Bakéés

12 I mbus, bon ba Éfraim ba kodba, ba yap lép, ba ke i Zafôn,* ba kal Yifta le: “Inyuki u bi sébél bé bés i ngéda u bi ke jôs Lôk Amôn?+ D’a ligis ndap yoñ ni wemede mukété.” 2 Ndi Yifta a timbhe bo le: “Lôk Amôn i bi leñ me ni bôt bem gwét bi ngui. Me bi sébél bé le ni hôla me, ndi ni bi sôñ bé me. 3 Kiki me ntehe le ni nlo bé i sôñ me, me yoñ makidik i jôs Lôk Amôn+ to hala kiki me bé le me nimis niñ yem* mu gwét; ndi Yéhôva a bi hôla me i yémbél gwo. Inyuki ni nlo i len ini i jôs me?”

4 Yifta a bi kot bôlôm ba Giléad+ bobasôna, ba jôs Éfraim gwét; bôlôm ba Giléad ba yémbél bôt ba Éfraim ba ba bé kal le: “Bé bôt ba Giléad, ba ni nyééne i nkoñ u Éfraim ni u Manasé, ni yé ndigi bôt ba Éfraim ba ba bi so.” 5 Bôlôm ba Giléad ba bi yoñ mabôñ ma Yordan+ ilole bon ba Éfraim ba ntagbe; i ngéda man Éfraim a bé a lo le a ntagbe, a bé kal le: “Nwaha me me tagbe;” ndi bôlôm ba Giléad ba bé ba bat nye le: “U yé man Lôk Éfraim?” Ibale a ntimbhe le: “To!” 6 Ba nkal nye le: “Soho, kal le Shibôlet.” Ndi nye a bé kal le: “Sibôlet,” inyule a bé la bé pahal i buk i loñge. Ha nyen ba bé ba gwel nye, ba nol nye ha mabôñ ma Yordan. I bon ba Éfraim ba bi wo ha ngéda i, ba bé 42 000.

7 Yifta a bi kéés Israel nwii minsamal, i mbus ha, Yifta man Lôk Giléad a wo, ba jô nye i tison yé i Giléad.

8 I mbus yé, Ibsan mut Bétléhém, nyen a bi kéés Israel.+ 9 A bééna 30 ma bon bôlôm ni 30 ma bon bôda. A bi om bingond gwé i mabii yak bôlôm ba ba bé lôl mahaa mape, a biine yak bon bé bôlôm 30 ma bôda. A bi kéés Israel nwii minsaambok. 10 I mbus, Ibsan a wo, ba jô nye i Bétléhém.

11 I mbus yé, Élôn man Lôk Zébulôn nyen a bi kéés Israel; a bi kéés Israel jôm li nwii. 12 I mbus, Élôn man Lôk Zébulôn a wo, ba jô nye i Ayalôn i nkoñ u Zébulôn.

13 I mbus yé, Abdôn man Hilel, man Lôk Piratôn nyen a bi kéés Israel. 14 A bééna 40 ma bon bôlôm ni 30 ma balal, ba ba bé kil i ngii 70 ma magas. A bi kéés Israel nwii juem. 15 I mbus, Abdôn man Hilel, man Lôk Piratôn a wo, ba jô nye i Piratôn i loñ Éfraim, i hikôa hi Lôk Amalek.+