Ézékiel
27 Yéhôva a pôdôs ki me, a kal le: 2 “A man mut, tôp hiémbi hi maéya inyu Tir,+ 3 kal Tir le:
‘We nu u yiine i majubul ma tuye,
wen u mboñ nyuñga ni bôt ba ngandak biôn,
lana nyen Nwet Bayemlikok le Yéhôva a nkal:
“A Tir, wen u bi kal le: ‘Me nlôôha ba nlam.’+
4 Minkoñ nwoñ mi yéne i ñemkété tuye,
i bôt ba bi oñ we ba bi lémés we kiyaga.
5 Kiki ba mbañ sitima, hala nyen mabam momasôna ba bi gwélél inyu bañ we ma bé ni bie bi junipa* bi bi nlôl i Sénir,+
ba yoñ ki e sidar i Libañ inyu bôñôl we jél.
6 Ba bi bañ bipagô gwoñ ni bie bikeñi bi Basan,
ba bañ ki ño woñ u sitima ni bie bi sipré, bi ba bi lémés ni mañ mi njok, bi lôlak i biôn bi Kitim.+
7 Libadô joñ li sitima li bé ni mboñ u loñge bôñgô* u Égiptô, li ban-ga minsonol mi mi mbai,
yak mabadô moñ ma ma nti yiye ma bé ni bôñgô i i yé mangoñ,* ma bak ki ni bôñgô i mahuu ma ntômba i i yé wedewede,* ma lôlak i biôn bi Élisa.+
8 Bôt ba Sidôn ni bôt ba Arvad+ bon ba bé lugul we sitima.
Bôt boñ ba makeñge bon ba bé sélél we mu sitima.+
9 Minhôôlak mi bôt* ni bôt ba makeñge ba Gébal+ bon ba bé yip mapondo mu bisitima gwoñ.+
Bisitima gwobisôna bi tuye ni i bôt ba nsal mu ba bé lo i weeni inyu boñ nyuñga ni we.
10 Bôt ba Persia, ba Lud, ni ba Put+ ba bé mu ntôñ woñ gwét; bon ba bé bôt boñ ba gwét.
Ba bé kéi biben gwap ni bikôñgô gwap mu mapénd moñ, ba boñok le u kôhna lipém.
11 Bôt ba Arvad ba ba bé mu ntôñ woñ gwét ba bé ba téé mu mapañ momasôna ma mapénd moñ,
yak bilôs bi bôt bi bé tat minkum nwoñ mi mandap.
Ba bé kéi biben bi bi yé ngiiña mu bipes gwobisôna bi mapénd moñ,
ba lémhak we kiyaga.
12 “‘“Kiki u bé ngwañ ngandak, jon Tarsis+ a bé boñ nyuñga ni we.+ Tarsis a bé ti we silba, kei,* bende ni lipidô, le yak we u ti nye gwom gwoñ.+ 13 Yavan, Tubal+ ni Mések+ ba bé boñ nyuñga ni we. Ba bé ti we minkol+ ni gwom bi mamuna, le yak we u ti bo gwom gwoñ. 14 Bôt ba litén li* Tôgarma+ ba bé ti we bihosi, bihosi bi gwét ni minyabén mi hosi,* le yak we u ti bo gwom gwoñ. 15 Bôt ba Dédan+ ba bé boñ nyuñga ni we; bôt ba nyuñga ba ngandak biôn ba bé sélél we; ba tinak we mañ mi njok+ ni kalaklum* inyu saa we. 16 Édôm a bé boñ nyuñga ni we inyule u bééna ngandak gwom. Ba bé ti we ngok turkuas, ni bôñgô i mahuu ma ntômba i i yé wedewede,* ni mabadô ma ba mage, ma ban-ga minsonol minlam, ni biloñge bi mabadô, ni tik ngok i tuye,* lôñni kôyôp tik ngok, le yak we u ti bo gwom gwoñ.
17 “‘“Yuda ni Israel ba bé boñ nyuñga ni we, ba tinak we blé i nlôl i Minit,+ bijek bilam, wéi,+ môô ni binunumba,+ le yak we u ti bo gwom gwoñ.+
18 “‘“Damaskô+ a bé boñ nyuñga ni we inyule u bééna ngandak gwom, u bak ki ngwañ ngandak. A bé ti we wai i nlôl i Helbôn ni mahuu ma ntômba* ma ma nlôl i Zahar. 19 Védan ni Yavan, ba ba bé lôl i nkoñ u Uzal, ba bé ti we miñôôk mi bikei,* kasia* ni makai,* le yak we u ti bo gwom gwoñ. 20 Dédan+ a bé boñ nyuñga ni we, a tinak we mabadô* ma hosi inyu bakilhosi. 21 Bôt ba Arabia ni baane ba Kédar+ bobasôna, ba ba bé nuñul bon ba mintômba, balôm ba mintômba ni kembee, bon ba bé sélél we.+ 22 Bôt ba nyuñga ba Séba ni ba Raama+ ba bé boñ nyuñga ni we. Ba bé ti we mintén nwominsôna mi binunumba mi mi nlôôha minlam, tik ngok ni gôl, le yak we u ti bo gwom gwoñ.+ 23 Haran,+ Kané, Éden,+ bôt ba nyuñga ba Séba,+ Asur+ ni Kilmad ba bé boñ nyuñga ni we. 24 I bôm yoñ nyen ba bé nuñlene mambot malam, mambot ma ma yé mangoñ* ni mambot ba mage, ma ban-ga minsonol minlam, ba nuñlak ki bibuñga bi bi gwé ngandak minsonol; gwobisôna bi bak nkañak loñge ni minkôô.
25 Bisitima bi Tarsis+ gwon bi bé begee manyuñga moñ,
kayéle u bé u yôni ni gwom, u ban-ga mambegee ma nyét* kiyaga i ñemkété tuye.
26 Baluk sitima ba bi kena we ikété malép makeñi;
mbebi i i nlôl i pes likôl i bi boñ le u yin i ñemkété tuye.
27 Lingwañ joñ, nkus woñ, manyuñga moñ, baluk bisitima boñ ni basal mukété,
i bôt ba nyip mapondo mu bisitima gwoñ, bôt boñ ba nyuñga,+ ni bôt boñ ba gwét bobasôna,+
ñ, limut li bôt jolisôna li li yé i weeni,
bobasôna ba ga yin i ñemkété tuye i kel u ga kwo.+
28 I ngéda basal i sitima ba ga lond, i minkoñ mi yé ha bebee mi ga sehla.
29 I bôt bobasôna ba ngwélél bipagô, baluk sitima ni basal i sitima
ba ga pam mu bisitima gwap, ba telep i nkoñngii.
30 Ba ga bédés makiñ, ba eek we kiyaga,+
ba ga kôpba minluñ mi biték i ño, ba béñgbaga i libu.
31 Ba ga homb miño nwap, ba haba ki minsungut;
ba ga ee we ngandak, ba béglak kiyaga.
32 I ngéda njôghe i ga pam bo i ñem, ba ga tôp hiémbi hi maéya, ba eek we, ba kalak le:
‘Baa tison ipe i yé kiki Tir, i i ntjiba len* i ñemkété tuye?+
33 I ngéda gwom gwoñ bi bé lôl nyoo i ñemkété tuye, u bé yônôs ngôñ i ngandak matén.+
Ngandak yoñ nkus ni manyuñga moñ bi bi yilha bikiñe bi nkoñ ’isi mingwañ mi bôt.+
34 Ndi nano u nyin i ñemkété tuye, ikété ndip malép,+
yak manyuñga moñ momasôna ni bôt boñ bobasôna ba nyin lôñni we.+
35 I bôt bobasôna ba nyééne i biôn ba ga nun we siim, ba bak nhelek;+
miñem mi bikiñe gwap mi ga bôô bo matjél,+ yak nduña yap i ga nene mu masu map.
36 Bôt ba nyuñga ba ba nlôl i biloñ bipe ba ga hem hiôa inyu jam li nkwél we.
Lisuk joñ li ga lo kunda yada, li bak ki libe kiyaga,
u ga ba ha bé kekikel.’”’”+