2 Tésalônika

2 Ndi, a lôk kéé, inyu ngéda Nwet wés Yésu Kristô a mba ha, ni ngéda d’a kodba lôñni nye, di mbat bé 2 le ni pala bañ yôm ikété mahoñol manan, ni pala bañ to sehla inyu lipôdôl li li nene wengoñle li nlôl yak Nyambe,* to nwin bôt ba nlegel, to kaat i i nene wengoñle i nlôl i béhni, bi kalak le hilo hi Yéhôva* hi yé ha.

3 Mut to wada a yumus* yaga bañ bé to ndék, inyule i hilo hi hi’a lo bé handugi le batjañgbene Nyambe ba bôk ndugi ba lo, yak mut liyanmbén* a yeli, nyen a’ tjiba. 4 A ntelep ikolba hiki yom ba nsébél nyambe, tole hiki yom bôt ba mbégés,* a nyagbene ki gwo, inyu hala nyen a nyén ikété témpel Nyambe, a undga i mbamba le nyemede a yé ngim nyambe. 5 Baa ni mbigda bé le ngéda me bé me ngi yii lôñni bé, me bé béna kal bé i mam mana?

6 Ndi nano, ni nyi nu a yé i kéñ* mut liyanmbén njel, kayéle a’ yeli ndigi i ntéak wé ngéda. 7 I yé maliga le i liyanmbén lini li mal bôdôl nson wé bisôsôli,* ndi ndik letee nu a yé i kéñ njel nano a nyodi. 8 Ha yaga nyen mut liyanmbén a’ yeli, nyen Nwet le Yésu a’ tjé ni njel bibañga bi nyo wé,* a yilha ki nye yañga ni njel masoola mé ngéda a mba ha. 9 Ndi libak le mut liyanmbén a yé ha, li yé nson u Satan ni njel mimpémba mi mam, biyimbne bi bitembee, lôñni bihélha bi mam* bi bitembee, 10 yak ni ngitelepsép lôñni malôga momasôna inyu bôt ba yé i kôhna tjiba kiki kogse inyule ba bi neebe bé gwéha i maliga kayéle ba kôhna tohi. 11 Inyu hala nyen Nyambe a nwas le biniigana bi malôga bi yumus bo inyu boñ le ba hémle bitembee, 12 kayéle bobasôna ba kôhna mbagi nôgôs inyule ba bi hémle bé maliga, ndi ngitelepsép yon i bi lémél bo.

13 Ndi di yé nyégsaga i ti Nyambe mayéga ngéda yosôna inyu nan, a lôk kéé Yéhôva* a ngwés, inyule ibôdôl i bibôdle, Nyambe a bi pohol bé inyu bana tohi. Hala a bi bôña inyule a bi yilha bé bapubhaga ni njel mbuu wé ni inyule ni bi hémle maliga. 14 Inyu jam lini nyen a bi séblene bé ni njel ñañ nlam di ñañal, le ndi ni kôhna lipém li Nwet wés Yésu Kristô. 15 Jon, a lôk kéé, telbana siñ siñ, téñbana ki ni biniigana ni bi kôhna, to ni njel nwin, to ni njel kaat i i bi lôl i béhni. 16 Ndi Nwet wés Yésu Kristô nyemede ni Nyambe Tata wés nu a bi gwés bés, a ti ki bés hogbe i boga ni loñge botñem ni njel konangoo i mbuma ñañ, 17 ba ti miñem minan hogbe, ba lédés ki bé* le ni boñ mam malam, ni bana ki bipôdôl bilam ngéda yosôna.