hoñol bañ le, inyule bôt ba nlôl i nlélém litén, wee bobasôna ba gwé minlélém mi bilem.
U pala bañ bana mahoñol mabe inyu mut a nlôl i ngim litén, ndi badba le:
Neebe le bôt bape ba nla boñ mam loñge iloo we
‘Baa i lem i mbébél me yak mut nunu, i yé toi béba tole a yé ndik mahéñha ni me?’
‘Lelaa i mut nu nyemede a ntehe me?’
‘Mambe mam i mut nu a nla boñ loñge iloo me?’
Ibale u ntimbhe mambadga mana ni maliga, w’a tehe le u ga héya lem i todol bôt ikété ñem woñ. Ndi w’a tehe ki bilem bilam bôt bape ba gwé.