1 Pétrô

2 Jon ni tjôô béba yosôna, ni malôga momasôna, yak bihéñba, ni tama, lôñni minsoga nwominsôna. 2 Kiki minkéñéé mi bon, ni bana ngôñ keñi ni bañga milik* mi bañga i Nyambe, inyu boñ le ni njel milik mini ni hôlôl letee ni tohi, 3 ibale ni bi noode* le Nwet a gwé loñgeñem.

4 Kiki ni nlo i nyeni, nyen a yé ngok yômi bôt ba bi tjél ndi yon Nyambe a bi pohol, i bak tik i mis mé, 5 yak bébomede ba ni yé ngok yômi, ni yé i ôña le ni ba ndap mbuu, ntôñ biprisi bipubhaga, kayéle ni ti bisesema bi mbuu bi bi nlémél Nyambe ni njel Yésu Kristô. 6 Inyule i nkéla ikété Bitilna le: “Nuna-ki, me yé i tek mpohlak ngok i Siôn, tik ngok likas i hikuu; i mut a ñunda le a nhémle yo a’ wo bé nyuu* kekikel.”

7 Jon inyu nan nyen a yéne tik inyule ni yé bahémle; ndi inyu ba ba nhémle bé, a yé “ngok bôt ba maoñ ba bi tjél, yon i bi yila ngok likas i bisu,”* 8 a yé ki “ngok baagene ni liaa bôt ba mbômda.” Ba mbaage inyule ba ndogbene bañga i Nyambe. Inyu lisuk yaga lini nyen ba bi tééba. 9 Ndi bé ni yé “mpohlak litén, ntôñ biprisi u kiñe, loñ pubhaga, bôt ba tôbôtôbô ba Nyambe nyemede, inyu boñ le ni añle biloñ bipe bilem bi mbuma ñañ”* bi Nu a bi séblene bé ikété jiibe le ni jôp i mapubi mé ma hélha. 10 Inyule i ngéda bisu, ni bé bé litén, ndi nano ni yé litén li Nyambe; i ngéda bisu, ni bi kôhna bé konangoo, ndi nano ni mal kôhna konangoo.

11 A bagwéha, hala kiki ni yé bakén ba bôt ni bôt ba nyééne munu nkoñ ’isi inyu ndék ngéda, me nti bé makénd le ni ke ni bisu i tjél minheña mi minsôn mi mi njôs bé gwét.* 12 Ni tééda maboñok manan malam ikété biloñ bipe, kayéle ngéda ba ñôm bé nsohi le ni yé baboñ mam mabe, ba tehe minson minan minlam ni mis map, le ndi ba ti Nyambe lipém i kel a nlo i wan mam.

13 Inyu sômbôl i Nwet, suhlana bébomede isi hiki mut binam ba ntéé,* to isi kiñe inyule a gwé kunde i ngii nan, 14 to isi bangomin bakeñi inyule kiñe yon i ñep bo le ba kogse baboñbéba, ndi ba bégés i bôt ba mboñ loñge. 15 Inyule hala a yé sômbôl i Nyambe le ni njel loñge ni mboñ, ni yip manyo* ma ngiyi ma bijôñ bi bôt. 16 Ni ba kiki bôt ba yé kunde, ndi ni gwélél bañ kunde nan kiki yom i nhô* maboñok mabe, ndi kiki minkol mi Nyambe. 17 Tina mintén mi bôt nwominsôna lipém, gwéha ntôñ u lôk kéé wonsôna,* kona Nyambe woñi, tina kiñe lipém.

18 Bagwélél ba suhus bomede isi bet bap lôñni woñi wonsôna, ha ndik bé isi ba ba yé biloñge bi bôt ni bôt ba nai bé ni litehge jap li mam, ndi Yak isi ba ba yé ndutu i lémél. 19 Inyule hala a yé loñge jam ngéda mut a nhônba njiiha,* a sonok njonok ki le a yé ngi nsohi inyule a nsômbôl bana loñge kiññem i bisu bi Nyambe. 20 Inyule bimbe bibégés ni nkôhna ibale ba mbép bé inyule ni mboñ béba ndi ni hônbaga? Ndi ibale ni nhônba mandutu inyule ni mboñ loñge, hala a yé jam li nlémél Nyambe.

21 Ni maliga, munu njel ini nyen ni bi séblana, inyule yak Kristô a bi son njonok inyu nan, a yigle bé ndémbél le ni odop yaga mu mabal mé. 22 A bi boñ bé béba to yada, to malôga ma bi lébna bé mu nyo wé. 23 I ngéda ba bé sol* nye, a bé timbhe bé sol inyu sol.* I ngéda a bé son njonok, a bé han bé mut, ndi a bé ti nyemede i moo ma Nu a nkéés ni telepsép. 24 Nyemede a bi begee bibéba gwés mu nyuu yé i ngii kék,* kayéle di wo kingéda* bibéba, ndi di niñ kingéda telepsép. Ni le “ni njel mambabaa mé nyen bé ni bi mbôôp.” 25 Inyule ni bé kiki minimlak mi mintômba, ndi nano ni mal témb yak ntééda ni mbéñge biniñ* binan.