Yérémia
34 I ngéda Nébukadnézar,* kiñe Babilôn, ni ntôñ wé gwét wonsôna, ni biane bi nkoñ ’isi gwobisôna bi bi yé isi énél yé, yak ni matén momasôna ba bi lo i jôs Yérusalem ni bitison gwobisôna bi bé nye ipañ,+ Yéhôva a bi témb a pôdôs Yérémia, a kal nye le:
2 “Haana nyen Yéhôva Nyambe nu Israel a nkal: ‘Ke kal Sédékia,+ kiñe Yuda le: “Yéhôva a nkal le: ‘Me yé i ti i tison ini i moo ma kiñe Babilôn, a ga ligis yo.+ 3 W’a pei bé i moo mé, bôt ba ga gwel we, ba kena we i nyeni.+ W’a tehe kiñe Babilôn ni mis moñ, a pôdôs we mbom ni mbom, w’a ke ki i Babilôn.’+ 4 Emble lipôdôl li Yéhôva, a Sédékia, kiñe Yuda: ‘Haana nyen Yéhôva a mpot inyu yoñ: “Pansoñ y’a nol bé we. 5 W’a wo ikété nsañ,+ ba ligis ki binjinjiñ i majôna moñ kiki ba bi boñ inyu basôgôsôgôl boñ, hala wee i bikiñe bi bi ane i bisu gwoñ; bôt ba ga ee we, ba kalak le: ‘Éé a nwet!’ ‘I nwin u won me nlegel,’ hala nyen Yéhôva a mpot.”’”’”
6 Mpôdôl Yérémia a bi kal Sédékia, kiñe Yuda, bibañga bini gwobisôna i Yérusalem. 7 Ha ngéda i, mintôñ mi gwét mi kiñe Babilôn mi bé jôs Yérusalem ni bitison bi Yuda gwobisôna bi bi yégle,+ hala wee Lakis+ ni Azéka.+ Inyule ikété bitison bi Yuda bi bi bééna mapénd ma ngui, gwotama gwon bi bi yégle.
8 Yéhôva a bi témb a pôdôs Yérémia i ngéda Kiñe Sédékia a bé a ma boñ malômbla ni bôt ba Yérusalem bobasôna le ba ga ti minkol nwap kunde.+ 9 Hiki mut a bé lama ti nkol wé u u yé man Lôk Héber kunde, nkol wé u munlôm tole u muda, kayéle mut nye ki nye a yilha ha bañ maasañ nu a yé man Lôk Yuda nkol. 10 Baane bobasôna ni bôt ba litén bobasôna ba bi nôgôl. Ba bi nôgla le hiki mut a nlama ti nkol wé u munlôm tole u muda kunde, mut a ga yilha ha bé bo minkol. Ba bi nôgôl, ba nwas minkol nwap le mi kenek. 11 Ndi i mbus ngéda, ba bi témb ba yoñ minkol nwap mi bôlôm ni mi bôda, mi ba bi ti kunde, ba nyégsa ki nwo i yila minkol. 12 Ha nyen Yéhôva a bi pôdôs Yérémia. Yéhôva a kal nye le:
13 “Haana nyen Yéhôva Nyambe nu Israel a mpot: ‘Me bi boñ malômbla ni basôgôlsôgôl+ banan i ngéda me bi héya bo i loñ Égiptô, i het ba bé minkol,+ me kal bo le: 14 “I nwii mi nyônôs minsaambok, hiki mut ikété nan a nlama ti maasañ nu a yé man Lôk Héber kunde; ibale ba bi nuñle nye maasañ, a gwélél ki nye nwii minsamal; u nlama ti nye kunde.”+ Ndi basôgôlsôgôl banan ba bi emble bé me, ba bi nôgôl bé to me. 15 Ndi munu dilo dini,* bé ni bi héñha mahoñol, ni boñ jam li téé sép i mis mem, inyule ni bi ti lôkisoñ nan kunde, ni boñ ki malômbla i bisu gwem mu ndap i bééga jôl jem. 16 I mbus ngéda, ni bi héñha ki mahoñol, ni hindis jôl jem+ inyule ni bi témb ni yoñ minkol minan mi bôlôm ni mi bôda, mi ni bi bôk ni ti kunde le mi kenek i het mi ngwés, ni bi témb ni nyégsa nwo i yila minkol minan.’
17 “Inyu hala nyen Yéhôva a nkal le: ‘Ni bi nôgôl bé me, to wada ikété nan a bi ti bé maasañ to mut wé loñ kunde.+ Jon m’a ti kunde,’ hala nyen Yéhôva a mpot, ‘m’a ti kunde le pansoñ, himala* ni njal+ bi nol bé, m’a boñ le biane bi nkoñ ’isi+ gwobisôna bi kon woñi i ngéda bi ga nok i jam li ga pémél bé. 18 I jam lini jon li ga pémél i bôt ba bi bôk malômbla mem, ba ba bi noñ bé matiñ ma malômbla ba bi boñ i bisu gwem, i ngéda ba bi kit man nyaga bipes biba, ba tagbe ki ipôla bipes bi;+ 19 hala wee baane ba Yuda, baane ba Yérusalem, bôt ba ngomin ba ndap kiñe, biprisi ni bôt ba loñ bobasôna ba ba bi tagbe ipôla bipes bi man nyaga: 20 m’a sem bo i moo ma baoo bap ni i moo ma bôt ba ba nyéñ nol bo,* mim nwap mi ga yila bijek inyu dinuni di ngii ni binuga bi bikai.+ 21 M’a sem Sédékia, kiñe Yuda, ni baane bé i moo ma baoo bap, i moo ma bôt ba ba nyéñ nol bo* ni isi énél i mintôñ mi gwét mi kiñe Babilôn+ nu a yé i nyodi i bééni.’+
22 “Yéhôva a nkal le: ‘M’a ti oda, me témb me lona bo hana i tison ini, ba ga jôs yo gwét, ba yémbél yo, ba ligis yo;+ m’a yilha bitison bi Yuda hôlô, mut nye ki nye a ga yééne ha bé mu.’”+