2 Timôtéô

2 Jon we, a man wem, kenek ni bisu i yoñ ngui ikété konangoo i mbuma ñañ i i yé ikété adna ni Kristô Yésu; 2 i mam u bi nôgôl i meeni, mam le ngandak mbôgi i bi nit, niiga mo bôt ba maliga, yak bo b’a bana ngap i nya i kôli inyu niiga bape. 3 Kiki bañga sônda i Kristô Yésu, yoñ ngaba i hônba mandutu. 4 Mut to wada nu a ngwel nson sônda a njôp bé* i manyuñga* ma niñ, le ndi a lémél nu a bi yoñ nye i nson sônda. 5 Yak i mintuk, i mut a nyoñ ngaba i mintuk, a nkôhna bé ntut handugi le a mélés mintuk inoñnaga ni matiñ. 6 Nsalwom nu a ntumbba ni nson nyen a nlama ba mut bisu i kôhna ngaba matam. 7 Hek pék ngéda yosôna munu jam me yé i kal; Nwet a’ ti we nogna* ikété mam momasôna.

8 Bigda le Yésu Kristô a bi tuge ikété bawoga, a bak mu mbôda* David, inoñnaga ni ñañ nlam me ñañal, 9 inyu ñañ nlam nyen me yé i nôgôl ndutu, me bak ki i mok kiki ntonba. Ndi bañga i Nyambe i ta bé nkañak. 10 Inyu njom ini nyen me nkônde hônba mam momasôna inyu mimpohlak, le ndi yak nwo mi pam i kôhna tohi i i yé ni njel Kristô Yésu, lôñni lipém li boga. 11 I lipôdôl lini li kôli le di bôdôl jo ñem: Ibabé pééna, ibale di bi wo lôñni nye, wee d’a niñ ki lôñni nye; 12 ibale di nke ni bisu i hônba, wee yak bés d’a ba bikiñe lôñni nye; ndi ibale di ntañba nye, yak nye a’ tañba bés; 13 ibale di ta bé maliga, nye a ntéñbe i ba maliga, inyule a nla bé tañba nyemede.

14 Ke ni bisu i hôñlaha bo i mam mana, u niigaga* bo i bisu bi Nyambe le ba jo bañ bisañ inyu bibuk, hala a yé toi yañga jam inyule hala a mboñ i bôt ba ñemble béba.* 15 Boñ biliya gwoñ gwobisôna le wemede u telep i bisu bi Nyambe kiki mut nu a nlémél nye, ngwelnson nu a gwé bé jam li wonyuu jo ki jo, nu a ntoñol bañga i maliga ni likeñge. 16 Ndi tjél biyôglô bi minkwel bi bi nhindis i jam li yé lipubi, inyule hala a’ kena ndik i liyan Nyambe, kena ni kena, 17 yak bibañga gwap bi ga tjama kiki pos.* Himénéô bo Filétô ba yé ikété yap. 18 I bôt bana ba bi ke haa ni maliga, ba kalak le bitugne bi mal tagbe, ba yé ki i tjé hémle i bôt bahogi. 19 Ndi to hala, hikuu hi ngui hi Nyambe hi ngi umi siñ, hi ban-ga i béndél ini le: “Yéhôva* a nyi i bôt ba yé bé,” ni le: “Hiki mut a nsébél jôl li Yéhôva* a tjél ngitelepsép.”

20 Ndi ikété ndap keñi, biébél bi gôl ni bi silba gwotama bé gwon bi yé, ndi yak bi bikék ni bi biték; bihogi bi ngwéélana inyu bañga mam,* ndi bipe inyu gwañga bi mam.* 21 Jon ibale mut a nke haa ni biébél inyu gwañga bi mam, wee a’ ba sélél* inyu bañga mam; sélél i i nyila pubhaga, i bak nseñ inyu nwet wé, nkôôbaga inyu hiki nson nlam. 22 Jon ke minheña mi boñge ba wanda ngwéé, ndi noñ telepsép, hémle, gwéha, nsañ, lôñni bôt ba nsébél jôl li Nwet ni ñem u mpôp.

23 Ndi tjél pééna i bijôñ ni i ngiyi, u yik le i nlona ndik bisañ. 24 Inyule nkol u Nwet u gwé bé le u jo bisañ, ndi u nlama unda bôt bobasôna loñgeñem,* u yik niiga, u gwelek womede ngéda ba mboñ wo béba, 25 u niigaga i bôt ba ba gwé bé mahoñol malam ni ñemlima. Bebek Nyambe a’ ti bo hielñem* i i nkena i bañga yi i maliga, 26 le ño u yi bo jam, ba tohla ki i hiandi hi Nsohop, hala kiki a bi gwel bo yômi le ba boñ sômbôl yé.