Kaat bisu i Miñañ

14 Kiñe Tir le Hiram+ a bi om balegelnwin yak David, a om yak bie bi sidar, ni bakôñg ngok* lôñni bikapinda, le ba ôñôl nye+ ndap.* 2 David a bi yi le Yéhôva a nlédés ane yé i Israel,+ inyule ane yé i bi bana lipém inyu loñge i litén jé Israel.+

3 David a bi bii bôda+ bape i ngéda a bé i Yérusalem, a bana ki ngandak bon bôlôm ni bon bôda+ bape. 4 I bon bé bana bon ba bi gwééne i Yérusalem:+ Samua, Sôbab, Natan,+ Salômô,+ 5 Ibhar, Élisua, Élipélet, 6 Nôga, Néfeg, Yafia, 7 Élisama, Bééliada ni Élifélet.

8 I ngéda bôt ba Filistia ba bi nok le David a nyila kiñe Israel,+ bobasôna ba ke i yéñ David.+ Kiki David a nyi hala, a pam i jôs bo gwét. 9 Ha nyen bôt ba Filistia ba bi lo, ba leñ bôt ba nsôsôgô* i Réfaim+ gwét. 10 Ha nyen David a bi bat Nyambe le: “Baa me kenek i jôs bôt ba Filistia gwét? Baa u ga boñ le me yémbél bo?” Yéhôva a kal nye le: “Kenek, ibabé pééna, m’a boñ le u yémbél+ bo.” 11 David a bi ke i Baal-Pérasim,+ a yémbél bôt ba Filistia nyoo. I mbus, David a kal le: “Bañga Nyambe a néhne me njel i ñemkété u baoo bem, kiki malép le ma mbôk jegi.” Inyu hala nyen ba bi sébél i homa nu le Baal-Pérasim.* 12 Bôt ba Filistia ba ke ngwéé, ba yék banyambe bap, David a ti oda le ba ligis+ bo.

13 I mbus ngéda, bôt ba Filistia ba témb ba leñ bôt ba nsôsôgô*+ gwét. 14 David a témb a bat Nyambe mahoñol mé, ndi bañga Nyambe a kal nye le: “U leñ bañ bo gwét i mbombom. Kiiña, u pémél i bisu bi lipan li baka,+ u lôl bo mbus. 15 I ngéda u ga nok liyôgbe i mabeda ma lipan li baka, kiki bo liyôgbe li ntôñ gwét u u ntagbe, leñ bo gwét inyule bañga Nyambe a ga bôk we i bisu inyu tjé ntôñ gwét u bôt ba Filistia.”+ 16 David a bi boñ kiki bañga Nyambe a bi kal nye.+ Ba bi nol bôt ba ntôñ gwét u Filistia ibôdôl i Gibéôn letee ni i Gézer.+ 17 Jôl li David li bi ke ngan ikété biloñ gwobisôna, Yéhôva a boñ ki le biloñ+ gwobisôna bi kon nye woñi.