Ézékiel
24 Yéhôva a bi pôdôs ki me i nwii mi nyônôs bôô, i hilo i nyônôs jôm hi sôñ i nyônôs jôm, a kal le: 2 “A man mut, mage i kel ini,* inyule i kel ini nyen kiñe Babilôn i bi bôdôl jôs Yérusalem gwét.+ 3 Kéne litén li ndok lini ngén.* Kal inyu yap le:
“‘Lana nyen Nwet Bayemlikok le Yéhôva a nkal:
“Téé hibee,* téé hio i juu, u ha ki malép mukété.+
4 Ha bikét bi binuga mu hibee,+ bikét bilam gwobisôna:
bel ni tjep; yônôs hio ni bihés bilam.
5 Yoñ biloñge bi mintômba mu bémba,+ u kot tjéé isi hibee, mu mapañ momasôna ma hibee.
Nat bikét bi binuga, u bélés ki bihés bi bi yé mukété hibee.”’
6 “Jon lana nyen Nwet Bayemlikok le Yéhôva a nkal:
‘Ngoo ni tison i manola,+ hibee hi hi gwé mañglét, hi ba bi héya bé mañglét!
Héya bikét bi binuga mu hibee, yada yada;+ ndi u pohol bañ imbe két nuga u nlama yoñ.
7 Inyule matjél i tison ini i bi kôp ma ngi yii mukété yé;+ i bi kôp yaga mo i ngii liaa.
I tison ini i bi kôp bé mo ’isi le biték+ bi hô mo.
8 Inyu boñ le me unup ngandak, le ndi me pun memede;
me bi nwas matjél ma bôt i tison ini i bi nol mu ngii liaa,
inyu boñ le ba hô bañ mo.’+
9 “Jon lana nyen Nwet Bayemlikok le Yéhôva a nkal:
‘Ngoo ni tison i manola!+
M’a kot soso nwind u tjéé.
10 Ni koda tjé, ni kuye ki hié,
Ni tibil yaga bélés bikét bi binuga, ni kôp sup mukété hibee; ni nwas ki le bihés bi lék bañga bañga.
11 Ni kéhi hibee hi hi yé hôlô i ngii makalak,
inyu boñ le mamuna mé ma kôyôp tjôôm.
Hié hi ga boñ le nyega yé i nyimbi,+ hi ligis ki mañglét nwé.
12 Ngo hala a nsôghana i ñem, hala a nwééhana ki,
inyule i mañglét mini mi yé ngandak, mi nhebi bé.+
Leña hibee ni mañglét nwé i juu!’
13 “‘Maboñok moñ mabe ma bi yilha we nyega.+ Me bi yéñ le me pubus we, ndi njel i bé bé inyu pubus nyega yoñ. U ga pubhana ndik i ngéda hiun hikeñi me gwééne we hi nsôs.+ 14 Me Yéhôva, men me mpot hala. I jam li, li ga bôña. M’a boñ hala ibabé i tiñha, ibabé ngoo, ibabé i tam.+ Ba ga kéés we inoñnaga ni manjel moñ ni maboñok moñ,’ hala nyen Nwet Bayemlikok le Yéhôva a mpot.”
15 Yéhôva a pôdôs ki me, a kal le: 16 “A man mut, kunda yada, m’a héya mut u ngwés i moo moñ.+ U nlama bé ee;* u nlama bé bégél, u nlama bé to kulus gwiiha. 17 Nôgôl ndutu mu ñem woñ, ndi u jôp bañ malep inyu bawoga.+ Téñ yañsi,+ haba bitamb+ gwoñ. U hô bañ nyo*+ woñ, u je bañ to bret ba ga lona we.”*+
18 Me bi pôdôs litén kegla, nwaa wem a wo kôkôa. I kegla i bé noñ, me boñ i yom ba bi kal me le me boñ. 19 Bôt ba bé kal le: “Toñle bés: lelaa i mam u mboñ ma mbéñge bés?” 20 Me timbhe bo le: “Yéhôva a mpôdôs me. A kal me le: 21 ‘Kal litén li Israel le: “Lana nyen Nwet Bayemlikok le Yéhôva a nkal: ‘M’a hindis homa wem mpubhaga,+ nu a nyilha bé ngôk, nu ni ngwés, nu ni ndiihe ki ngandak. Bon bôlôm banan ni bon bôda banan, ba ni bi yék, ba ga nôla ni pansoñ.+ 22 Ha nyen ni ga boñ kiki me. Ni ga hô bé nyo* nan, ni ga je bé to bret ba ga lona bé.*+ 23 Ni ga héya bé biyañsi bi yé bé i miño, to bitamb bi yé bé i makôô. Ni ga ee bé, to bégél ni ga bégél bé to. Ndi ni ga nok ndutu inyu maboñok manan mabe,+ ni siidaga ki. 24 Ézékiel a ga ba yimbne inyu nan.+ Ni ga boñ nlélém kiki nye. I ngéda hala a ga bôña, ha nyen n’a yi le men me yé Nwet Bayemlikok le Yéhôva.’”’”
25 “Ndi we a man mut, i kel m’a héya lisolbene jap li ngui, i yom i nkônha bo maséé, i yom ba ngwés ni i yom ba ndiihe, i nlélém ngéda nyen m’a héya bon bôlôm bap ni bon bôda bap,+ 26 i mut a ga pei nyen a ga lo i yis we hala.+ 27 I yokel nu nyen u ga ba ha bé mbuk: u ga yibil nyo woñ, u pôdôs ki i mut a mpei.+ U ga bane bo yimbne, ha nyen b’a yi le men me yé Yéhôva.”